བོད་ཀྱི་གསོ་བ་རིག་པའི་ལྷན་ཚོགས་དབུ་བརྙེས་ནས་ལོ་༢༠ འཁོར་བ་དང་སྟབས་བསྟུན་ནས་དཔེ་དེབ་གཅིག་དབུ་འབྱེད་གནང་སོང་།
བོད་ཀྱི་གསོ་བ་རིག་པའི་ལྷན་ཚོགས་དབུ་བརྙེས་ནས་མི་ལོ་༢༠ འཁོར་བ་དང་སྟབས་བསྟུན་ནས་བོད་ཀྱི་གསོ་བ་རིག་པའི་ལྷན་ཚོགས་ཀྱི་ལོ་རྒྱུས་ཕྱོགས་བསྒྲིགས་ཀྱི་དཔེ་དེབ་གཅིག་དེ་རིང་རྡ་སར་ཡོད་པའི་བོད་ཀྱི་གསོལ་མགྲོན་ཁང་དུ་དབུ་འབྱེད་གནང་སོང་།
ཕྱི་ཚེས་༡༠ ཉིན་བོད་ཀྱི་གསོ་བ་རིག་པའི་ལྷན་ཚོགས་བཙུགས་ནས་ལོ་༢༠ འཁོར་བ་དང་སྟབས་བསྟུན་ནས་བོད་ཀྱི་གསོ་བ་རིག་པའི་ལྷན་ཚོགས་ཀྱི་ལོ་རྒྱུས་ཀྱི་དཔེ་དེབ་གཅིག་རྡ་སར་ཡོད་པའི་བོད་ཀྱི་གསོ་མགྲོན་ཁང་དུ་དབུ་འབྱེད་གནང་སོང་། ཐེངས་འདིའི་མཛད་སྒོ་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་སྐུ་མགྲོན་དུ་གདན་ཞུ་གནང་འདུག་ལ། དེ་བཞིན་བོད་ལུགས་ཀྱི་སྨན་པ་༤༠ ཡས་མས་ཤིག་ཀྱང་ཕེབས་གནང་འདུག སྐབས་དེ་དུས་བོད་ཀྱི་གསོ་བ་རིག་པའི་ལྷན་ཚོགས་ཀྱི་ཚོགས་གཙོ་སྨན་རམས་པ་དྲུང་འཚོ་ཚེ་རིང་ཐག་གཅོད་ཀྱིས་དེ་རིང་གི་དཔེ་དེབ་དེ་བོད་ཀྱི་གསོ་བ་རིག་པ་བཙུགས་ནས་ལོ་༢༠ འཁོར་ཡོད་པ་དང་འདས་པའི་ལོ་༢༠ རིང་གི་བོད་ཀྱི་གསོ་བ་རིག་པའི་ལོ་རྒྱུས་སམ་བྱུང་རབས་ཀྱི་ལོ་རྒྱུས་ཀྱི་དཔེ་དེབ་གཅིག་དབུ་འབྱེད་གནང་བ་ཡིན་པ་དང་། བོད་པའི་སྤྱི་ཚོགས་ཁྲོད་བོད་ཀྱི་གསོ་བ་རིག་པའི་སྐོར་གནས་ཚུལ་ཁ་གསལ་བཟོ་རྒྱུ་མང་པོ་ཞིག་ཡོད་པར་བརྟེན། ཡོང་རྒྱུ་སྡོད་པའི་བོད་ཀྱི་སྨན་རྩིས་ཁང་དང་གཞུང་ཞབས་ཟུར་པ།
སྐུ་སྲུང་ཟུར་པ་སོགས་ཀྱིས་༧གོང་ས་མཆོག་༧སྐྱབས་མགོན་ཆེན་པོ་མཆོག་ལ་བརྟན་ཞུགས་འབུལ་འཆར་ཡོད་པས། བརྟན་ཞུགས་སྐབས་སུ་ཕྱི་རྒྱལ་ནས་སྨན་པ་མང་པོ་ཡོང་གི་ཡོད་པས་ཁོང་ཚོ་ལ་བོད་ཀྱི་གསོ་རིག་པའི་སྐོར་ངོ་སྤྲོད་དང་། དམིགས་བསལ་རྒྱ་གར་ནང་བོད་ཀྱི་གསོ་བ་རིག་པ་དེ་ཁྲིམས་མཐུན་ཆགས་པའི་བརྒྱུད་རིམ་ནང་གནས་ཚུལ་མང་པོ་ཞིག་གོ་སྟངས་འདྲ་མི་འདྲ་ཡོད་པ་སོང་ཙམ། དེ་དག་རྣམས་ཁ་གསལ་བཟོ་རྒྱུའི་ཆེད་དུ་ཡིན་པར་བརྗོད་སོང་། གསར་འགོད་པས་དེ་རིང་གི་དེབ་འདིའི་ནང་དོན་སྙིང་བསྡུས་འདྲ་ག་རེ་ཡིན་ཚུལ་དྲིས་པས། ཚོགས་གཙོས་གསུངས་དོན་དེབ་དེའི་ནང་དོན་གཙོ་བོ་བོད་ཀྱི་སྨན་པའི་ལྷན་ཚོགས་སྐབས་བདུན་པའི་ལས་བསྡོམས་ཡིན་པ་དང་། དེ་བཞིན་བོད་ཀྱི་གསོ་བ་རིག་པའི་སྨན་པའི་དེབ་སྐྱེལ་བྱེད་དགོས་ཀྱི་ཡོད་པར་བརྟེན། དེབ་སྐྱེལ་དེའི་ནང་སྨན་པ་༦༣༠ ལྷག་ཙམ་དང་། མཐོ་སློབ་དེབ་སྐྱེལ། སྨན་སྦྱོར་ཁང་གི་དེབ་སྐྱེལ་སོགས་དེབ་སྐྱེལ་བྱས་པ་དག་དེབ་དེའི་ནང་གསལ་གྱི་ཡོད་པར་གསུངས་སོང་། ད་དུང་ཁོང་གིས་དེབ་ནང་བོད་ཀྱི་གསོ་བ་རིག་པ་དང་འབྲེལ་རྒྱལ་སྤྱིའི་ཚོགས་འདུ་སྐོང་ཚོགས་དང་། ཤེས་ཡོན་གོང་འཕེལ་གྱི་ཟབ་ཁྲིད་བྱེད་རྒྱུ། དེ་བཞིན་བོད་ཀྱི་གསོ་བ་རིག་པའི་ཁྲོད་གཟེངས་སུ་ཐོན་པའི་སྨན་པ་ལ་གཡུ་ཐོག་གཟེངས་རྟགས་འབུལ་རྒྱུ། དམིགས་བསལ་མ་འོངས་པའི་ལོ་རྒྱུས་ལ་དམིགས་ནས་བོད་ཀྱི་གསོ་བ་རིག་པ་དེ་རྒྱ་གར་ནང་ཁྲིམས་མཐུན་ཆགས་པའི་བརྒྱུད་རིམ་ཁྲོད་གལ་ཆེའི་གནས་ཚུལ་དང་། རྒྱ་གར་གཞུང་དང་ཡིག་འབྲེལ་བྱུང་བའི་གནས་ཚུལ་དག་དེའི་ནང་འཁོད་ཡོད་རེད། དེ་དག་མ་འོངས་གསོ་བ་རིག་པའི་ལོ་རྒྱུས་དང་ཧ་ཅང་གལ་ཆེན་པོ་ཆགས་ཡོད་པས་དེ་དག་དོབ་དེའི་ནང་འཁོད་ཡོད་ཅེས་གསུངས་སོང་། སྤྱིར་དེ་རིང་མཛད་སྒོའི་ཐོག་སྨན་པ་དང་གནད་ཡོད་མི་སྣ་གང་མང་ཞིག་ཕེབས་གནང་འདུག་ཅེས་གསུངས་སོང་།
གསར་འགོད་པ། བསོད་ནམས་ཕུན་ཚོགས།
