བོད་ཀྱི་དཔའ་བོ་དཔའ་མོ་རྗེས་དྲན་གྱི་རྩེད་འགྲན།

ཟླ་འདིའི་ཚེས་༢༠ ཉིན་གྱི་སྔ་དྲོ་དྷ་ས་གངས་སྐྱིད་ཉེ་འཁྲིས་ཀྱི་ལག་སྤོལ་རྩེད་ཐང་དུ་བོད་ཀྱི་དཔའ་བོ་དཔའ་མོའི་རྗེས་དྲན་གྱི་ལག་སྤོལ་རྩེད་འགྲན་དེ་འགོ་བཙུགས་ཡོད་པ་རེད།

རྩེད་འགྲན་དེ་དྷ་ས་ས་གནས་བོད་ཀྱི་གཞོན་ནུ་ལྷན་ཚོགས་དང་། དབུས་བོད་མིའི་སྒྲིག་འཛུགས་ཀྱི་བུད་མེད་ནུས་སྟོབས་གོང་སྤེལ་སྡེ་ཚན་གཉིས་ཀྱིས་གོ་སྒྲིག་བྱས་ཡོད་པ་རེད། རྩེད་འགྲན་དབུ་འབྱེད་མཛད་སྒོའི་ཐོག་སྐུ་མགྲོན་ནང་སྲིད་བཀའ་བློན་རྒྱ་རི་སྒྲོལ་མ་དང་། དམིགས་བསལ་སྐུ་མགྲོན་སྤྱི་འཐུས་གང་ལྷ་མོ། གཞོན་ལྷན་གྱི་དབུས་རྒྱུན་ཟུར་པ་སྤྱི་འཐུས་ཀརྨ་ཡེ་ཤེས་སོགས་སྤྱི་འཐུས་ཁག་ཅིག དབུས་གཞོན་ལྷན་གྱི་དྲུང་ཆེ་བསྟན་འཛིན་ལམ་བཟང་སོགས་ཕེགས་ཡོད་པ་རེད།

ས་གནས་གཞོན་ལྷན་ཚོགས་གཙོ་དབང་ལྡན་སྐྱབས་དང་། བུད་མེད་ནུས་སྟོབས་གོང་སྤེལ་སྡེ་ཚན་གྱི་བདེན་ཆེན་གཉིས་ཀྱིས་རྩེད་འགྲན་དེའི་དམིགས་སྐོར་ངོ་སྤྲོད་བྱས་པ་དང་། འདི་ལོའི་རྩེད་འགྲན་ནང་དྷ་སའི་ཉེ་འཁོར་གྱི་བུའི་རུ་ཁག་༡༢ དང་། བུད་མེད་རུ་ཁག་༦ མཉམ་ཞུགས་བྱས་ཡོད་པ་རེད། བོད་ཀྱི་གཞོན་ནུ་ལྷན་ཚོགས་དབུ་བརྙེས་པའི་ཉིན་མོར་མཐའ་མའི་རྩེད་ཀྱི་བྱ་དགའ་གནང་རྒྱུ་ཡིན་པ་རེད།།

གསར་འགོད་པ་ཆོས་ཉིད་འོད་ཟེར་གྱིས།