བོད་ཀྱི་རྒྱལ་ཡོངས་མང་གཙོ་ཚོགས་པའི་ཚོགས་ཆེན་ཐེངས་དགུ་པ་དབུ་འཛུགས་བྱས་སོང་།

ཟླ་འདིའི་ཚེས་༢༠ ཉིན་དྷ་ས་ལ་ཡོད་པའི་ཀེལ་ལབ་ཧའོ་སི(Club House) གསོལ་མགྲོན་ཁང་དུ་བོད་ཀྱི་རྒྱལ་ཡོངས་མང་གཙོ་ཚོགས་པའི་ཚོགས་ཆེན་ཐེངས་དགུ་པ་དེ་འཚོགས་འགོ་བཙུགས་སོང་།
སྐབས་དེའི་མཛད་སྒོའི་ཐོག་ཏུ་དམིགས་བསལ་སྐུ་མགྲོན་དུ་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་གྲུབ་དང་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཞོན་ཟུར་པ་ཨཅཱརྱ་ཡེ་ཤེས་ཕུན་ཚོགས་དང་། གཞན་ཡང་དྷ་ས་ལ་ཡོད་པའི་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ་དང་། དེ་བཞིན་བོད་ཀྱི་རྒྱལ་ཡོངས་མང་གཙོ་ཚོགས་པའི་ཚོགས་གཙོ་གཙོས་རྒྱུན་ལས་རྣམ་པ་དང་ས་གནས་ཁག་འདྲ་མིན་ནས་ཕེབས་པའི་བོད་ཀྱི་རྒྱལ་ཡོངས་མང་གཙོ་ཚོགས་པའི་ཚོགས་མི་རྣམ་པ་བཅས་ལྷན་འཛོམས་གནང་འདུག

སྐབས་དེར་དམིགས་བསལ་སྐུ་མགྲོན་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་གྲུབ་ཀྱིས་དུས་ཕྱིས་སུ་བཙན་བྱོལ་ནང་དུ་མང་གཙོའི་འགྲོ་ལུགས་དང་མང་གཙོའི་འོས་ཤོག དེ་བཞིན་སྲིད་སྤྱི་གཉིས་ཀྱི་འོས་བསྡུའི་གནས་སྟངས་ཁྲོད་དུ་མང་ཚོགས་མང་པོས་གོ་བ་ཡག་པ་མ་རྙེད་ནས། དེ་རིང་ཁ་སང་ང་ཚོའི་སྤྱི་ཚོགས་ཀྱི་ནང་དུ་ངའི་འགོ་ཁྲིད་དང་ཁྱེད་ཀྱི་འགོ་ཁྲིད། ངའི་མཐུན་ཕྱོགས་དང་ངའི་རྒྱབ་སྐྱོར་བྱེད་ས། ངས་བྱས་པ་དེ་འགྲིགས་པ་དང་ཁྱེད་ཀྱིས་བྱས་པ་དེ་ནོར་བ་སོགས་ཟེར་ནས་བཙན་བྱོལ་ནང་དུ་དངོས་གནས་ཡིད་ཞུམ་དགོས་པ་དང་བློ་ཕམ་དགོས་པའི་གནས་སྟངས་དེ་འདྲ་ཞིག་ཡོང་སྡོད་པའི་སྐབས་སུ། ལས་ཀྱི་སྣེ་མོ་བ་ཚང་མས་མཐུན་ལམ་རྡོག་རྩ་ཆིག་སྒྲིལ་གྱིས་ལས་དོན་གཉེར་དགོས་པ་དང་། བཙན་བྱོལ་ནང་དུ་ཡོད་པའི་བོད་མི་སུ་ཞིག་ཡིན་རུང་། བོད་ནང་གི་བོད་མི་ཚོའི་སྐུ་ཡི་སྐུ་ཚབ་དང་གསུང་གི་གསུང་ཚབ་ཡིན་བསམ་པའི་ཐོག་ནས། བོད་ཀྱི་རྩ་དོན་དེ་དང་པོ་བཞག་དགོས་པ་དང་། འཐབ་རྩོད་ཀྱི་ཆེད་དང་བོད་ནང་གི་ཛ་དྲག་གི་གནས་སྟངས་ཐོག་ལ་ང་ཚོས་ལས་འགན་ག་རེ་བསྒྲུབ་ཐུབ་ཀྱི་ཡོད་མེད་སོགས་ཀྱི་ཐོག་ལ་དོ་སྣང་བྱས་ནས་ལས་འགུལ་སྤེལ་བ་ལས། ངའི་ཕྱོགས་ཁག་དང་ངའི་འགོ་དཔོན་སོགས་བཤད་ནས་བསྡད་ན། དེ་ནི་ང་ཚོའི་འཐབ་རྩོད་ཀྱི་གྱོང་གུན་ཞིག་ཡིན་པ་མ་ཟད། ང་ཚོ་ལ་དེ་ལྟར་རྩོད་པའི་དུས་ཚོད་མེད་པ་དང་ང་ཚོ་གནས་སྟངས་དེ་འདྲ་ཞིག་ཏུ་ཡང་བསླེབ་མེད་རབས་སོགས་ཀྱི་གཏམ་བཤད་གནང་སོང་།
དེ་བཞིན་དེ་རིང་མཛད་སྒོ་ཐོག་ཏུ་འགྲིམས་སྤེལ་བྱས་པའི་མང་གཙོ་ཞེས་པའི་དུས་དེབ་ནང་དུ། བོད་ཀྱི་རྒྱལ་ཡོངས་མང་གཙོ་ཚོགས་པ་ནི། བོད་ཀྱི་མང་གཙོ་དང་ཞི་བདེའི་ལམ་སྟོན་པ་ཆེན་པོ༧རྒྱལ་དབང་སྐུ་ཕྲེང་༡༤མཆོག་གིས་བོད་ཀྱི་མང་གཙོ་དེ་སྲིད་དོན་ཚོགས་པའི་ལམ་ལུགས་ཡོད་པའི་མང་གཙོ་ཞིག་ལ་ཐུགས་རེ་གནང་བ་བཞིན། དེ་ཡང་ཕྱི་ལོ་༡༩༩༠ལོར་བོད་ཀྱི་གཞོན་ནུ་ལྷན་ཚོགས་ཀྱི་འགན་འཛིན་ལྷན་ཚོགས་ཐེངས་༢༡བའི་ཐོག་བཀའ་སློབ་ཕེབས་པའི་ནང་། “ཕྱིན་ཆད་བོད་སྐྱོང་སྟངས་ཐད་ཆ་བཞག་ན། སྤྱི་ཚོགས་རིང་ལུགས་གཙོ་བོར་བྱས་པའི་མང་གཙོའི་སྤྱི་ཚོགས་ཐོག་ཕྱིན་ན་ལེགས་པ་འདུག་གམ།ཡང་ན། མང་གཙོའི་ལྟ་བ་འདྲ་མིན་སྣ་ཚོགས་ཡོད་པར་ལྟར་ལྟ་བ་འདི་འདྲ་ཞིག་གི་ཐོག་ཕྱིན་ན་ལེགས་པ་འདུག་ཟེར་བ་སོགས། གང་ལྟར་ལྟ་བ་འདྲ་མིན་ཁྱེར་མཁན་ནང་གསེས་ཀྱི་ཚོགས་པ་འདྲ་མིན་བཙུགས། དམིགས་ཡུལ་གཅིག་གྱུར་གྱི་སྒོ་ནས་སོ་སོའི་ལྟ་བ་འདྲ་མིན་ཁྱེར་མཁན་ཕན་ཚུལ་བགྲོ་གླེང་བྱས། རྩོད་པ་སོ་སོའི་ལམ་སྲོལ་ཅིག་གཏོད་དགོས་ཀྱི་འདུག་ཅེས་མགོན་པ་གང་གི་ལམ་སྟོན་འོག་བོད་ཀྱི་གཞོན་ནུ་ལྷན་ཚོགས་ཀྱིས་འགན་འཁུར་ལ་བརྟེན་ནས། ཕྱི་ལོ་༡༩༩༤ ལོར་ཟླ་༩ ཚེས་༢ ཉིན་བོད་ཀྱི་རྒྱལ་ཡོངས་མང་གཙོ་ཚོགས་པ་དངོས་སུ་དབུ་བརྙེས་ཡོད་པ་དང་། ཚོགས་པ་དེར་རྒྱ་བལ་འབྲུག་གསུམ་དང་ཕྱི་རྒྱལ་ཡུལ་གྲུ་ཁག་བཅས་ཁྱོན་ས་གནས་དང་འབྲེལ་མཐུད་པ་བཅས་ཡན་ལག་༣༨ དང་ཚོགས་མི་༥༠༠༠ ཙམ་ཡོད་པ་རེད་འདུག

བོད་ཀྱི་རྒྱལ་ཡོངས་མང་གཙོ་ཚོགས་པའི་ཚོགས་ཆེན་ཐེངས་དགུ་པ་དེ་ཟླ་འདིའི་ཚེས་༢༠ ནས་ཉིན་གྲངས་གསུམ་གྱི་རིང་འཚོགས་རྒྱུ་དང་། ཐེངས་འདིའི་ཚོགས་བཅར་དུ་ས་གནས་མ་འདྲ་བ་ཁག་༢༤ ནས་ཚོགས་མི་དག་ཕེབས་ཡོད་འདུག །

གསར་འགོད་པ་བློ་བཟང་རྒྱ་མཚོ།