བསམ་བློ་དང་སེམས་ཁམས་བདེ་ཐང་སྐོར་གྱི་འདུ་འཛོམས།

ཟླ་འདིའི་ཚེས་༨ ཉིན་གྱི་ཞོགས་པ་དྷ་ས་བོད་ཀྱི་མགྲོོན་ཁང་དུ་བོད་ཀྱི་སེམས་ཁམས་རིག་པའི་ཚོགས་པ་དང་། བོད་གཞུང་འཕྲོད་བསྟེན་ལས་ཁུངས་གཉིས་ཀྱི་གོ་སྒྲིག་འོག བསམ་བློ་དང་སེམས་ཁམས་བདེ་ཐང་ཞེས་པའི་བརྗོད་གཞིའི་ཐོག་སློབ་གཉེར་འདུ་འཛོམས་ཤིག་འཚོག་གི་འདུག

འདུ་འཛོམས་དེའི་དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་དང་། ཟུང་དྲུང་བསྟན་འཛིན་ཀུན་བཟང་། གཞན་ཡང་བོད་མི་མང་སྤྱི་འཐུས་གསུམ་དང་། ཚོགས་བཅར་བ་བཅས་མཉམ་ཞུགས་བྱས་སོང་། ཐེངས་འདིའི་སློབ་གཉེར་འདུ་འཛོམས་གོ་སྒྲིག་ཚོགས་ཆུང་གི་ཚོགས་མི་དང་སེམས་ཁམས་རིག་པའི་སློབ་གཉེར་བ་བསྟན་འཛིན་གྲགས་པས་ལས་རིམ་ངོ་སྤྲོད་བྱེད་སྐབས། ང་ཚོའི་སྤྱི་ཚོགས་ཀྱི་ནང་དུ་སེམས་ལ་དཀའ་ངལ་ཡོད་མཁན་མཆིས་ཀྱང་སྤྱི་ཚོགས་ཀྱི་ཁྲོད་དུ་དེ་ལ་ཞིབ་འཇུག་དང་སེམས་ཁམས་འཕྲོད་བསྟེན་ཐོག་སློབ་སྦྱོང་བྱེད་མཁན་མང་པོ་མེད་པས་ང་ཚོའི་སྤྱི་ཚོགས་ཁྲོད་དུ་སེམས་ཁམས་དཀའ་ངལ་ཅན་ཡོད་པ་མ་རེད་ཟེར་བའི་སྐད་ཆ་དེ་ཡོང་གི་ཡོད་སྐོར་དང་། སེམས་ཁམས་དཀའ་ངལ་ཅན་མེད་པ་མིན་ནའང་། སྤྱི་ཚོགས་ཀྱི་མདུན་དུ་ཐོན་ནས་སེམས་ཀྱི་དཀའ་ངལ་བཤད་མཁན་ཞིག་ཡོད་ན་ཡང་དེ་ལ་ལྟ་སྟངས་ལེགས་པོ་མེད་པའི་དཀའ་ངལ་ཡང་ཡོང་གི་ཡོད་པས། དཀའ་ངལ་དེ་དག་སེལ་ཆེད་དུ་དེ་རིང་གི་སློབ་གཉེར་འདུ་འཛོམས་འདི་གོ་སྒྲིག་བྱས་པ་ཞིག་ཡིན་སྐོར་འགྲེལ་བརྗོད་གནང་སོང་།

སྐུ་མགྲོན་གཙོ་བོ་དཔལ་ལྡན་དོན་གྲུབ་ཀྱིས་སེམས་ཀྱི་དཀའ་ངལ་དག་ནི་རྒྱུ་དང་རྐྱེན་སྣ་ཚོགས་ཤིག་ལ་བརྟེན་ནས་ཡོང་གི་ཡོད་པ་དང་། སྔོན་མའི་དུས་སུ་སེམས་ཁམས་ཀྱི་དཀའ་ངལ་ཟེར་དུས་ཆུང་ཆུང་ཞིག་ཏུ་བརྩི་སྲོལ་ཡོད་ཅིང་། གང་ཟག་དེ་དང་དེ་ནི་སྨྱོན་པ་རེད་ཟེར་ནས་སྤྱི་ཚོགས་ནང་འཕྱ་སྨོད་དང་མཐོང་ཆུང་བྱེད་ས་ཞིག་མ་གཏོགས། དེ་ལ་མཉམ་རུབ་ཀྱིས་ལམ་སྟོན་དང་སྨན་བཅོས་བྱས་ནས་དྲགས་ཐབས་བྱེད་པའི་ལུགས་ཤིག་མེད་ན་ཡང་། ༢༠༡༩ ལོ་ནས་འཕྲོད་བསྟེན་ལས་ཁུངས་ཀྱིས་ལུས་དང་སེམས་གཉིས་ཀའི་འཕྲོད་བསྟེན་ཐོག་འབད་བརྩོན་བྱེད་ཀྱི་ཡོད་པའི་སྐོར་དང་། དེ་བཞིན་ཁོང་གིས་ཉེ་བའི་ཆར་ཞིབ་འཇུག་གི་སྙན་ཐོའི་ནང་དུ་སྔོན་མ་རྒྱུ་དང་དཔལ་འབྱོར་མེད་པའི་ཉམས་ཐག་གི་ཁ་གྲངས་ལས་སེམས་ཁམས་མི་བདེ་བའི་གྲངས་འབོར་མང་བ་བསླེབས་བཞིན་ཡོད་པ་དང་། དེ་ཡང་གཙོ་བོ་ད་ལྟའི་ཆར་ཆབ་སྲིད་དང་འཕྲུལ་རིག་གི་འཁྲུག་ཆ་དོད་པོ་དང། ཤེས་ཡོན་དང་དཔལ་འབྱོར་གྱི་འགྲན་སྡུར་བཅས་ལས་ཡོང་གི་ཡོད་པར་འགྲེལ་བརྗོད་གནང་སོང་།