བོད་ཀྱི་གཞོན་ནུ་ལྷན་ཚོགས་ཀྱིས་“ཇི་སྲིད་བོད་རང་བཙན་བསྐྱར་གསོ་མ་ཐུབ་བར་དུ་”ལས་འགུལ་སྤེལ་མཚམས་འཇོག་གི་མིན་སྐོར་གསུངས་སོང་། 

བོད་ཀྱི་གཞུང་འབྲེལ་མ་ཡིན་པའི་ཚོགས་པ་ཆེ་ཤོས་ཏེ། བོད་ཀྱི་གཞོན་ནུ་ལྷན་ཚོགས་དབུ་བརྙེས་ནས་ལོ་ངོ་ ༥༠ འཁོར་བའི་དུས་དྲན་གྱི་གཞུང་འབྲེལ་མཛད་སྒོའི་ཐོག ཚོགས་གཙོ་མགོན་པོ་དོན་གྲུབ་ཀྱིས་“བོད་ཀྱི་གཞོན་ནུ་ལྷན་ཚོགས་ཀྱི་སྒྲིག་འཛུགས་འདི་མི་རིགས་ཀྱི་འཐབ་རྩོད་བྱེད་མཁན་དང་། རང་དབང་རང་བཙན་སླར་གསོ་བྱེད་མཁན་གྱི་སྒྲིག་འཛུགས་ཤིག་ཆགས་ཡོད་རེད། ཇི་སྲིད་བར་དུ་བོད་དོན་བདེན་མཐའ་མ་གསལ་བར་དུ། ཇི་སྲིད་རང་བཙན་བསྐྱར་གསོ་མ་ཐུབ་བར་དུ། དེ་སྲིད་བར་དུ་བོད་ཀྱི་གཞོན་ནུ་ལྷན་ཚོགས་ཀྱིས་ད་ལྟ་ནང་བཞིན་ཚགས་ཚུད་པོའི་ཐོག་ནས་དགྲ་བོ་ལ་ཁ་གཏད་བཅག་ནས་ལས་འགུལ་སྤེལ་རྒྱུ་ཡིན་”ཞེས་བསྒྲགས་སོང་། 

དེ་རིང་སྔ་དྲོར་དྷ་ས་ནོར་གླིང་གི་ཉེ་འཁོར་དུ་ཆགས་པའི་ཨེམ་ཕེ་རིལ་གསོལ་མགྲོན་ཁང་( Imperial Heights Clark Inn) དུ་བོད་ཀྱི་གཞོན་ནུ་ལྷན་ཚོགས་དབུ་བརྙེས་ནས་ལོ་ངོ་ ༥༠ འཁོར་བུའི་གཞུང་འབྲེལ་མཛད་སྒོ་རྒྱས་པ་དེ་འཚོགས་སོང་བ་དང་། མཛད་སྒོའི་ཐོག་གཞོན་ནུ་ལྷན་ཚོགས་ཐོག་མར་དབུ་འཛུགས་གནང་མཁན་དང་། གཞོན་ལྷན་གྱི་ཚོགས་གཙོ་ཐོག་མ་བཀྲས་མཐོང་བསྟན་འཛིན་དགེ་བྱེད་ཕེབས་འདུག་དང་། དམིགས་བསལ་སྐུ་མགྲོན་དུ་རྒྱ་གར་དབུས་གྲོས་ཚོགས་འཐུས་མི་ཁོའུ་ཤན-ཁོ་པོར་ (Kishan Kapoor) དང་། ཧིན་བོད་མཛའ་འབྲེལ་ཚོགས་པའི་ཚོགས་གཙོ་ཨ་ཇེ་ཁོའུ་མར་(Ajit Kumar Nehria) སོགས་ཕེབས་འདུག 

སྤྱིར་ཡིན་ན། གཞོན་ནུ་ལྷན་ཚོགས་དབུ་བརྙེས་ནས་ལོ་ངོ་ ༥༠ ན་ནིང་འཁོར་ན་ཡང་། སྐབས་དེར་“རྒྱ་ནད་ཏོག་དབྱིབས་རིམས་ནད་”ཀྱི་དབང་གིས་མི་མང་འདུ་འཛོམས་བྱེད་དཀའ་བར་བརྟེན། དུས་དྲན་གྱི་གཞུང་འབྲེལ་མཛད་སྒོ་རྒྱས་པ་དེ་ལོ་གཅིག་ལ་ཕར་འགྱངས་བྱས་དེ་དེ་རིང་གཞོན་ལྷན་གྱི་འགན་འཛིན་ལྷན་ཚོགས་ཐེངས་ ༥༠ པ་སྟབས་བསྟུན་ནས་འཚོགས་སོང་། 

དུས་དྲན་གྱི་མཛད་སྒོའི་ཐོག སྐུ་མགྲོན་གཙོ་བོ་བཀྲས་མཐོང་བསྟན་འཛིན་དགེ་བྱེད་ཀྱིས་ད་ལྟའི་བཙན་བྱོལ་ནང་གི་དཀའ་རྙོག་དེ་ངོ་ཚ་བོ་ཆགས་ཡོད་པ་དང་། རྒྱ་ནག་གི་སྟོབས་ཤུགས་ཤིན་ཏུ་ཆེན་པོ་ཡིན་ན་ཡང་། ཁོང་ལ་“རྒྱ་ཆེའི་བོད་མི་མང་། ལྷག་པར་དུ་བོད་ནང་གི་རྒྱ་ཆེའི་བོད་མི་མང་ལ་ཡིད་ཆེས་བརྟན་པོ་ཡོད་པས་”བོད་ཀྱི་བདེན་མཐའ་གསལ་ཐུབ་རྒྱུ་ཡིན་སྐོར་གསུངས་སོང་། 

དེ་བཞིན་ཁོང་གིས་“གཞོན་ནུ་ལྷན་ཚོགས་ལ་ཡིད་ཆེས་བརྟན་པོ་ཡོད། དེ་ཡང་ང་རང་སྔོན་མ་གཞོན་ནུ་ལྷན་ཚོགས་འཛུགས་མཁན་གྱི་གྲས་སུ་ཡོད་པས་དེ་ཞུས་པ་མིན། [དེར་]རྒྱུ་མཚན་ཡོད། དང་པོ་དེར་ང་ཚོ་སྲིད་དོན་གྱི་སྒྲིག་འཛུགས་—དངོས་གནས་བོད་ཕྱི་ནང་གཉིས་ལ། བོད་ནང་ལ་རང་དབང་ཡོད་མ་རེད།—བོད་ཀྱི་སྲིད་དོན་སྒྲིག་འཛུགས་ཆེ་ཤོས་དེ་རེད། དཔེ་གལ་ཆེན་པོ་རེད། ནུས་པ་དང་ལྡན་པ་ཡོད་རེད། དེ་བཞིན་ང་ཚོ་བོད་ཀྱི་གཞོན་ནུ་ལྷན་ཚོགས་ནང་ལ་ཚོགས་མི་ཡར་བསྡུ་དུས། ཆོལ་ཁ་དང་ཆོས་ལུགས་ཀྱི་དབྱེ་བ་ཡོད་མ་རེད། ཕལ་ཆེར་ང་ཚོས་སྲིད་དོན་གྱི་ལྟ་བའང་དབྱེ་བ་ཞེ་དྲག་ལྟ་གི་ཡོད་མ་རེད་བསམ་གྱི་འདུག ཆོལ་ཁ་ཆོས་ལུགས་ཀྱི་དབྱེ་བ་མེད་པ་དེ་གལ་ཆེན་པོ་མཐོང་གི་འདུག སྲིད་དོན་སྒྲིག་འཛུགས་ཆེ་ཤོས་རེད། ཆོལ་ཁ་དང་ཆོས་ལུགས་ཀྱི་དབྱེ་བ་མེད་དུས། ང་ཚོ་བཙན་བྱོལ་ལ་བོད་མི་རྣམས་འཐུན་པོ་དང་རྡོག་རྩ་ཆིག་སྒྲིལ་ཡོང་བ་ལ་དགེ་མཚན་དཔེ་ཆེན་པོ་ཡོད་རེད་བསམ་གྱི་འདུག་”ཅེས་གསུངས་པ་མ་ཟད། གཞོན་ནུ་ལྷན་ཚོགས་ཀྱི་ལས་དོན་སྒྲུབ་སྟངས་དེ་བོད་ཀྱི་མང་གཙོའི་ལམ་ལུགས་ཀྱི་མིག་དཔེ་ལྟ་ཆོག་པ་ཞིག་ཆགས་ཡོད་པ་དང་། བོད་ཀྱི་སྲིད་དོན་ཚོགས་པ་ཞིག་གི་དབུ་འབྱེད་ཀྱི་མཛད་སྒོའི་ཐོག་ལ་༧གོང་ས་མཆོག་གིས་དབུ་འབྱེད་ཀྱི་གསུང་བཤད་གནང་བ་གཞོན་ནུ་ལྷན་ཚོགས་མ་གཏོགས་ཕལ་ཆེར་མེད་སྐོར་སོགས་གསུངས་སོང་། 

རྒྱ་གར་དབུས་གྲོས་ཚོགས་འཐུས་མི་ཁོའུ་ཤན-ཁོ་པོར་(Kishan Kapoor) གྱི་གསུང་བཤད་ནང་། གཞོན་ནུས་སྲིད་སྐྱོང་གིས་མཚོན་པའི་དབུ་ཁྲིད་མང་པོ་ཞིག་སྐྱེད་སྲིང་བྱེད་བཞིན་ཡོད་པས། བོད་མིའི་སྒྲིག་འཛུགས་ཀྱི་མ་འོངས་པ་འོད་སྣང་གིས་ཕྱུག་པ་དང་། འཛམ་གླིང་ནང་དུ་སྒེར་གཅོད་པ་རིང་པོར་གནས་མི་ཐུབ་པར་འཇིག་གི་ཡོད་པ་དང་། རྒྱ་ནག་གི་སྒེར་གཅོད་པ་ཞི་ཅིན་ཕིང་གི་ལས་དབང་ཡང་དེ་ལས་འགྲོ་ས་མེད་པས། བོད་ཀྱི་རང་བཙན་སྐྱར་གསོ་བྱུང་བའི་ཉིན་མོ་ཞིག་ཡོང་ངེས་ཚུལ་སོགས་གསུངས་སོང་། ། 

གསར་འགོད་པ་དཀོན་མཆོག་རབ་བརྟན།