བོད་དང་ཧོང་ཀོང་གྱི་ལས་འགུལ་བ་ཚོས་ཨ་རིའི་རྒྱལ་ཡོངས་ལག་རྩེད་སྤོ་ལོའི་རུ་ཚོགས་(NBA)ཀྱི་རྩེད་འགྲན་སྐབས་ངོ་རྒོལ་བྱས། 

(ཨ་རི།) ཟླ་འདིའི་ཚེས་༡༨ ཀྱི་དགོང་མོར་ཨ་རིའི་ནིའུ་ཡོག་གྲོང་ཁྱེར་དུ་རྒྱལ་ཡོངས་ལག་རྩེད་སྤོ་ལོའི་རུ་ཚོགས་(NBA)ཀྱི་རུ་ཁག་གཉིས་ཀྱིས་རྩེད་འགྲན་བྱེད་སྐབས། བོད་དང་ཧོང་ཀོང་གི་ངོ་རྒོལ་བ་ཚོ་ཁག་གཅིག་གིས་འཕྲེད་དར་ཁྱེར་ནས་རུ་ཚོགས་དེའི་ཉེ་ཆར་གྱི་བྱེད་སྟངས་ལ་ངོ་རྒོལ་བྱས་ཡོད་འདུག 

དེ་ཡང་ངོ་དེབ་ཀྱིས་མཚོན་པའི་སྤྱི་ཚོགས་དྲ་ལམ་ཁག་ཏུ་རྒྱ་ཆེར་བརྒྱུད་སྤེལ་དང་ཁྱབ་གདལ་དུ་འགྲོ་བཞིན་པའི་འདྲ་པར་དང་བརྙན་ཐུང་ནང་། གཏུམ་འབྲུག་རུ་ཁག་དང་།(Raptors) དྲ་བ་རུ་ཁག(Nets) གཉིས་ཀྱིས་གྲོང་ཁྱེར་ནིའུ་ཡོག་གི་བྷར་ཁི་ལི་རྩེད་ཐང་(Barclays Center) དུ་རྩེད་འགྲན་བྱེད་སྐབས། བོད་དང་ཧོང་ཀོང་གི་རང་དབང་ལས་འགུལ་བ་ཚོ་ཁག་གཅིག་གིས་ངོ་རྒོལ་དང་སྐད་འབོད་བྱས་ཡོད་འདུག

བོད་ཀྱིས་ལས་འགུལ་བ་ཚོས་བོད་རྒྱ་དབྱིན་གསུམ་ནང་“བོད་རང་བཙན”ཞེས་པའི་ཡི་གེ་བྲིས་པའི་སྟོད་ཐུང་དཀར་པོ་རེ་གྱོན་པ་མ་ཟད། བོད་རྒྱལ་ཁབ་ཆེན་པོོའི་རྒྱལ་དར་དང་། དེ་བཞིན་“བོད་ལ་རང་དབང་དགོས།” “འགྲོ་བ་མིའི་ཐོབ་ཐང་ནི་ས་ཕྱོགས་གང་སར་གལ་ཆེན་ཡིན་”ཞེས་པའི་འཕྲེད་དར་ཁྱེར་ཡོད་འདུག 

ཉེ་ཆར་ཨ་རིའི་རྒྱལ་ཡོངས་ལག་རྩེད་སྤོ་ལོའི་རུ་ཚོགས་ཀྱི་གནད་ཡོད་མི་སྣ་ཞིག་གིས་ཧོང་ཀོང་ལ་རྒྱབ་སྐྱོར་ཡོད་པའི་ཚིག་ཕྲེང་གཅིག་དྲ་ཐོག་ཏུ་བརྒྱུད་སྤེལ་བྱས་(འཕྲལ་དུ་མར་བསུབས་ཡོད་)པར་བརྟེན་ནས་རྒྱ་ནག་གཞུང་མང་གཉིས་ཀྱིས་རྒྱལ་ཡོངས་ལག་རྩེད་སྤོ་ལོའི་རུ་ཚོགས་ལ་སྐྱོན་བརྗོད་ཚ་ནན་བྱས་པ་མ་ཟད། ཚོང་ཤག་གལ་ཆེན་ལ་ལས་ཚོང་འབྲེལ་ཡང་བཅད་སྟབས། རུ་ཚོགས་དེ་དང་དེའི་གྲགས་ཅན་གྱི་རྩེད་འགྲན་བ་ཁ་ཅིག་གིས་ཚོང་གི་ཁེ་བཟང་གི་ཆེད་དུ་རྒྱ་ནག་ལ་དགོངས་སེལ་ཞུས་པར། ཨ་རིའི་མི་སེར་དང་ཆབ་སྲིད་པ་རྣམས་མི་དགའ་བར་གྱུར་ནས་རུ་ཚོགས་དེར་སྐྱོན་བརྗོད་ཚབས་ཆེན་ཕོག་པས། ད་ལྟ་རྒྱལ་ཡོངས་ལག་རྩེད་སྤོ་ལོའི་རུ་ཚོགས་བྱ་དཀའ་བའི་གནས་སུ་ལྷུང་ཡོད། 

ད་ཐེངས་ཀྱི་རྩེད་འགྲན་འདིའི་སྐབས་བྱུང་བའི་ངོ་རྒོལ་དང་འབྲེལ་བའི་ཐད་ལ། བོད་དོན་ལས་འགུལ་བསྟི་གནས་ཁང་གི་ཉམས་ཞིབ་པ་རྒན་པ་བསྟན་འཛིན་རྡོ་རྗེས་“ད་ལྟ་རང་དབང་འཐབ་རྩོད་བྱེད་བཞིན་པའི་ཧོང་ཀོང་བ་རྣམས་ཀྱི་ཆེད། ལེགས་ཉེས་བླང་དོར་གྱི་རྣམ་དཔྱོད་ལྡན་མའི་འཛམ་གླིང་མི་མང་ཚོས་རྒྱབ་སྐྱོར་དང་སྐད་འབོད་བྱེད་རྒྱུ་གལ་གནད་ཆགས་ཡོད་ལ། རྒྱ་ནག་གི་འགོ་ཁྲིད་ཚོས་རྒྱ་ནག་རང་གི་ནང་དུ་ཡང་འགྲོ་བའི་མིའི་ཐོབ་ཐང་ལ་སྔར་བྱུང་མྱོང་མེད་པའི་དྲག་གནོན་བྱེད་བཞིན་ཡོད་པས། བོད་དང་། ཤིན་ཅང་། དེ་བཞིན་རྒྱ་ནག་མི་མང་ཚོའི་ཆེད་དུའང་[ཡིན]”ཞེས་བརྗོད་པའི་ཐོག ཁོས་ད་དུང་ཌ་ལི-མོ་རེ་(Daryl Morey)ཡིས་ཧོང་ཀོང་གི་ངོ་རྒོལ་ལ་རྒྱབ་སྐྱོར་ཡོད་པའི་སྐད་ཆ་བཤད་པ་དེ་འགྲིག་ཡོད་པ་དང་། རྒྱལ་ཡོངས་ལག་རྩེད་སྤོ་ལོའི་རུ་ཚོགས་ཀྱིས་གཞི་རྩའི་ཆ་ནས་ཁོའི་སྨྲ་བརྗོད་རང་དབང་ལ་རྒྱབ་སྐྱོར་བྱས་པར་དགའ་བསུ་ཡོད་ཀྱང་། རྩེད་འགྲན་པ་གྲགས་ཅན་ལི་བྷ་རོན-ཇམ་སི་(Lebron James) དང་། དྲ་བ་རུ་ཁག་གི་སྤྱིན་བདག་ཇོ་སི་ཧྥི-ཚེ་(Joseph Tsai) གཉིས་ཀྱིས་མི་མང་གི་རང་དབང་དང་ཐོབ་ཐང་ཚབ་ཏུ་དཔལ་འབྱོར་གྱི་ཁེ་བཟང་གལ་ཆེ་བ་བཟུང་བ་དེར་ཤིན་ཏུ་མི་སྐྱིད་པར་གྱུར་བའི་སྐོར་བཤད་ཡོད་འདུག 

མང་གཙོ་དང་རང་དབང་གི་ལས་འགུལ་བ་འདི་དག་གིས་རྒྱལ་ཡོངས་ལག་རྩེད་སྤོ་ལོའི་རུ་ཚོགས་ཀྱི་རྩེད་འགྲན་རྣམས་ཀྱི་སྐབས་དང་བསྟུན་ནས་མུ་མཐུད་ཨ་རི་དང་ཁ་ན་ཏྲ་རྒྱལ་ཁབ་གཉིས་ལ་ངོ་རྒོལ་གྱི་ལས་འགུལ་སྤེལ་འཆར་ཡོད་འདུག །

གསར་འགོད་པ་དཀོན་མཆོག་རབ་བརྟན།