བཙན་བྱོལ་སྤུན་ཟླ་རོལ་ཚོགས་ཀྱིས་འཁོར་ཐག་གཉིས་པ་འགྲེམས་སྤེལ་བྱས་འདུག

བཙན་བྱོལ་ནང་གི་རོལ་ཚོགས་སྙན་གྲགས་ཆེ་ཤོས་གྲས་སུ་ཚུད་ཀྱི་ཡོད་པའི་བཙན་བྱོལ་སྤུན་ཟླ་རོལ་ཚོགས་ཀྱིས། ལོ་ངོ་༡༧ རྗེས་སུ་རོལ་དབྱངས་ཀྱི་འཁོར་ཐག་གཉིས་པ་འགྲེམས་སྤེལ་བྱས་འདུག

ཟླ་༧ པའི་ཚེས་༤ ཉིན་བཞུགས་སྒར་དྷ་ས་ནས་འཚར་ལོངས་བྱུང་བའི་བུ་སྤུན་གསུམ་གྱི་རོལ་ཚོགས་བཙན་བྱོལ་སྤུན་ཟླ་(JJI Exile brothers)ཡིས། གཞས་སྣ་མི་འདྲ་བ་༡༠ ཡོད་པའི་འཁོར་ཐག་(Live)དྲ་ཐོག་ནས་འགྲེམས་སྤེལ་བྱས་འདུག་པ་དང་། འཁོར་ཐག་དེ་དྲ་ཐོག་ནས་ཉན་རྒྱུ་དང་ཉོ་རྒྱུ་འདུག

དེ་ཡང་རོལ་ཚོགས་དེས་ཕྱི་ལོ་༢༠༠༢ ལོར་འཁོར་ཐག་དང་པོ་འགྲེམས་སྤེལ་བྱས་ཡོད་པ་དང་། ཁོ་ཚོའི་གཏོང་བའི་གཞས་ནི་རཱོག་(Rock)སྡེ་ཚན་ཡིན་པས། རོལ་ཆ་དང་གཞས་ཆ་ཚང་རོལ་ཚོགས་ཀྱིས་དངོས་སུ་གཏོང་གི་ཡོད་པ་རེད་ལ། སྐབས་དེར་བཙན་བྱོལ་ནང་གཞས་དེ་རིགས་དར་ཁྱབ་དེ་ཙམ་ཆེན་པོ་མེད་ནའང་། བཙན་བྱོལ་སྤུན་ཟླའི་འཁོར་ཐག་དེར་དགའ་མོས་བྱེད་མཁན་མང་པོ་བྱུང་ཡོད་པ་རེད་ལ། དེང་སང་ཡང་ཁོོ་ཚོའི་འཁོར་ཐག་དང་པོའི་ནང་གི་གཞས་རྣམས་སྡིངས་ཆའི་ཐོག་ཏུ་གཏོང་མཁན་མང་པོ་ཡོད་པ་རེད། དེ་བཞིན་བཙན་བྱོལ་བོད་མིའི་གློག་བརྙན་མང་པོ་ཞིག་ནང་དུ་ཡང་ཁོ་ཚོའི་གཞས་བེད་སྤྱོད་བྱེད་ཀྱི་ཡོད་པ་རེད།

བཙན་བྱོལ་སྤུན་ཟླའི་ངོ་དེབ་ཐོག་ཏུ། བུ་སྤུན་གསུམ་གྱིས་འཁོར་ཐག་དེའི་ཆེད་དུས་ཚོད་རིང་པོ་བཏང་ཡོད་པ་དང་། གཞས་སྣ་མང་ཆེ་བ་ཐད་ཀར་བཏང་ནས་སྒྲ་འཇུག་བྱས་པ་ཡིན་སྐོར་བསྒྲགས་འདུག

རོལ་ཚོགས་དེ་ནི་ཐོག་མར་ཕྱི་ལོ་༡༩༩༨ ལོར་བུ་སྤུན་གསུམ་གྱི་ཨ་མ་ཉི་མས་མཐུན་སྦྱོར་བྱས་ཏེ་བཙུགས་པའི་རོལ་ཚོགས་ཤིག་ཡིན་པ་རེད། ཁོ་ཚོའི་རོལ་དབྱངས་དང་གཞས་ཚིག་རྣམས་རང་རྩོམ་ཡིན་ཁར། སྲོལ་རྒྱུན་བོད་ཀྱི་གཞས་སྣ་དང་མི་འདྲ་བ་ཡོད་པས། རྒྱ་གར་དང་རྒྱལ་སྤྱིའི་གསར་ཁང་དང་དུས་དེབ་མང་པོ་ཞིག་ནང་རོལ་ཚོགས་ཀྱི་སྐོར་གནས་ཚུལ་སྤེལ་ཡོད་པ་རེད།

རོལ་ཚོགས་ཀྱི་ངོ་དེབ་ཐོག་ཏུ་ཁོ་ཚོས་རོལ་དབྱངས་བརྒྱུད་ནས་རྒྱལ་སྤྱིའི་ཐོག་བོད་མིའི་འཐབ་རྩོད་གོ་རྟོགས་སྤེལ་རྒྱུ་དང་ཞི་བདེ། བྱམས་པ་ཁྱབ་སྤེལ་གཏོང་རྒྱུའི་དམིགས་ཡུལ་འཛིན་གྱི་ཡོད་པ་དང་། བོད་མིའི་འདས་པའི་འཐབ་རྩོད་ཀྱི་རྣམ་ཤེས་འཁྱེར་ནས་དུས་ད་ལྟ་བསྐྱར་དུ་མྱོང་རྒྱུ་དང་། མ་འོངས་པའི་ཆེད་དུ་གཅེས་སྲུང་བྱེད་པར་ཞབས་ཞུ་སྒྲུབ་ཀྱི་ཡོད་ཅེས་བཀོད་འདུག །

གསར་འགོད་པ་སྐལ་བཟང་དོན་གྲུབ།

འཁོར་ཐག་གི་དྲ་ཐག