བོད་ནང་གི་འཛམ་གླིང་ཐོག་ས་བབ་མཐོ་ཤོས་ཀྱི་མདོག་གསུམ་མཚེའུ་དང་འཁྱག་རོམ་ཕུག་པ།
ཕྱི་༨ པའི་ཚེས་༡ ཉིན་བོད་ནང་གི་ཆབ་མདོ་ས་ཁུལ་དཔལ་འབར་རྫོང་གི་ཁོངས་གཏོགས་སུ་ཡོད་པའི་མཚེའུ་གསུམ་དང་འཁྱག་རོམ་རིམ་པ་གཉིས་ཅན་གྱི་ཕུག་པ་ཞིག་ལ་འཛམ་གླིང་ཐོག་གི་ས་བབ་ཆེས་མཐོ་བའི་མདོག་གསུམ་མཚེའུ་དང་། བོད་ནང་གི་གཞི་རྒྱ་ཆེ་བའི་འཁྱག་རོམ་ཕུག་པའི་ནང་གི་གཅིག་བཅས་ཀྱི་འཛམ་གླིང་གི་ཟིན་ཐོའི་དཔང་ཡིག་ཐོབ་ཡོད་འདུག བར་ཐག་ཉེ་བའི་མཚེའུ་གསུམ་གྱི་མདོག་ནི་སེར་པོ་དང་ནག་པོ། སྔོན་པོ་བཅས་ཡིན་འདུག་ལ། འཁྱག་རོམ་གྱི་ཕུག་པ་རིམ་པ་གཉིས་ཅན་དེའི་ནང་དུ་དུང་དཀར་དབྱིབས་ངོ་མཚར་བ་ཞིག་ཀྱང་ཡོད་འདུག གཞན་ཡང་ཉེ་ཆར་སྙན་གྲགས་ཆེ་བའི་ཚན་རིག་ལོ་དེབ་དང་གནའ་དཔྱད་རིག་པ་སོགས་ཀྱི་བརྒྱུད་ལམ་ཁག་མང་པོའི་ཐོག་འཛམ་གླིང་ཐོག་གི་ཆེས་རྙིང་ཤོས་ཡིན་པའི་བོད་ཀྱི་རྡོ་ཁབ་སྐོར་བཀོད་དང་འགོད་བཞིན་འདུག བོད་ཀྱི་རྡོ་ཁབ་དེ་༢༠༢༠ ལོར་བོད་མངའ་རིས་རུ་ཐོག་ནང་གི་(xiada ཞ་བྲག་?)མཚོ་ཞེས་པ་ཞིག་གི་ནང་ནས་རྙེད་འདུག་པ་དང་། ཚན་རིག་པས་ཞིབ་འཇུག་བྱས་པ་བརྒྱུད་རྡོ་ཁབ་དེ་ད་བར་ལོ་༩༠༠༠ ཕྱིན་པར་བརྗོད། སྤྱིར་འཛམ་གླིང་ཐོག་གི་ཁབ་རྙིང་ཤོས་དེ་སེམས་ཅན་གྱི་རུས་པ་ལས་བཟོས་པའི་ཁབ་ཡིན་འདུག་ལ། དེ་ཡང་རུས་ཁབ་རྙིང་ཤོས་དེ་ལོ་༦༠༠༠༠ སོང་བར་གྲགས་པ་ཞིག་ཨ་ཧྥི་རི་ཀའི་ནང་ནས་རྙེད་ཡོད་འདུག་ལ། དེའི་རྗེས་ནས་ལོ་༥༠༠༠༠ ཕྱིན་པའི་རུས་ཁབ་ར་ཤི་ཡ་ནས་རྙེད་ཡོད་འདུག སྔོན་ཆད་རྡོ་ཁབ་རྙིང་ཤོས་དེ་རྒྱ་ནག་ཧི་ནན་ནས་རྙེད་པར་བརྗོད་ཅིང་ལོ་༢༧༠༠ ཕྱིན་པར་བརྗོད། འོན་ཀྱང་བོད་ཀྱི་རྡོ་ཁབ་ནི་དེ་ལས་ལྡབ་མང་པོས་རྙིང་ཡོད་པ་རེད། རྡོ་ཁབ་ཀྱི་ངོས་སུ་ཚོན་དམར་པོ་བྱུགས་ཡོད་འདུག་པས་དེ་ནི་ལོ་༤༥༠༠ ཡི་སྔོན་ནས་བོད་མཐོ་སྒང་དུ་ས་ཚོན་ནམ་བཙག་བེད་སྤྱོད་བྱེད་ཀྱི་ཡོད་པ་རྟོགས་ཐུབ་པ་དང་། དེ་ཡང་རིག་གཞུང་གི་མཚོན་རྟགས་ཤིག་ཡིན་པར་བརྗོད་འདུག
གསར་འགོད་པ། བསྟན་འཛིན་ལམ་བཟང་།
གསར་འགོད་པ། བསྟན་འཛིན་ལམ་བཟང་།
