བོད་ཀྱི་ཆགས་འཇིག་དང་༧གོང་ས་མཆོག

བོད་ཀྱི་བང་ཆེན་སྤྱིའི་འདོན་ཐེངས་ ༤༩༧ ཕྱི་ལོ་ ༢༠༡༤/༧/༢
རྒྱལ་དབང་སྐུ་ཕྲེང་ལྔ་པ་ནས་བཟུང་༧གོང་ས་༧སྐྱབས་མགོན་ཆེན་པོ་སྐུ་ཕྲེང་རིམ་བྱོན་གྱིས་བོད་གངས་ཅན་ལྗོངས་ཀྱི་ཆོས་སྲིད་གཉིས་ཀྱི་དབུ་ཁྲིད་གནང་ཡོད་པ་དང། བོད་མི་རིགས་ཀྱི་སེམས་ནང་དུ་དུས་ནམ་ཡང་ནུབ་པ་མེད་པའི་ཉི་མ་ལྟ་བུ་ཞིག་ཏུ་གྱུར་ཡོད། ཕྱི་ལོ་༡༦༤༢ ལོར་བོད་གཞུང་དགའ་ལྡན་ཕོ་བྲང་ཆེན་པོ་དབུ་བརྙེས་པ་ནས་བཟུང། ༡༩༥༡ བར་བོད་ཀྱི་ཆབ་སྲིད་འཛིན་སྐྱོང་ལ་དར་རྒུད་སྣ་ཚོགས་བྱུང་ཡང། བོད་རྒྱལ་ཁབ་ཀྱི་རང་དབང་རང་བཙན་གྱི་རྒྱུན་གཏན་ནས་མ་ཆད་པར་སོར་གནས་ཐུབ་པ་ནི་གཙོ་བོ་༧གོང་ས་སྐུ་ཕྲེང་ན་རིམ་གྱི་བཀའ་དྲིན་ལ་བརྟེན་ནས་བྱུང་ཡོད། འོན་ཀྱང་བོད་ཡུལ་གྱི་འགྲིམ་འགྲུལ་མཐུན་རྐྱེན་དང་ས་ཁད་ཉེ་འགྱང་དབང་གིས་སྐབས་རེར་མངའ་ཁོངས་ལ་ཆེ་ཆུང་སྣ་ཚོགས་བྱུང་ཡང། བོད་ས་ཡོངས་སུ་རྫོགས་པར་འབྲེལ་བ་དང་ཤུགས་རྐྱེན་ཆད་མ་མྱོང་བ་ནི་དོན་དངོས་ཀྱི་ལོ་རྒྱུས་སུ་གྱུར་ཡོད། དེར་བརྟེན་༧གོང་ས་སྐུ་ཕྲེང་ན་རིམ་ནི་བོད་གངས་ཅན་གྱི་ལྗོངས་སུ་ཆོས་སྲིད་གཉིས་ཕྱོགས་ནས་བླ་ཆེན་གཞན་དང་མི་འདྲ་བར་ཤུགས་རྐྱེན་དང་མཛད་རྗེས་ཆེས་ཆེ་བར་གྱུར་ཡོད།

ལྷག་པར་དུ་༧གོང་སྐུ་ཕྲེང་བཅུ་བཞི་པ་ཆེན་པོ་མཆོག་དགུང་གྲངས་༡༦ ལ་ཕེབས་སྐབས་ནས་བོད་རྒྱལ་བསྟན་ཆབ་སྲིད་ཀྱི་མཛད་འགན་བཞེས་དགོས་བྱུང་བ་དང། སྐབས་དེར་བོད་ཀྱི་རྒྱལ་བསྟན་ཆག་འཇིག་གི་སྐབས་སུ་ཐུག་ཡོད་ཀྱང། ཐུགས་སྟོབས་གོ་ཆ་བཙན་པོ་ཕྲག་ཏུ་བཞེས་ནས་ད་ཆ་བོད་ལུགས་དགུང་གྲངས་༨༠ ལ་མ་ཕེབས་ཀྱི་བར་དུ་སྐད་ཅིག་ཀྱང་གཡེལ་བ་མེད་པར། བོད་རྒྱལ་བསྟན་མི་རིགས་ཀྱི་ཆེད་དུ་སྐུ་ངལ་བརྒྱ་ཕྲག་མང་པོ་ལྷུར་བཞེས་གནང་བ་སོགས་རྒྱལ་དབང་སྐུ་ཕྲེང་ན་རིམ་གྱི་ནང་ནས་བཀའ་དྲིན་ཆེ་ཤོས་ཤིག་ཏུ་གྱུར་ཡོད། ད་ལྟའི་ཆར་ཡང་དུས་རྒྱུན་དུ་འཛམ་གླིང་གི་ཤར་ནུབ་ཀུན་ཏུ་ཆིབས་བསྒྱུར་གྱིས་རྒྱལ་བསྟན་རིན་པོ་ཆེ་མི་ཉམས་དར་སྤེལ་ཡུན་གནས་ཡོང་ཐབས་དང། བོད་མི་རིགས་ཛ་དྲག་གི་གནས་སྟངས་ལས་སྐྱོབ་ཆེད་རྒྱལ་ཁབ་ཁག་གི་དབུ་འཛིན་རྣམས་ལ་བོད་དོན་རྒྱབ་སྐྱོར་ཡོང་བའི་ཞུ་གཏུག་གིས་མཚོན་སྐུ་ངལ་སྟོང་ཕྲག་དུ་མ་སྐུ་ཕྲག་ཏུ་བཞེས་ཡོད།

༧གོང་ས་༧སྐྱབས་མགོན་ཆེན་པོ་སྐུ་ཕྲེང་བཅུ་བཞི་པ་འདི་ཉིད་ཀྱིས་ཆོལ་ཁ་དང་ཆོས་བརྒྱུད་ཡོངས་ལ་ཐུགས་བརྩེ་བ་ཆེན་པོས་ཉེ་རིང་མེད་པར་གཅེས་པའི་བུ་བཞིན་བསྐྱངས་པའི་བཀའ་དྲིན་ལ་བརྟེན་ནས། གཞིས་བྱེས་གཉིས་སུ་ཡོད་པའི་བོད་རིགས་མི་མང་གི་ངོས་ནས་རེ་བའི་མིག་འབུར་གཏོད་ས་དེ་༧གོང་ས་སྐུ་ཕྲེང་བཅུ་བཞི་པ་ཆེན་པོ་མཆོག་ཉིད་ཁོ་ནར་གྱུར་ཡོད། ད་ཆ་༧གོང་ས་མཆོག་བོད་ལུགས་ལྟར་ན་དགུང་གྲངས་༨༠ ཕེབས་ཡོད་ནའང། སྐུ་ངལ་གཏན་ནས་མི་གསོ་བར་བོད་མི་སོགས་ཤར་ནུབ་ཀྱི་མི་རིགས་དུ་མའི་བསོད་ནམས་ཀྱི་བགོ་སྐལ་དུ་བཀའ་དབང་དང་གསུང་ཆོས་གནང་བ་དང། ལམ་སྟོན་བཀའ་སློབ་བསྩལ་དང་སྩོལ་བཞིན་ཡོད་པ་ཙམ་དུ་མ་ཟད། མ་འོངས་པར་ཡང་བསྟན་འགྲོའི་མགོན་དཔུང་དམ་པར་དགུང་གྲངས་༡༡༤ བར་དུ་བཞུགས་རྒྱུའི་ཞལ་བཞེས་བཟང་པོ་ཐོབ་ཡོད་པ་ནི། སྟོང་གསུམ་གསེར་གྱིས་བཀང་ནས་ཕུལ་ཡང་བཀའ་དྲིན་གསབ་ཐབས་བྲལ་བ་ཞིག་ཏུ་གྱུར་ཡོད།

བསྟན་དགྲ་ཀླ་ཀློའི་དམག་དཔུང་བོད་དུ་ལྷགས་ནས་བོད་རྒྱལ་བསྟན་མི་རིགས་དང་བཅས་པར་ཆག་འཇིག་ཆེན་པོ་བྱུང་བའི་དུས་སྐབས་འདིར། ༧གོང་ས་༧སྐུ་ཕྲེང་བཅུ་བཞི་པ་ཆེན་པོ་མཆོག་ལྟ་བུ་ཞལ་བཞུགས་མེད་ན། ད་ལྟའི་དུས་ལྟར་བོད་རིགས་ཡོངས་རྫོགས་ཀྱི་བསམ་འདུན་གཅིག་སྒྲིལ་དུ་གྱུར་མེད་ངེས་ཡིན་པ་དང། ༧གོང་ས་མཆོག་གི་བཀའ་དྲིན་ཁོ་ན་མིན་ན་ད་ལྟ་བཞིན་བོད་ཀྱི་ཆོས་བརྒྱུད་ཚང་མ་ཕན་ཚུན་གུས་བཀུར་དང་རིས་མེད་གཅིག་སྒྲིལ་དུ་གནས་ཐུབ་མེད་པ་ནི་འདས་པའི་ལོ་རྒྱུས་ལ་གཞིགས་ན་ཁ་ཚོན་བཅད་ནས་བཤད་ཐུབ་པ་ཞིག་རེད། དེར་བརྟེན་སངས་རྒྱས་ཀྱི་བསྟན་པ་འཛམ་བུའི་གླིང་དུ་དར་ཁྱབ་ཆེན་པོ་བྱུང་བ་དང། བོད་ཀྱི་ཆོས་དང་རིག་གནས་རྒྱུད་འཛིན་གྱི་ཐོག་ནས་ད་ལྟའི་ཆར་བོད་ཕྱི་ནང་གཉིས་སུ་རེ་བ་ཆ་ཚང་མ་བརླགས་པར་གནས་ཐུབ་པ་བྱུང་བ་འདི་ཡང། གཙོ་བོ་༧གོང་ས་༧སྐྱབས་མགོན་ཆེན་པོ་མཆོག་གི་ཐུགས་རྗེ་དང་བཀའ་དྲིན་ཉག་གཅིག་ཏུ་གྱུར་ཡོད།

མདོར་ན་ད་ལྟའི་དུས་འདིར་བོད་ནང་དུ་རང་ལུས་མེར་སྲེག་གཏོང་མཁན་གྱི་རྒྱལ་གཅེས་དཔའ་བོ་དཔའ་མོ་དག་གི་འབོད་སྒྲ་གཙོ་བོ་༧གོང་ས་མཆོག་བོད་དུ་ཆིབས་བསྒྱུར་བསྐྱང་དགོས་པ་དེ་ཡིན་པ་དང། གཞིས་བཞུགས་བོད་མི་ཡོངས་ཀྱིས་སེམས་གཏིང་ནས་རེ་སྒུག་བློ་གཏད་ཞུ་ཡུལ་༧གོང་ས་༧སྐྱབས་མགོན་ཆེན་པོ་མཆོག་ཁོ་ན་ཡིན། བསྟན་དགྲ་རྒྱ་དམར་གཞུང་གིས་ཀྱང་བོད་དོན་རྩ་མེད་བཟོ་དགོས་ན་༧གོང་ས་མཆོག་གི་མཛད་འཕྲིན་ཉམས་ཉེས་སུ་གཏོང་དགོས་པ་གལ་ཆེར་མཐོང་ནས་ཁ་རྡུང་དང་སྐུར་འདེབས་ཞུ་ཡུལ་གཙོ་བོ་༧གོང་ས་༧སྐྱབས་མགོན་ཆེན་པོ་མཆོག་ཡིན་ལ། དེ་བཞིན་རྒྱལ་སྤྱིའི་སྟེང་ནས་ཀྱང་༧གོང་ས་མཆོག་དང་བོད་དོན་ངོ་བོ་དབྱེར་མེད་དུ་བལྟ་བ་སོགས་ཀྱིས། ༧གོང་ས་མཆོག་གི་སྐུ་ཚེ་དང་མཛད་འཕྲིན་ནི་བོད་མི་རིགས་ཀྱི་ཆགས་འཇིག་གནས་སྟངས་དང་ཁ་འབྲལ་ཐབས་མེད་པ་ཞིག་ཏུ་གྱུར་ཡོད་པར་བརྟེན། སྤྱི་ནོར་༧གོང་ས་༧སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་འདི་ཉིད་འཇིག་རྟེན་གྱི་སྐྱེ་འགྲོ་སྤྱི་དང་བྱེ་བྲག་བོད་གངས་ཅན་ལྗོངས་ཀྱི་མགོན་དཔུང་དུ་སྐུ་ཚེ་བསྐལ་བརྒྱར་བརྟན་དགོས་པ་ནི། གཞིས་བྱེས་བོད་མི་ཡོངས་ཀྱི་སེམས་ནས་དུས་ནམ་ཡང་འདོར་ཐབས་མེད་པའི་རེ་བ་ཉག་གཅིག་ཏུ་གྱུར་ཡོད།།