བོད་ཀྱི་གཞོན་ནུ་ལྷན་ཚོགས་ཀྱིས་རྒྱ་གཞུང་ལ་ངོ་རྒོལ་གྱི་རྐང་འཁོར་སྐོར་སྐྱོད་ལས་འགུལ་འགོ་བཙུགས་འདུག
ཟླ་འདིའི་ཚེས་༢༤ ་ཉིན་བོད་ཀྱི་གཞོན་ནུ་ལྷན་ཚོགས་ཀྱིས་དགྲ་བོ་རྒྱ་དམར་གཞུང་གིས་བོད་ནང་རིག་གཞུང་རྩ་མེད་གཏོང་མཚམས་འཇོག་དགོས་པ་དང་། རྒྱལ་སྤྱིའི་སྤྱི་ཚོགས་ཀྱིས་བོད་ནང་མི་སྤྱོད་ལས་འདས་པའི་རྒྱ་གཞུང་གི་བྱ་སྤྱོད་ལ་གནོན་ཤུགས་སྤྲོད་དགོས་པ་སོགས་དགོས་འདུན་དོན་ཚན་གསུམ་གྱི་ཐོག རྒྱ་གཞུང་ལ་ངོ་རྒོལ་གྱི་རྐང་འཁོར་སྐོར་སྐྱོད་ལས་འགུལ་ཞིག་རྒྱ་གར་བྱང་པྱོགས་བདེ་སྐྱིད་གླིང་ནས་འགོ་འཛུགས་གནང་འདུག
ཐེངས་འདིའི་ལས་འགུལ་ནང་རྒྱ་གར་བྱང་ཕྱོགས་ཁུལ་གྱི་ས་གནས་གཞོན་ནུའི་དང་བླང་ལས་འགུལ་བ་༥༠ ་ཙམ་མཉམ་ཞུགས་བྱས་ཡོད་འདུག་ལ། ཟླ་འདིའི་ཚེས་༢༤ ་ནས་ཕྱི་ཟླ་༡༠ ་ཚེས་༡ ་བར་རྒྱ་གར་བྱང་ཕྱོགས་བདེ་སྐྱིད་གླིང་ནས་རྒྱལ་ས་ལྡི་ལི་བར་རྐང་འཁོར་སྐོར་སྐྱོད་བྱེད་རྒྱུ་རེད་འདུག
ལས་འགུལ་གྱི་དམིགས་ཡུལ་དང་དགོས་འདུན་ནི། དགྲ་བོ་རྒྱ་དམར་སྲིད་གཞུང་ནས་བོད་ནང་རིག་གཞུང་རྩ་མེད་གཏོང་མཚམས་མྱུར་དུ་འཇོག་དགོས་པ། རྒྱ་གཞུང་ནས་བོད་ནང་མི་སྤྱོད་ལས་འདས་པའི་བྱ་ངན་སྣ་ཚོགས་སྤེལ་མུས་ཡིན་པར་རྒྱལ་སྤྱིའི་སྤྱི་ཚོགས་ནས་དུས་མཚམས་ཀྱི་གནོན་ཤུགས་དང་བོད་དོན་ལ་རྒྱབ་སྐྱོར་སྔར་ལྷག་གནང་སྐྱོང་ཡོང་བའི་འབོད་སྐུལ་ཞུ་རྒྱུ། རྒྱ་གར་གཞུང་དམངས་གཉིས་ནས་རྒྱ་གར་གྱི་བདེ་འཇགས་དང་ཞི་བདེ་སོགས་ལ་དམིགས་ཏེ་བོད་རང་བཙན་གྱི་བདེན་པའི་གནས་བབ་ལ་རྒྱབ་སྐྱོར་ཡོང་བའི་འབོད་སྐུལ་ཞུ་རྒྱུ་བཅས་ཆགས་ཡོད་འདུག
ཐེངས་འདིའི་ལས་འགུལ་དང་འབྲེལ་བོད་ཀྱི་གཞོན་ནུ་ལྷན་ཚོགས་ཀྱིས་གསར་འགོད་གསལ་བསྒྲགས་ཤིག་སྤེལ་བའི་ནང་། ལོ་འདིའི་ཕྱི་ཟླ་༡༠ ཚེས་༡ ་ཉིན་དགྲ་བོ་རྒྱ་དམར་གྱི་སྲིད་གཞུང་འགོ་བཙུགས་ནས་ལོ་ངོ་ཧྲིལ་པོ་༧༥ འཁོར་བའི་དུས་ཆེན་སྲུང་བརྩི་ལ་ངོ་རྒོལ་བྱ་རྒྱུ་ཡིན་ཞེས་དང་། རྐང་འཁོར་སྐོར་སྐྱོད་གྲུབ་མཚམས་སུ་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་གཙོས་འབྲེལ་ཡོད་སྡེ་ཚན་ཁག་ལ་བོད་ནང་གི་ཛ་དྲག་གནས་སྟངས་ལ་ཐུགས་སྣང་དང་རྒྱབ་སྐྱོར་ཡོང་བའི་འབོད་སྐུལ་ཞུ་སྙན་ཞིག་འབུལ་རྒྱུ་ཡིན་ཞེས་འཁོད་འདུག
གཞན་ཡང་། ད་ལྟའི་ཆར་འབྲི་ཆུའི་བཞུར་རྒྱུན་ལའང་ཆུ་རགས་གསར་རྒྱག་གི་ལས་གཞི་འདྲ་མིན་ཞིག་ལག་བསྟར་བྱེད་བཞིན་པ་དེས་བོད་མིའི་འཚོ་གནས་ལ་ཉེན་ཁ་སྤྲད་པ་ཙམ་མ་ཡིན་པར། འབྲི་ཆུའི་བཞུར་རྒྱུན་ལ་འཚོ་གནས་བྱེད་བཞིན་པའི་རྒྱལ་ཁབ་གཞན་ལ་ཡང་ཉེན་ཁ་གཅིག་མཚུངས་སྤྲད་དང་འཕྲད་ངེས་ཡིན་པས་འབྲེལ་ཡོད་རྒྱལ་ཁབ་གཞན་ཚོའི་ངོས་ནས་ཀྱང་བོད་ནང་གི་ཛ་དྲག་གནས་སྟངས་ལ་ཐུགས་སྣང་ཡོང་རྒྱུར་རེ་བ་ཞུ་བཞིན་ཡོད་པ་སོགས་འཁོད་འདུག
གསར་འགོད་པ། བློ་བཟང་རྒྱ་མཚོ།
