བུད་མེད་རྩོམ་པ་པོ་ཚེ་རིང་དབྱངས་འཛོམས་ལ་༢༠༢༣ ལོའི་རྟོག་སྒྲུང་གི་བྱ་དགའ་ཐོབ་འདུག
ཉེ་ཆར་(Great Lakes Colleges Association) གྱིས་དྲྭ་ཐོག་ཏུ་ཕྱི་ལོ་༢༠༢༣ ལོ་སྙན་ངག་དང་རྟོག་སྒྲུང་སོགས་ཀྱི་བྱ་དགའ་ཐོབ་མཁན་སུ་དང་སུ་ཡིན་པའི་གསལ་བསྒྲགས་ཤིག་སྤེལ་ཡོད་པ་དང་། གསལ་བསྒྲགས་དེའི་ནང་གསལ་ལྟར་ན། ཕྱི་ལོ་༢༠༢༣ ལོའི་རྟོག་སྒྲུང་གི་བྱ་དགའ་ཐོབ་མཁན་ནི་བོད་ཀྱི་བུད་མེད་རྩོམ་པ་པོ་ཚེ་རིང་དབྱངས་འཛོམས་ལ་ཡིན་པ་དང་། ཁོང་གིས་དབྱིན་ཡིག་ཐོག་ཏུ་རྟོག་སྒྲུང་(We Measure the Earth with Our Bodies) ཞེས་པ་ཞིག་བརྩམས་ནས་(Bloomsbury) ཞེས་པའི་པར་སྐྲུན་ཁང་གིས་པར་སྐྲུན་བྱས་ཡོད་འདུག
རྟོག་སྒྲུང་དེའི་བརྗོད་བྱ་ནི་ཕྱི་ལོ་༡༩༥༩ ལོར་རྒྱ་ནག་གིས་བོད་ལ་བཙན་འཛུལ་བྱས་པའི་སྐབས་སུ། ལྷ་མོ་དང་ཁོང་གི་སྲིང་མོ་བསྟན་སྐྱིད་གཉིས་བལ་ཡུལ་གྱི་ས་མཚམས་སུ་བྲོས་ཐར་ཡོད་པ་དང་། ཨ་མ་གྲོངས་བ་དང་ཕ་ཡུལ་ཤོར་བའི་དཀའ་སྡུག་འོག་ཏུ་ཚུད་པའི་སྐབས་སུ། བསམ་འཕེལ་ཞེས་པའི་གཞོན་པ་ཞིག་གི་ཨ་ཁུས་རྒྱུན་རིང་ནས་མི་ཚོས་བར་བརླག་སོང་ཡོད་པ་ངོས་འཛིན་བྱེད་བཞིན་པའི་མིང་མེད་པའི་ལྷ་སྐུ་རྙིང་པ་ཞིག་འཁྱེར་ནས་ཡོང་སྐབས་རེ་བ་གསར་པ་ཞིག་སླེབས་པ། ལོ་བཅུ་ཕྲག་ཁ་ཤས་རྗེས་ཁོ་ཚོ་ཁེ་ན་ཌར་གནས་སྡོད་བྱེད་བཞིན་པའི་སྐབས་སུ། ལྷ་མོའི་བུ་མོ་སྒྲོལ་མ་ཡིས་བོད་རིག་པ་ཞིག་ཆགས་ཐབས་བྱེད་བཞིན་པ་དང་། མོས་ལྷ་སྐུ་རྙིང་པ་དེ་ཅ་དངོས་རྙིང་པ་མཁོ་སྒྲུབ་བྱེད་མཁན་ཞིག་གི་མཛོད་ནང་དུ་མཐོང་སྐབས། རང་གི་ཕུགས་བསམ་ལ་ཉེན་ཁ་ཡོད་ཀྱང་། མི་རིགས་ཀྱི་ཆེད་དུ་ག་རེ་བྱེད་འདོད་ཡོད་མེད་ཐག་གཅོད་བྱེད་དགོས་པ་ཆགས་པ་སོགས་སྐོར་ཡིན་འདུག
གཞན་ཡང་། ཕྱི་ལོ་༢༠༢༢ ལོ་ཁེ་ན་ཌའི་རྩོམ་རིག་བྱ་དགའ་གྷི་ལེར་(Giller Prize)གྱི་ཚོགས་ཆུང་ནས་གསལ་བསྒྲགས་སྤེལ་བའི་ནང་། ལོ་དེའི་བྱ་དགའ་ཆེད་དུ་འགྲན་ཞུགས་བྱེད་མཁན་ཐོག་མར་རྩོམ་དེབ་གྲངས་༡༣༨ བྱུང་ཡོད་པ་དང་། དེ་དག་གི་ཁྲོད་ནས་རྩོམ་དེབ་ཡག་ཤོས་༡༤ འདེམས་སྒྲུག་བྱས་འདུག དེའི་རྗེས་སུ་མཐའ་མའི་འོས་མིར་དེབ་༥ འདེམས་སྒྲུག་བྱས་ཤིང་། ཨང་དང་པོ་སོན་མཁན་ལ་ཨ་སྒོར་འབུམ་གཅིག་དང་། མཐའ་མའི་འོས་མི་ལྔ་ནང་སླེབས་མཁན་རྩོམ་པ་པོ་གཞན་རྣམས་ལ་ཨ་སྒོར་ཁྲི་གཅིག་རེ་ཐོབ་ཡོད་འདུག མཐའ་མའི་འོས་མི་ལྔ་ཡི་ནང་དུ་བོད་པའི་བུད་མེད་རྩོམ་པ་པོ་ཚེ་རིང་དབྱངས་འཛོམས་བདམས་ཐོན་བྱུང་འདུག ཁོང་གིས་དབྱིན་ཡིག་ཐོག་ང་ཚོས་ལུས་ཀྱིས་ས་ཁྱོན་འཇལ་(We Measure the Earth with Our Bodies) ཞེས་པ་དེ་བརྩམས་ཡོད་འདུག དེ་ཡང་སྒྲུང་དེབ་དེ་ནི་ཁོང་གི་སྒྲུང་རིང་གྲས་པར་སྐྲུན་བྱས་པ་ཐོག་མ་དེ་ཆགས་ཀྱི་ཡོད་འདུག་པས། རྩོམ་རིག་དུས་དེབ་(Publishers Weekly) ཞེས་པ་དེས་དོ་སྣང་བྱེད་དགོས་པའི་རྩོམ་པ་པོ་ཁག་གི་མིང་ཁོངས་སུ་ཚེ་རིང་དབྱང་འཛོམས་བཅུག་འདུག དེ་བཞིན་རྩོམ་རིག་དུས་དེབ་(The Millions) ཞེས་པ་དེས་ཁོང་གི་སྒྲུང་དེབ་འདི་ནི་འདི་ལོར་ངང་སྒུག་ཆེ་ཤོས་བྱེད་པའི་དེབ་གཅིག་ཡིན་སྐོར་བརྗོད་ནས་བསྟོད་བསྔགས་ཆེན་པོ་ཐོབ་བཞིན་འདུག ཁོང་གི་སྒྲུང་དེབ་དེ་དངོས་སུ་ཁྲོམ་རར་ཕྱི་ལོ་༢༠༢༢་ཟླ་༥ པའི་ཚེས་༡༧ ཉིན་ཐོན་ཡོད་པ་དང་། རྒྱལ་སྤྱིའི་བརྒྱུད་ལམ་མང་པོ་ཞིག་གིས་བསྟོད་བསྔགས་ཐོབ་ཡོད་པ་དང་། བརྒྱུད་ལམ་ཁག་གིས་ངེས་པར་དུ་ཀློག་དགོས་པའི་སྒྲུང་དེབ་གི་གྲངས་ཐོའི་ནང་དུ་ཡང་ཚུད་ཡོད་པ་རེད་འདུག
རྩོམ་པ་པོ་ཚེ་རིང་དབྱངས་འཛོམས་ནི་བལ་ཡུལ་དུ་སྐྱེས་ནས་འཚར་ལོངས་བྱུང་བ་དང་། ཕྱིས་སུ་ཁེ་ན་ཌར་གནས་སྤོས་ཀྱིས་རྩོམ་རིག་དང་རྒྱལ་སྤྱིའི་འབྲེལ་ལམ་ཐོག་རབ་འབྱམས་པ་དང་། འབྱུང་རིག་ཐོག་གཙུག་ལག་རབ་འབྱམས་པ་ཐོན་འདུག
གསར་འགོད་པ། བློ་བཟང་རྒྱ་མཚོ།
