བསྟན་འཛིན་འཛོམས་སྐྱིད་ལ་སྦེལ་ཇེམ་གྱི་མཛངས་མ་ཆེན་མོའི་རྒྱལ་ཁ་ཐོབ་འདུག 

ཟླ་༩ པའི་ཚེས་༡༨ ཉིན་ཡུ་རོབ་སྦེལ་ཇེམ་དུ་ཕྱི་ལོ་༢༠༢༡ ལོའི་སྦེལ་ཇེམ་གྱི་མཛངས་མ་ཆེན་མོ་(Miss Grand Belgium) ཞེས་པ་དེའི་རྟིང་རྩོད་འགྲན་སྡུར་བྱས་འདུག་པ་དང་། མཐའ་མའི་གྲུབ་དོན་དུ་རྒྱལ་ཁའི་དབུ་རྒྱན་དེ་བོད་མི་བསྟན་འཛིན་འཛོམས་སྐྱིད་ལ་ཐོབ་འདུག 

སྤྱི་ཚོགས་དྲ་ལམ་ཁག་ཏུ་ཁོང་ལ་དགའ་བསུ་ཞུ་མཁན་བོད་མི་མང་པོ་ཞིག་འདུག་པ་དང་། ཁོང་གིས་སྤྱི་ཚོགས་དྲ་ལམ་ཨན་སི་ཌ་གྷེ་རམ་ཐོག་ཏུ་གསལ་བསྒྲགས་ཤིག་སྤེལ་འདུག དེའི་ནང་ཁོང་གིས་ཐེངས་འདིར་དབུ་རྒྱན་ཐོབ་པ་འདི་ནི་ཁོང་ལ་རྒྱབ་སྐྱོར་བྱེད་མཁན་ཚོའི་རྒྱབ་སྐྱོར་དང་སྐུལ་མ་ལ་བརྟེན་ནས་ཐོབ་པ་ཡིན་པ། ཐེངས་འདིར་མཛངས་མའི་དབུ་རྒྱན་ཐོབ་པ་ལས་ལྷག་པ་ཞིག་ལ། ཁྱེད་རྣམ་པའི་ཡིད་ཆེས་ཐོབ་པ་དང་རང་ཉིད་ཀྱི་ཕུགས་བསམ་ལ་ཡིིད་ཆེས་ཐོབ་ཡོད་སྐོར་བརྗོད་འདུག 

དེ་བཞིན་ཁོང་གིས་རང་ལོ་༡༥ ནས་བཟུང་མཛངས་མའི་འགྲན་སྡུར་ནང་མཉམ་ཞུགས་བྱེད་ནས་ཡོང་བ་ཞིག་ཡིན་པ་དང་། དུས་སྐབས་དེ་དག་རིང་རྒྱལ་ཁ་ལས་ཕམ་ཁ་མང་བ་མྱངས་ཡོད་ཀྱང་། ཡིད་ཆེས་དང་གདེང་ཚོད་མ་བརླག་པར་མདུན་བསྐྱོད་བྱས་ཡོད་པས། ཐེངས་འདིའི་རྒྱལ་ཁ་དེ་ནི་ལོ་ལྔ་ཡི་རིང་དཀའ་ལས་བརྒྱབ་པའི་འབྲས་བུ་ཡིན་སྐོར་བརྗོད་འདུག 

ཕྱི་ལོ་༢༠༡༧ ལོའི་ཟླ་༤ པའི་ནང་སྦེལ་ཇེམ་གྱི་བུད་མེད་སྒེག་ཉམས་ངོམ་སྟོན་རྩེ་ཕུད་(Belgium Top Model) འགྲན་སྡུར་གྱི་སྔོན་འགྲོ་སྐབས་སུ་བུད་མེད་༤༠༠ ཡོད་པའི་ཁྲོད། བུད་མེད་༦༥ ཞིག་དངོས་གཞིའི་མཐའ་མའི་འགྲན་སྡུར་ཆེད་འདེམས་སྒྲུག་བྱས་ཡོད་པ་དང་། དེའི་ནང་བསྟན་འཛིན་འཛོམས་སྐྱིད་ཚུད་ཡོད་པ་རེད། མོ་རང་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་གཞིས་སྒར་ནས་ཡིན་པ་དང་། དེང་གི་ཆར་སྦེལ་ཇེམ་དུ་གནས་སྡོད་བྱེད་ཀྱི་ཡོད་པ་རེད། 

སྤྱིར་བཏང་མཛངས་མ་ཆེན་མོ་ཞེས་པའི་འགྲན་སྡུར་དེ་ནི་རྒྱལ་སྤྱིའི་མཛངས་མ་ཆེན་མོ་(Miss Grand International) ཞེས་པའི་ཆ་ཤས་ཡིན་འདུག་པ་དང་། རྒྱལ་ཁབ་སོ་སོའི་མཛངས་མ་ཆེན་མོའི་འགྲན་སྡུར་གྱི་རྒྱལ་ཁ་ཐོབ་མཁན་རྣམས་རྒྱལ་སྤྱིའི་འགྲན་སྡུར་དུ་རྒྱལ་ཁབ་ཀྱི་ངོ་ཚབ་བྱས་ཏེ་མཉམ་ཞུགས་བྱེད་ཆོག་གི་ཡོད་འདུག འགྲན་སྡུར་དེ་ནི་ཐོག་མར་ཕྱི་ལོ་༢༠༡༣ ལོར་ཐའེ་ལན་ཌ་ནས་འགོ་བཙུགས་འདུག་པ་དང་། ཕྱི་ལོ་༢༠༢༡ ལོའི་རྒྱལ་སྤྱིའི་མཛངས་མ་ཆེན་མོའི་འགྲན་སྡུར་དེ་ཟླ་༡༢ པའི་ཐའེ་ལན་ཌའི་གྲགས་ཆེ་བའི་གླིང་ཕྲན་ཧྥུ་ཀེ་ཌ་ལ་གོ་སྒྲིག་བྱེད་འཆར་ཡོད་པ་རེད་འདུག །

གསར་འགོད་པ་སྐལ་བཟང་དོན་གྲུབ།