བརྒྱ་ཆ་ལྔ་བཅུ་ལྔ་བཅུ་ཆགས་སོང་ན།

བོད་ཀྱི་བང་ཆེན་སྤྱིའི་འདོན་ཐེངས་ ༥༥༠  ཕྱི་ལོ་ ༢༠༡༥/༧/༨

ད་ལྟའི་ཆར་བཙན་བྱོལ་བོད་མི་རྣམས་ནུབ་ཕྱོགས་ཀྱི་ཡུལ་གྲུ་ཁག་ཏུ་བསྐྱོད་རྒྱུ་དེ་ཕལ་མོ་ཆེའི་སེམས་གཏིང་གི་རེ་བ་ཉག་གཅིག་དེ་རེད་ཅེས་བརྗོད་ཀྱང་ཆོག་ལ། འགྲོ་རྒྱུའི་ཐབས་ཤེས་ཐོན་མཁན་ཞིག་ཡིན་ན་མི་འགྲོ་མཁན་ཡང་ཧ་ཅང་ཉུང་། ནུབ་ཕྱོགས་སུ་འགྲོ་རྒྱུ་དེ་བོད་མི་རིགས་ཀྱི་རྩ་དོན། གང་ཟག་སྒེར་སོ་སོའི་མདུན་ལམ་གང་ཐད་ནས་བཤད་ཀྱང་མཐའ་གཅིག་ཏུ་ནོར་འདུག་ཅེས་བརྗོད་དཀའ་ལ། འགྲིག་འདུག་ཅེས་བརྗོད་དགོས་ན་དེ་བས་བཤད་མི་ཤེས་པ་ཞིག་རེད། དཔེར་ན་སུད་སི་ལྟ་བུར་མཚོན་ན་བོད་པ་གྲངས་ཚད་ཁ་གསལ་མེད་ཀྱང། བདུན་སྟོང་ནས་བརྒྱད་སྟོང་བར་ཡོད་ཅེས་བརྗོད་མཁན་མང་པོ་འདུག དེ་བཞིན་ཡུ་རོབ་ཀྱི་རྒྱལ་ཁབ་ཧྥ་རན་སི་དང། སྦེལ་རྗམ། ཧོ་ལེན་ཌི། འཇར་མ་ནེ་སོགས་ཡུ་རོབ་ཀྱི་ཡུལ་གྲུ་ཕལ་མོ་ཆེའི་ནང་དུ་བོད་པ་མེད་ས་མེད་ཅེས་བརྗོད་ཆོག་ལ། ཨོ་སི་ཁྲོ་ལི་ཡ་དང། ཨ་རི་དང་ཁེ་ན་ཌ་སོགས་སུ་བོད་པ་ཧ་ཅང་མང་པོ་གནས་སྡོད་བྱས་ཡོད། ད་ལྟའི་ཆར་རྒྱ་གར་གྱི་ས་གནས་ཁག་ཏུ་གནས་སྡོད་བྱེད་མཁན་སྐྱབས་བཅོལ་བོད་མི་ཉུང་ནས་ཉུང་དུ་འགྲོ་བཞིན་ཡོད་ལ། སློབ་གྲྭ་དང་དགོན་སྡེ་ཁག གཞུང་སྒེར་གྱི་སྒྲིག་འཛུགས་ཁག་ལའང་དཀའ་ངལ་འཕྲད་འགོ་ཚུགས་ཡོད།

མ་འོངས་པར་ཕྱི་ལོ་༢༠༢༠ ཙམ་ལ་རྒྱ་བལ་འབྲུག་གསུམ་དུ་སྡོད་མཁན་དང། ནུབ་ཕྱོགས་ཀྱི་ཡུལ་གྲུ་ཁག་ཏུ་སྡོད་མཁན་གྱི་མི་འབོར་གཉིས་མང་ཉུང་གི་ཐོག་ནས་བརྒྱ་ཆ་ལྔ་བཅུ་ལྔ་བཅུ་ཆགས་སོང་ན། སྐབས་དེ་དུས་བོད་པའི་ཆོས་དང་རིག་གནས་བདག་པོ་རྒྱག་རྒྱུའི་ཐད་ལ་དཀའ་ངལ་ཆེན་པོ་ཞིག་འཕྲད་སྲིད་དམ། ཡང་ན་དེ་ལས་ཟློག་སྟེ་བོད་ཀྱི་ཆོས་དང་རིག་གནས་རྒྱུན་འཛིན་དར་སྤེལ་གྱི་ཐོག་ལ་ནུས་ཤུགས་གསར་པ་ཞིག་ཏུ་འགྱུར་སྲིད། གནད་དོན་འདི་ནི་ང་ཚོའི་མིག་མདུན་དུ་ཡོད་པའི་དྲི་རྟགས་གལ་ཆེན་པོ་ཞིག་ཏུ་གྱུར་ཡོད། གནད་དོན་འདིར་ལན་དོན་མཐུན་ཞིག་རྒྱག་དཀའ་ཡང། ཆེ་ས་ནས་བོད་མིའི་སྒྲིག་འཛུགས་ཀྱི་སྲིད་སྐྱོང་ནས། བོད་མི་མི་རེ་ངོ་རེ་ནས་དྲི་རྟགས་འདི་ལ་ལན་ཞིག་རག་པར་བསམ་བློ་བཏང་ནས་གྲ་སྒྲིག་བྱེད་དགོས་པ་དེ་ཧ་ཅང་གལ་ཆེ། དོན་གནད་འདི་ནི་བོད་པ་སྤྱི་ཡོངས་ཀྱི་རྩ་དོན་དང་འབྲེལ་བའི་གནད་དོན་གལ་ཆེན་ཞིག་ཡིན་པ་མ་ཟད། གང་ཟག་སྒེར་སོ་སོའི་མདུན་ལམ་དང་མ་འོངས་པའི་མི་ཚེ་མི་རབས་ལ་ཐུག་པའི་གནད་དོན་གལ་ཆེན་པོ་ཞིག་ཏུའང་གྱུར་ཡོད།

ད་ལྟའི་ཆར་ཕྱི་རྒྱལ་ཡུལ་གྲུ་ཁག་ཏུ་བསྐྱོད་མཁན་གྱི་བོད་མི་ཕལ་ཆེ་བ་ལོ་ན་གཞོན་པ་འབའ་ཞིག་ཡིན་པ་དང། བཙན་བྱོལ་བོད་མི་གནས་སྡོད་བྱེད་ཡུལ་གཞིས་ཆགས་ཁག་ཏུ་འཚོ་སྡོད་བྱེད་མཁན་ན་གཞོན་ཉུང་ནས་ཉུང་དུ་འགྲོ་བཞིན་ཡོད། དཔེར་ན་བཞུགས་སྒར་དྷ་རམ་ས་ལར་མཚོན་ན་སྐྱིད་སྡུག་ཁག་ཧ་ཅང་མང་བ་དང། སྔོན་མ་ཡིན་ན་སྐྱིད་སྡུག་དེ་དག་སོ་སོར་ཡུལ་ལུང་སོ་སོའི་གཞས་དང་ཞབས་བྲོ་འཁྲབ་མཁན་གྱི་མི་སྣ་མང་པོ་ཡོད་པ་དང། འཁྲབ་ཆས་ཆ་ཚང་གྲ་སྒྲིག་བྱས་ཡོད་ཀྱང་ད་ལྟ་ནས་འཁྲབ་མཁན་མ་རྙེད་པར་འཁྲབ་ཆས་དག་བེད་མེད་དུ་འགྱུར་བཞིན་ཡོད། མ་འོངས་པར་ཕྱི་ལོ་༢༠༢༠ སྐབས་སུ་དེ་བས་ཀྱང་རྒྱ་བལ་འབྲུག་གསུམ་ཁུལ་དུ་གནས་སྡོད་བཙན་བྱོལ་བོད་པའི་སྤྱི་ཚོགས་ཀྱི་སློབ་གྲྭ་ཁག་དང། དགོན་སྡེ་ཁག་གི་གནས་སྟངས་ག་འདྲ་ཞིག་ཏུ་འགྱུར་རྒྱུ་ཡིན་མིན་དེ་ཡང་རོབ་ཙམ་སྔོན་དཔག་བྱེད་ཐུབ་པ་དང། ནུབ་ཕྱོགས་ཀྱི་ཡུལ་གྲུ་ཁག་ཏུ་བོད་པའི་ཆོས་དང་རིག་གནས་རྒྱུད་འཛིན་བྱེད་ཐུབ་པའི་སྒྲིག་འཛུགས་དང་ལྟེ་གནས་ཤིག་ཆགས་རྒྱུར་ཕལ་ཆེར་རེ་བ་མེད་པ་ལྟ་བུར་གྱུར་ཡོད།

བཙན་བྱོལ་བོད་པའི་སྤྱི་ཚོགས་ཀྱི་རིག་གནས་དང་གོམས་གཤིས་དག་ཀྱང་གཞན་དུ་འགྱུར་སྲིད་པ་དང། རྒྱ་བལ་འབྲུག་གསུམ་དུ་སྡོད་མཁན་དག་ཀྱང་སྔ་འཕྱི་ཙམ་མ་གཏོགས་རིམ་པས་སྤྱི་ཚོགས་དེ་དག་གི་ནང་དུ་སིམ་འགྲོ་ངེས་རེད། ནུབ་ཕྱོགས་ཀྱི་ཡུལ་གྲུ་ཁག་ལ་མཚོན་ན་དེ་དག་དང་ཡང་བསྡུར་ཐབས་མེད་པར། ཡུལ་ལུང་དེ་དག་ཏུ་སྐྱེས་པ་དང་ཡུལ་ལུང་དེ་དག་ཏུ་འཚར་ལོང་བྱུང་བ་རྣམས་དུས་ཡུན་རིང་པོ་མི་དགོས་པར་བོད་པའི་བསམ་བློ་མེད་པ་དང། བོད་པའི་རིག་གཞུང་མི་ཤེས་པ། བོད་པའི་གོམས་གཤིས་མེད་པ་འབའ་ཞིག་ཏུ་འགྱུར་རྒྱུ་ཡིན་པ་དེ་བཤད་མི་དགོས་པ་ཞིག་རེད། བོད་པའི་རིག་གཞུང་ཞེས་པ་གཞས་སྣ་འཁྲབ་སྟོན་ཙམ་དང། ཕྱུ་པ་གྱོན་པ་ཙམ་ལ་ངོས་འཛིན་མཁན་དག་གི་ངོས་ནས་བཤད་ན། གནད་དོན་དེ་ལས་སླ་པོའི་གྲས་ཤིག་ཡིན་ནའང། དེ་ཙམ་ཡང་རྒྱུན་རིང་པོར་གནས་ཐུབ་མིན་ཐག་བཅད་ནས་བཤད་རྒྱུ་ཧ་ཅང་དཀའ་ལས་ཁག་པོ་རེད། དེར་བརྟེན་ད་ལྟ་བཙན་བྱོལ་བོད་པའི་སྤྱི་ཚོགས་ནང་རྒྱ་ཆེ་ས་ནས་མི་རིགས་ཀྱི་ངོ་བོ་བརླག་རྒྱུའི་ཉེན་ཁ་ཆེན་པོ་ཡོད་ཀྱང། གང་ཟག་སྒེར་སོ་སོའི་ལྟོ་གོས་ཀྱི་ཐོག་ནས་ཁེ་ཕན་ཆེན་པོ་ཡོད་པའང་བཤད་མི་དགོས་པ་རེད།

ད་ལྟའི་གནད་དོན་འདི་དག་ནོར་འདུག་ཅེས་བཤད་དཀའ་བ་དང། ཁག་ཅིག་གིས་བོད་རྒྱ་མཉམ་གནས་དགོས་པའི་རྒྱུ་མཚན་གཙོ་བོ་གཅིག་དཔལ་འབྱོར་ཡར་རྒྱས་འགྲོ་བ་དེ་དྲངས་ཡོད་པ་དང། བོད་པ་མང་ཆེ་བའི་བསམ་བློའི་ནང་དུ་གནད་དོན་དེ་གལ་ཆེ་ཤོས་སུ་གྱུར་ཟིན་པའི་སྐབས་སུ་དེ་ལས་ལྡོག་ནས་བཤད་ཀྱང་ངོས་འཛིན་ཐོབ་དཀའ་བ་ནི་བཤད་མི་དགོས་པ་རེད། གལ་སྲིད་བོད་མི་རིགས་ཀྱི་སེམས་ནང་དུ་རྒྱལ་ཁབ་ཀྱི་བདག་དབང་དང། མི་རིགས་ཀྱི་རང་དབང་སླར་གསོ། བོད་པའི་ཆོས་དང་རིག་གནས་རྒྱུན་འཛིན་གྱི་བསམ་བློ་དེ་རྡོ་ལ་བརྐོས་པའི་རི་མོ་བཞིན་དུ་འགྱུར་བའི་དུས་ཤིག་ཤར་སྲིད་ན། སྐབས་དེ་དུས་ད་ལྟའི་བསམ་བློ་དང་བྱེད་སྟངས་དེ་ནོར་ཡོད་མེད་ར་སྤྲོད་ཡོང་ངེས་རེད། སྤྱིར་འཇིག་རྟེན་མི་ཞིག་གི་ངོས་ནས་བཤད་ན་སྤྱི་པའི་རྩ་དོན་དང། གང་ཟག་སྒེར་དོན་གཉིས་ཀྱི་ནང་ནས་གལ་ཆེ་ཤོས་གང་ཡིན་མིན་དབྱེ་འབྱེད་བྱེད་རྒྱུ་དེ་གང་ཟག་སོ་སོའི་རིན་ཐང་གི་ལྟ་བའི་ཁྱད་པར་ཁོ་ན་ལ་རག་ལས་ཡོད།།