བོད་དོན་ལས་འགུལ་བ་ཁག་ཅིག་གིས་ཨོ་རྩལ་དཔལ་འབར་མཛད་སྒོའི་ཐོག་ལས་འགུལ་སྤེལ་འདུག 

ཟླ་༡༠ པའི་ཚེས་༡༨ ཉིན་གནའ་རབས་སུ་ཨོ་རྩལ་འགྲན་ཚོགས་བྱེད་ཡུལ་གྷེ་རི་སེའི་ཨོ་ལིམ་པཱི་ཡ་ས་གནས་ཀྱི་ཧཱི་རཱ་ལྷ་ཁང་དུ། ཕྱི་ལོ་༢༠༢༢ ལོའི་རྒྱ་ནག་གི་དགུན་ཁའི་ཨོ་རྩལ་འགྲན་ཚོགས་དང་འབྲེལ་ནས། ཨོ་རྩལ་དཔལ་འབར་སྤར་བའི་མཛད་སྒོའི་སྐབས་སུ། བོད་དོན་ལས་འགུལ་བ་འཆི་མེད་ལྷ་མོ་དང་ཇཱེ་སོན་ ནཱེ་ཐེ་(Jason Leith) ཧྥ་རན་ མེ་ཌོ་གོལ་(Fern MacDougal) བཅས་མཛད་སྒོ་འཚོགས་ཡུལ་དུ་འཛུལ་ཐུབ་ནས། བོད་ཀྱི་རྒྱལ་དར་དང་མི་རིགས་རྩ་མེད་ཀྱི་ཨོ་རྩལ་འགྲན་ཚོགས་མི་དགོས་ཞེས་པའི་འཕྲེད་དར་འཕྱར་ནས། སྐད་འབོད་དང་སྦྲགས་ནས་ངོ་རྒོལ་ལས་འགུལ་སྤེལ་སྐབས་སུ་ཉེན་རྟོག་པས་བཀག་ཉར་བྱས་འདུག 

མཛད་སྒོ་མ་འཚོགས་པའི་སྔོན་དུ་ཕྱི་ལོགས་སུ་བོད་དོན་ལས་འགུལ་བ་བཞི་གྷེ་རི་སེའི་ཉེན་རྟོག་པས་བཀག་ཉར་བྱས་ཏེ། ཆུ་ཚོད་བཞི་ཡི་རྗེས་སུ་ཉེས་འཛུགས་གང་ཡང་མ་བྱས་པར་གློད་གྲོལ་བཏང་ཡོད་པ་རེད། དེ་ཡང་བོད་རང་བཙན་སློབ་ཕྲུག་ཚོགས་པའི་བསྒྲགས་གཏམ་སྤེལ་བའི་ནང་དུ་འཁོད་དོན་ལྟར་ན། བོད་དོན་ལས་འགུལ་བ་བཞི་དེ་མཛད་སྒོ་འཚོགས་ཡུལ་གྱི་ཕྱི་རུ་ཡོད་པའི་སྐབས་སུ། ངོ་རྒོལ་གྱི་ལས་འགུལ་གང་ཡང་སྤེལ་མེད་ཀྱང་། ཉེ་འཁོར་དུ་ཡོད་པའི་རྒྱ་ནག་གཞུང་ཚབ་ཁང་གི་ལས་བྱེད་གཅིག་གིས་ཉེན་རྟོག་པར་བོད་དོན་ལས་འགུལ་བ་དེ་དག་ས་གནས་དེ་ནས་རྒྱང་འབུད་གཏོང་དགོས་སྐོར་བརྗོད་འདུག དེའི་རྗེས་སུ་རྒྱ་ནག་གི་ལས་བྱེད་གཞན་ཁག་ཅིག་དང་སྐད་ཆ་བཤད་རྗེས་ཉེན་རྟོག་པས་བོད་དོན་ལས་འགུལ་བ་དེ་དག་ཁྲིད་ནས། ཉེ་འགྲམ་གྱི་ཉེན་རྟོག་ཁང་དུ་ཆུ་ཚོད་བཞི་རིང་བཀག་ཉར་བྱས་རྗེས་ཉེས་འཛུགས་གང་ཡང་མ་བྱས་པར་གློད་གྲོལ་བཏང་འདུག དེ་ཡང་ཉེན་རྟོག་པས་བོད་དོན་ལས་འགུལ་བ་ཚོར་ཁོ་ཚོ་ཉེན་རྟོག་ཁང་དུ་བཀག་ཉར་བྱས་པའི་རྒྱུ་མཚན་གང་ཡང་མེད་པ་དང་། ཁོ་ཚོ་ཉེན་རྟོག་ཁང་དུ་འཁྲིད་པར་རྒྱུ་མཚན་དགོས་ཀྱི་མེད་སྐོར་བརྗོད་ཡོད་འདུག 

མཛད་སྒོར་རྒྱལ་སྤྱིའི་ཨོ་རྩལ་ལྷན་ཚོགས་ཀྱི་ཚོགས་གཙོ་ཐཱོ་མེ་སེ་བྷ་ཆེ་དང་། གྷེ་རི་སེའི་སྲིད་འཛིན་ཡང་སླེབས་ཡོད་པ་རེད། 

ཚེས་༡༩ ཉིན་ཨོ་རྩལ་གྱི་དཔལ་འབར་དེ་རྒྱ་ནག་གི་སྐུ་ཚབ་ལ་རྩིས་སྤྲོད་བྱེད་རྒྱུ་ཡིན་འདུག་པ་དང་། ཚེས་༢༠ ཉིན་རྒྱ་ནག་གི་རྒྱལ་ས་པེ་ཅིང་དུ་འབྱོར་འཆར་ཡོད་པས། ཚེས་༡༩ ཉིན་རྒྱ་གར་བོད་རང་བཙན་སློབ་ཕྲུག་ཚོགས་པས་ཨོ་རྩལ་དཔལ་འབར་རྩིས་སྤྲོད་ཉིན་མོ་དང་བསྟུན་ནས། བཞུགས་སྒར་རྡ་ས་མེག་གྷན་གྱི་ཁྲོམ་གཞུང་དུ་ཕྱི་ལོ་༢༠༢༢ ལོའི་པེ་ཅིང་ཨོ་རྩལ་འགྲན་ཚོགས་ལ་ངོ་རྒོལ་གྱི་སྟོད་ཐུང་གྱོན་ནས་ལས་འགུལ་སྤེལ་སོང་།།

གསར་འགོད་པ་སྐལ་བཟང་དོན་གྲུབ།