བོད་ཀྱི་གྲོས་ཚོགས་གསར་པ་འཛུགས་ལུགས་སྐོར།

ད་ལྟའི་བོད་ཀྱི་དཀའ་རྙོག་གི་གནས་ཚུལ་འདི་དོན་རྐྱེན་ཚབས་ཆེན་མ་རེད། དེ་ལས་ཀྱང་གལ་ཆེ་བའི་དོན་དག་ཅིག་ནི་ད་ལྟ་ང་ཚོས་བོད་པ་བོད་པའི་སྤྱི་ཚོགས་ལ་བསྒྱུར་ཐབས་དང་རྡོག་རྩ་ཆིག་སྒྲིལ་ཡོང་རྒྱུར་གཙང་བཤེར་བྱ་རྒྱུའི་གོ་སྐབས་དམ་འཛིན་བྱ་རྒྱུ་དེ་རེད།

༡། སྤྱི་འཐུས་གྲོས་ཚོགས་ཀྱི་འཐུས་མི་༤༥ ས་གནས་ནས་མངག་གཏོང་བྱ་དགོས། འདེམས་བསྐོ་བྱེད་དགོས་པ་མ་རེད། དེང་སྐབས་ཀྱི་འདེམས་བསྐོ་འདི་མི་མང་ལ་མགོ་སྐོར་གཏོང་པའི་ཉོ་ཚོང་རེད།

༢། སྤྱི་འཐུས་༤༥ ནང་དུ་ཁྲི་ཟུར་སྤྱི་ཟུར་དང་དོན་གཅོད་ཟུར་པ་བཀའ་ཟུར་མི་དགོས། གྲྭ་བ་མི་དགོས། ཆོལ་ཁའི་སྐུ་ཚབ་མི་དགོས། བོད་ནས་ཡོང་བའི་འཐུས་མི་བཅུ་ཡན་ཡོད་མི་ཆོག།

༣། ཆེས་མཐོའི་ཁྲིམས་ཁང་གི་ཁྲིམས་དཔོན་གསུམ་ལ་ཁྲིམས་ལུགས་རིག་པའི་འབུམ་རམས་པའི་ལག་ཁྱེར་དང་ཁྲིམས་ཀྱི་ལས་གཉེར་ལག་ཁྱེར་ཡོད་དགོས།

༤། སྤེན་པ་ཚེ་རིང་ལས་འཁུར་རྩ་དགོངས་བྱེད་ན་ཡག་པོ་རེད། རྒྱལ་ཡོངས་ཚོགས་ཆེན་འཐུས་མི་༤༥ ཡིས་སྲིད་སྐྱོང་གསར་པ་བསྐོ་གཞག་བྱེད་ན་ཡག།

༥། སྲིད་སྐྱོང་གསར་པ་ཁྲི་ཟུར་སྤྱི་ཟུར་དང་དོན་གཅོད་ཟུར་པ་བཀའ་ཟུར་མིན་པ། མི་རབས་གསར་པ་དགོས།

༦། སྲིད་འཛིན་ནི་རྒྱལ་ཁབ་གཅིག་གི་སྤྱི་ཡོངས་མཚོན་བྱེད་སྣང་བརྙན་རེད། སྲིད་འཛིན་གྱི་ཁྲི་ཐོག་ཏུ་བསྡད་པའི་མི་འདི། ངེས་པར་དུ་བསམ་གཞིགས་གསལ་པོ། གཏན་ཚིགས་ཀྱི་རང་བཞིན་ཡོད་པ། འདུ་ཤེས་རྙོག་འཁྲུལ་མེད་པ་དགོས། འབུམ་རམས་པའི་ལག་ཁྱེར་མེད་ན་ཆོག།  གཙོ་བོ་བློ་རིག་དྭངངས་ཤིང་གསལ་བ། ལས་ཀའི་ནུས་པ་དང་ལས་ཆོད་ཡོད་དགོས། སྲིད་འཛིན་ཞིག་གི་བཟོ་ལྟ་ངེས་པར་དུ་ཡོད་དགོས།

༧། ཨ་མེ་རི་ཀ་རྒྱལ་ཁབ་བཙུགས་ནས་ལོ་ཉིས་བརྒྱ་བཞི་བཅུ་ཞེ་ལྔ་ཟིན་སོང་། ད་ལྟ་འདེམས་བསྐོ་བྱེད་ཤེས་ཀྱི་མི་འདུག། ནག་ཚོང་ལྟ་བུ་དང་མི་མང་ལ་མགོ་སྐོར་གཏོང་བ། འདེམས་ཤོག་རྫུ་མ། བཤེར་རྩིས་ཀྱི་འཕྲུལ་འཁོར་སོགས་རྫུན་མ་བྱུང་ཡོད་པས། ལྐུགས་པ་འདི་ཚོའི་བྱེད་སྟངས་ལ་ལད་མོ་མ་བྱེད་ན་ཡག། དེ་མ་ཚད་འཛམ་གླིང་རྒྱལ་ཁབ་མང་པའི་འདེམས་བསྐོ་རྫུན་མ་རེད། ལྐོག་ཚོང་ཡང་ཡིན། བོད་པའི་འདེམས་བསྐོ་ཕལ་ཆེར་ལོ་གཅིག་དགོས། དུས་ཚོད་འཕྲོ་བརླག། བསམ་པའི་ནུས་ཤུགས་འཕྲོ་བརླག། དངུལ་ལོར་འཕྲོ་བརླག། བོད་མིའི་ལུས་སེམས་ལ་ཕོག་ཐུག་ཧ་ཅང་ཆེ།

གཅོད་པ་ཐར་གྱིས་ཕྱི་ལོ་ ༢༠༢༡ཟླ་ ༩ ཚེས་ ༢ ཉིན། ཨ་རིའི་གྲོང་ཁྱེར་ནིག་ཡོག་ནས།

གཅོད་པ་ཐར་གྱི་སྐྱེ་ཡུལ། དཔའ་རིས།

སློབ་སྦྱོང་ས་ཆ། དཔའ་རིས། ནུབ་བྱང་མི་རིགས་སློབ་ཆེན་མོ། པེ་ཅིན་མི་རིགས་སློབ་ཆེན་མོ། ཧྲང་ཧའེ་རོལ་མོ་སློབ་གྲྭ།

ལས་ཀ་བྱས་པའི་ས་ཆ། རྨ་ཆུ། མགོ་ལོག མཚོ་སྔོན་པོ་ཕྱོགས་ཀྱི་གསེར་ཆེན་རྫོང་།

ཨ་མེ་རི་ཀ་གྲོང་ཁྱེར་ནིག་ཡོག་ཀོ་ལུམ་བྷི་ཡ་སློབ་གྲྭ་ཆེན་མོ།

མཚན་འཁོད་རྩོམ་ཡིག་ཁག་འདི་ཀ་གསར་ཁང་གི་ལྟ་བ་ཡིན་པས་མ་ཁྱབ།