བོད་དང་རྒྱ་གར། རྒྱ་ནག་སོགས་ཀྱི་སྐོར་ལ་ལྟ་སྟངས་ཡང་དག་པ་བསྐྲུན་དགོས།

“ཧི་མ་ལ་ཡའི་རི་རྒྱུད་ལ་ཉེན་ཁ་མེད་པ་མ་ཆགས་བར་དུ་རྒྱ་གར་ཡར་རྒྱས་འགྲོ་ཐབས་བྲལ་བ་རེད།”ཅེས་རྒྱ་གར་(RSS)ཡི་ཚོགས་མི་སྐུ་ཞབས་ཨོམ་པེར་ཀཤ་ཡིས་གསུངས་སོང།

ཟླ་འདིའི་ཚེས་༢༠ ཉིན་དྷ་ས་གངས་སྐྱིད་ཕྱི་དྲིལ་ལྷག་པ་ཚེ་རིང་ཚོགས་ཁང་དུ། ཧི་མ་ཅཱལ་ནང་མི་ཚོགས་པའི་གོ་སྒྲིག་འོག རྒྱ་གར་ཧི་མ་ལ་ཡའི་རི་རྒྱུད་ཁོངས་ཀྱི་སློབ་མ་༣༠ ཙམ་རྒྱ་གར་མངའ་སྡེ་གཞན་ལ་སློབ་མའི་ཉམས་མྱོང་ཞེས་པའི་ལས་རིམ་ཁྲོད། རྒྱ་གར་དང་བོད་ཀྱི་གནད་དོན་ཐད་ཚོགས་འདུ་ཞིག་བསྐོངས་སོང།

ཚོགས་འདུར་གཏམ་བཤད་གནང་མཁན་རྒྱ་གར་RSS ཚོགས་པའི་ཚོགས་མི་སྐུ་ཞབས་ཨོམ་པེར་ཀཤ་དང། ཧི་མ་ཅཱལ་(ABVB)སློབ་ཕྲུག་ཚོགས་པའི་ཚོགས་གཙོ་སྐུ་ཞབས་སན་ཇེའི་ཤཱར་མ། བོད་མི་མང་སྤྱི་འཐུས་ཨ་ཅ་རྱེ་ཡེ་ཤེས་ཕུན་ཚོགས། ཕྱི་དྲིལ་དྲུང་ཆེ་བཀྲ་ཤིས་ཕུན་ཚོགས་བཅས་ཕེབས་འདུག

ཐོག་མར་སྐུ་ཞབས་ཨོམ་གྱིས་སྔར་ཕྱི་ལོ་༡༩༦༢ ལོར་རྒྱ་གར་དང་རྒྱ་ནག་དབར་ས་མཚམས་དམག་འཁྲུག་བྱུང་སྐོར་དང། དེའི་ཁྲོད་རྒྱ་གར་གྱི་དམག་མི་མང་པོའི་ཚེ་སྲོག་ཤོར་སྐོར། རྒྱ་ནག་གིས་བོད་ལ་བཙན་འཛུལ་མ་བྱས་པའི་སྔོན་དུ་ཧི་མ་ལ་ཡའི་རི་རྒྱུད་ལ་བདེ་འཇགས་ཡོད་པ། དེ་བཞིན་ཁོང་གིས་“ཧི་མ་ལ་ཡའི་རི་རྒྱུད་ལ་ཉེན་ཁ་མེད་པ་མ་ཆགས་བར་དུ། རྒྱ་གར་ཡར་རྒྱས་འགྲོ་ཐབས་བྲལ་བ་རེད།”ཅེས་གསུངས་སོང།

དེ་ནས་ཕྱི་དྲིལ་དྲུང་ཆེ་བཀྲ་ཤིས་ཕུན་ཚོགས་ཀྱིས་རྒྱ་གར་སློབ་མ་ཚོར་རང་ཉིད་ཀྱི་ལུང་པའི་ལོ་རྒྱུས་ཤེས་པ་བྱེད་རྒྱུ་གལ་ཆེན་ཡིན་པ། དེ་བཞིན་བོད་དང་རྒྱ་གར་དབར་དུས་རབས་༨ པ་ནས་༢༡ བར་འབྲེལ་བ་བྱུང་དང་འབྱུང་བཞིན་ཡོད་པ། རྒྱ་གར་གྱི་མི་རབས་གསར་པ་ཚོར་འགན་ལྗིད་པོ་ཡོད་པ་ཁུར་བླངས་ཏེ། བོད་དང་རྒྱ་གར། རྒྱ་ནག་སོགས་ཀྱི་སྐོར་ལ་ལྟ་སྟངས་ཡང་དག་པ་བསྐྲུན་དགོས་སྐོར་གསུངས་སོང།

སྤྱི་འཐུས་ཨ་ཅ་རྱེ་ཡེ་ཤེས་ཕུན་ཚོགས་ཀྱིས། མི་རིགས། རྒྱལ་པོ། ས་ཁམས་ཆགས་ཚུལ། རིག་གཞུང། ཆོས། སྐད་ཡིག། ཚོང་འབྲེལ། ཁོར་ཡུག།སྨན་སོགས་ཀྱི་ཐོག་ལ་བོད་དང་རྒྱ་གར་དབར་གྱི་འབྲེལ་ལམ་ཡོད་སྐོར་གཏམ་བཤད་གནང་སོང།

ཚོགས་འདུ་གྲུབས་རྗེས། སློབ་མ་ཚོ་བོད་ཀྱི་དཔེ་མཛོད་ཁང་དང། སྤྱི་འཐུས་ལྷན་ཁང་སོགས་ལ་ལྟ་སྐོར་དུ་ཕྱིན་ཡོད་པ་རེད།

གསར་འགོད་པ་སྐལ་བཟང་དོན་གྲུབ།