བལ་ཡུལ་དུ་རྩ་ཁྲིམས་གསར་པར་ངོ་རྒོལ་ཁྲོད་ཉེན་རྟོག་པ་༧ བསད་པ།

ཟླ་འདིའི་ཚེས་༢༤ ཉིན་གྱི་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། རེས་གཟའ་ཟླ་བ་ཕྱི་ཚེས་༢༣ ཉིན་བལ་ཡུལ་ནུབ་ཕྱོགས་ཀྱི་ཀའི་ལ་ལི(Kailali)རྫོང་གི་ས་ཁུལ་དུ། བལ་ཡུལ་ཐ་རུ་མི་རིགས་སྟོང་ཕྲག་མང་པོས་གཞུང་གི་རྩ་ཁྲིམས་གསར་པའི་ཟིན་བྲིས་ལ་ངོ་རྒོལ་ཁྲོམ་སྐོར་བྱེད་སྐབས། ཉེན་རྟོག་པ་དང་འཐབ་འཛིང་ཤོར་ཏེ། ཉེན་རྟོག་པ་བདུན་དང་ཕྲུ་གུ་ཞིག་བསད་ཡོད་པ་རེད།
དེ་བཞིན་བལ་ཡུལ་དུས་བབ་ཀྱིས་ཉེན་རྟོག་པ་༢༡ དང་ངོ་རྒོལ་བ་༢༩ བཅས་མི་གྲངས་༥༠ ཙམ་ལ་རྨས་སྐྱོན་བྱུང་ཏེ་སྨན་ཁང་དུ་ཡོད་མུས་ཡིན་སྐོར་བཀོད་འདུག

བལ་ཡུལ་གྲོས་ཚོགས་ནང་དུ་རྩ་ཁྲིམས་ཟིན་བྲིས་གསར་པ་ཞིག་གི་ཐོག་ལ་གྲོས་མོལ་བྱེད་བཞིན་ཡོད་པའི་ནང་དུ། བལ་ཡུལ་དེ་ཞིང་ཆེན་བདུན་ལ་བགོ་རྒྱུ་ཡིན་པ་གསལ་ཡོད་པ་དང། གྲངས་ཉུང་མི་རིགས་ཐ་རུ་སོགས་ཀྱིས་གལ་ཏེ་དེ་ལྟར་བྱས་ཚེ། ཁོང་ཚོར་མི་རིགས་དབྱེ་འབྱེད་ལས་ཐོབ་ཐང་ཚད་ལྡན་ཐོབ་མི་སྲིད་པས། ཁོ་ཚོར་ཞིང་ཆེན་ལོགས་སུ་དགོས་པའི་དགོས་འདུན་འདོན་བཞིན་ཡོད་འདུག
བལ་ཡུལ་ནང་སྲིད་བློན་ཆེན་གཱོ་ཏམ་(Gautam)གྱིས་ངོ་རྒོལ་བ་ཚོས་ཉེན་རྟོག་པའི་མཐའ་བསྐོར་ཏེ། གྲི་དང་སྟ་རེ་སོགས་ཀྱིས་གཞུས་ཡོད་པ་དང། ཉེན་རྟོག་པ་ཞིག་གསོན་པོར་མེར་སྲེག་བཏང་འདུག་པས། ཁོ་ཚོས་སྔོན་ནས་དེ་ལྟར་བྱེད་རྒྱུའི་གྲ་སྒྲིག་བྱས་ཡོད་པར་ངོས་འཛིན་ཡོད། ས་ཁུལ་དེར་དམག་མི་བཏང་ནས་ལྷིང་འཇགས་བཟོ་རྒྱུ་ཡིན་སྐོར་འགྲེལ་བརྗོད་བྱས་འདུག

རྩ་ཁྲིམས་ཟིན་བྲིས་དེ་ནི་ཕྱི་ལོ་༢༠༠༨ ལོར་མའོ་ངོ་རྒོལ་གྱེན་ལོག་ཚོགས་པས། བལ་ཡུལ་གྱི་རྒྱལ་པོའི་རིང་ལུགས་མགོ་རྟིང་སློག་པའི་རྗེས་ནས་བཟུང་ཉམས་ཞིབ་བྱས་ཏེ། ཉེ་བའི་ཆར་གྲོས་ཚོགས་ནང་དུ་གྲོས་འཆར་བཏོན་པ་ཞིག་ཡིན་འདུག
བལ་ཡུལ་དུས་བབ་ཀྱིས་ཕྱི་ཚེས་༢༥ ཉིན་ལ། རྫོང་དེའི་བལ་ཡུལ་ནུབ་ཕྱོགས་གཅིག་སྒྲིལ་ཞེས་པའི་ཚོགས་པའི་རྒྱབ་སྐྱོར་བ་ཚོས། ཐ་རུ་མི་རིགས་ཀྱི་འགོ་ཁྲིད་ཚོར་བདག་དབང་ཡོད་པའི་ཁང་པ་སོགས་མེར་སྲེག་བཏང་ཡོད་པའི་གནས་ཚུལ་དང། ཐ་རུ་མི་རིགས་ཀྱི་འགོ་ཁྲིད་ཚོས་ཉེན་རྟོག་པ་གསོད་མཁན་མའོ་རིང་ལུགས་ཀྱི་ཚོགས་མི་ཡིན་པ་ལས། ཁོ་ཚོའི་མི་མ་ཡིན་པ་གསལ་བཤད་བྱས་ཡོད་འདུག །
སྐལ་བཟང་དོན་གྲུབ་ཀྱིས་སྒྱུར་སྒྲིག་བྱས།