བཙོན་འོག་ཏུ་ཡོད་པའི་ཡུ་གུར་བ་ཞིག་ལ་ཡོ་རུབ་མཐུན་ཚོགས་ཀྱིས་གཟེངས་རྟགས་ཆེ་ཤོས་དེ་ཕུལ་འདུག

 ཡོ་རུབ་མཐུན་ཚོགས་ཀྱིས་འགྲོ་བ་མིའི་ཐོབ་ཐང་གི་གཟེངས་རྟགས་ཆེ་ཤོས་དེ་རྒྱ་ནག་གི་བཙོན་འོག་ཏུ་ཡོད་པའི་དཔལ་འབྱོར་རིག་པའི་སློབ་དཔོན་ཆེན་མོ་ཨི་ལཱམ-ཏྲོ་ཧེ་ཊི་(Ilham Tohti)ལ་ཕུལ་བ་མ་ཟད། རྒྱ་ནག་ལ་གྲངས་ཉུང་མི་རིགས་ཀྱི་ཐོབ་ཐང་བརྩི་སྲུང་བྱེད་པའི་དགོས་འདུན་བཏོན་འདུག

ཟླ་༡༠ ཚེས་༢༤ ཉིན་ཡོ་རུབ་མཐུན་ཚོགས་ཀྱིས་༢༠༡༩ ལོའི་སཱ་ཁ་རོ་གཟེངས་རྟགས(the Sakharov Prize) ཡུ་གུར་གྱི་ལས་འགུལ་བ་ཨི་ལཱམ-ཏྲོ་ཧེ་ཊི་ལ་འབུལ་རྒྱུ་ཡིན་པ་དང་། དེ་ཡང་ཁོང་གིས་ཡུ་གུར་གྲངས་ཉུང་མི་རིགས་ཀྱི་ཐོབ་ཐང་རྩོད་ལེན་གནང་བའི་ཕྱག་ལས་དེ་ལ་བརྟེན་ནས་འབུལ་རྒྱུ་ཡིན་པའི་གསལ་བསྒྲགས་བྱས་པ་དང་སྦྲགས། པེ་ཅིང་སྲིད་གཞུང་ལ་ཁོང་འཕྲལ་དུ་གློད་གྲོལ་གཏོང་བའི་དགོས་འདུན་བཏོན་ཡོད་འདུག 

ཨི་ལཱམ-ཏྲོ་ཧེ་ཊི་ནི་ཡུ་གུར་གྱི་སྙན་གྲགས་ཆེ་བའི་དཔལ་འབྱོར་རིག་པའི་སློབ་དཔོན་དང་། ཡུ་གུར་གྲངས་ཉུང་མི་རིགས་ཀྱི་ཐོབ་ཐང་འཐབ་རྩོད་པ་ཞིག་ཡིན་ཞིང་། ཁོང་གིས་རྒྱ་ནག་གཞུང་ནས་ཡུ་གུར་ལ་བཟུང་བའི་དབྱེ་འབྱེད་དང་དྲང་བདེན་མ་ཡིན་པའི་ལྟ་སྤྱོད་ལ་དགག་པ་དང་སྐྱོན་བརྗོད་ཤུགས་ཆེན་གནང་བར་བརྟེན། རྒྱ་ནག་གཞུང་གིས་ཕྱི་ལོ་༢༠༡༤ ལོར་ཁོང་ལ་མི་རིགས་ཁ་བྲལ་གཏོང་མཁན་གྱི་ནག་ཉེས་གཡོགས་ནས་ཚེ་བཙོན་གྱི་ཁྲིམས་ཐག་བཅད་པ་མ་ཟད། ༢༠༡༧ ནས་བཟུང་ནང་མིས་ཀྱང་ཐུག་ས་མེད་པའི་ནག་བཙོན་དུ་བཙུད་ནས་བཞག་ཡོད་འདུག 

འདི་ལོའི་གཟེངས་རྟགས་གསལ་བསྒྲགས་བྱེད་པའི་མཛད་སྒོའི་ཐོག ཡོ་རུབ་གྲོས་ཚོགས་ཀྱིས་ཁོང་ནི་རྒྱ་ནག་གི་ས་གནས་མི་རིགས་རང་སྐྱོང་གི་རྩ་ཁྲིམས་ལག་བསྟར་དགོས་པའི་ལས་འགུལ་སྤེལ་མཁན་ཞིག་ཡིན་པའི་འགྲེལ་བརྗོད་བྱས་པའི་ཁར། ཚོགས་གཙོ་ཌེ་ཝི་ཌི-ས་སོ་ལི་(David Sassoli) ཡིས་“ང་ཚོས་གཟེངས་རྟགས་འདི་ཕུལ་བ་བརྒྱུད་དེ་རྒྱ་ནག་གཞུང་ལ་ཁོང་གློད་གྲོལ་གཏོང་བ་དང་། རྒྱ་ནག་ཏུ་གྲངས་ཉུང་མི་རིགས་ཀྱི་ཐོབ་ཐང་དགོས་པའི་དགོས་འདུན་ཤུགས་ཆེན་འདོན་ཀྱི་ཡོད་”ཅེས་གསུངས་ཡོད་འདུག 

ཡོ་རུབ་མཐུན་ཚོགས་ཀྱི་གཟེངས་རྟགས་ཆེ་ཤོས་འདི་ནི་༡༩༨༨ ལོར་གསར་དུ་བཟོས་པ་ཞིག་ཡིན་པ་དང་། གཟེངས་རྟགས་འདི་སྙིང་སྟོབས་ཆེན་པོས་འགྲོ་བ་མིའི་གཞི་རྩའི་རང་དབང་དང་ཐོབ་ཐང་སྲུང་སྐྱོབ་བྱེད་མཁན་གྱི་ཚོགས་པ་དང་མི་སྒེར་རྣམས་ལ་འབུལ་གྱི་ཡོད་འདུག་ཅིང་། ༢༠༡༣ ལོའི་གཟེངས་རྟགས་དེ་པ་ཀི་སི་ཐན་གྱི་བུད་མེད་རང་དབང་འཐད་རྩོད་པ་མཱ་ལཱ་ལཱ་(Malala Yousafzai) ལ་ཐོབ་ཡོད་འདུག 

གཟེངས་རྟགས་འབུལ་བཞེས་ཀྱི་མཛད་སྒོ་དངོས་དེ་འདི་ལོའི་ཕྱི་ཟླ་༡༢ ཚེས་༡༨ ཉིན་ཧྥ་རན་སི་ལ་འཚོགས་གཏན་ཁེལ་ཡོད་འདུག་མོད། ཡུ་གུར་གྱི་ལས་འགུལ་བ་ཁོང་བཙོན་གྲོལ་ཐོབ་ནས་དེར་ཕེབས་ཐུབ་པའི་གོ་སྐབས་ཕྲ་བ་མ་ཟད། ཐ་ན་ཁོང་གིས་བཙོན་ཁང་ནས་ཆེས་སྙན་གྲགས་ལྡན་པའི་གཟེངས་རྟགས་འདི་ཁོང་ལ་ཐོབ་ཡོད་པའི་གནས་ཚུལ་དེ་གོ་ཐུབ་མིན་ཡང་ཐེ་ཚོམ་དུ་གྱུར་ཡོད་འདུག 

ཁོང་ལ་ཡོ་རུབ་མཐུན་ཚོགས་ཀྱི་འགྲོ་བ་མིའི་ཐོབ་ཐང་གི་གཟེངས་རྟགས་ཐོབ་པའི་གནས་ཚུལ་དེར། རྒྱ་ནག་གཞུང་ནས་དུས་རྒྱུན་གྱི་ལན་ཞིག་སྟེར་འདུག་སྟེ། རྒྱ་ནག་ཕྱི་སྲིད་ལས་ཁུངས་ཀྱིས་ཁོང་ནི་རྒྱ་ནག་གིས་ཁྲིམས་ཐག་བཅད་པའི་ཉེས་ཅན་པ་ཞིག་ཡིན་སྟབས། ཕྱོགས་ཐམས་ཅད་ནས་རྒྱ་ནག་གི་རྩ་ཁྲིམས་བདག་དབང་ལ་གུས་བརྩི་བྱས་ཏེ་“འཇིགས་སྐུལ་རིང་ལུགས་པ་”ལ་མཐོང་ཆེན་མི་བྱེད་པའི་རེ་བ་ཡོད་ཚུལ་བརྗོད་ཡོད་འདུག ། ཁོང་གི་འཕྲིན།

གསར་འགོད་པ་དཀོན་མཆོག་རབ་བརྟན།