བོད་ནང་གི་རྩ་དོན་ལས་འགུལ་བཙན་བྱོལ་ནང་ནས་བེད་སྤྱོད་ལོག་པ་གཏོང་མི་རུང་།

གཞུང་འབྲེལ་མཛད་སྒོའི་ཐོག་བོད་ནང་གི་རྩ་དོན་ལས་འགུལ་དང་བཙན་འབྱོལ་སྒྲིག་འཛུགས་དབར་འབྲེལ་བ་ཡོད་ཚུལ་ངོས་ལེན་བྱས་པ་དེས་འཐབ་རྩོད་ལ་དོ་ཕོག་ཚབ་ཆེན་བཏང་ཡོད།

སྐབས་༡༧ པའི་བོད་མི་མང་སྤྱི་འཐུས་རྒྱལ་ལྡོང་ཕུར་པ་རྡོ་རྗེ།

སྐུ་ངོ་སྤེན་པ་ཚེ་རིང་གིས་ཉེ་སྔོན་བཙན་འབྱོལ་བོད་མིའི་མང་གཙོ་དུས་ཆེན་གྱི་བཀའ་ཤག་གི་གསུང་འཕྲིན་ནང་དུ། “བོད་ནང་ནས་དཀའ་རྙོག་དེ་འཕྲལ་དུ་སེལ་མ་ཐུབ་ཚེ་རྩ་དོན་ལས་འགུལ་སྤེལ་མཚམས་འཇོག་རྒྱུ་ཡིན་ལུགས་ཀྱི་བརྡ་ལན་འབྱོར་བྱུང་”ཞེས། ནང་ཁུལ་དུ་འཇིགས་སྐུལ་བྱེད་རྒྱུ་ཁོ་ནའི་ཆེད་བོད་ནང་དུ་བྱུང་བའི་རྩ་དོན་ལས་འགུལ་དང་བཙན་འབྱོལ་བོད་མི་སྒྲིག་འཛུགས་དབར་འབྲེལ་བ་ཡོད་པའི་སྐོར་ཡོངས་གྲགས་བྱས་བྱུང་། དེ་བཞིན་ནོར་ཝེ་རླུང་འཕྲིན་ཁང་གི་བཅར་འདྲི་ཞིག་གི་ནང་དུའང་གཅིག་མཚུངས་བཤད་བྱུང་། དེ་ནི་བཀའ་ཤག་སྐབས་གོང་མ་རྣམས་ཀྱིས་གཞིས་ལུས་བོད་མིར་སྐུ་ལུས་ཞུགས་འབུལ་གྱིས་མཚོན་པའི་ལས་འགུལ་སྤེལ་རྒྱུར་བརྒྱུད་སྐུལ་བྱེད་ཀྱི་མེད་ཅེས་པའི་བཞེངས་ཕྱོགས་དང་རྦད་དེ་འགལ་ཞིང་། ལྷག་པར་༧སྤྱི་ནོར་གོང་ས་རྒྱལ་བ་རིན་པོ་ཆེར་རྒྱ་གཞུང་གིས་གཞི་མེད་སྙོན་འཛུགས་དང་སྐུར་འདེབས་བྱས་པར་གཞོགས་འདེགས་བྱས་པ་ཞིག་ཀྱང་ཆགས་ཡོད།

བོད་ནང་དུ་ཡོད་པའི་གཞིས་ལུས་རྒྱ་ཆེ་མི་མང་གིས་ད་བར་རྒྱ་གཞུང་གི་དྲག་གནོད་ལ་འཛེམ་ཟོན་མེད་པའི་ཐོག་ནས་སྐུ་ལུས་ཞུགས་འབུལ་གྱིས་གཙོས་པའི་ཞི་བའི་ངོ་རྒོལ་གྱི་ལས་འགུལ་རབ་དང་རིམ་པ་སྤེལ་ཡོད། དེ་ཡང་བཙན་བྱོལ་ནང་ནས་ལས་དོན་བྱེད་སྟངས་ཡག་བཙོག་ལ་བལྟས་ནས་བོད་ནང་གི་ལས་འགུལ་སྤེལ་བ་དང་མཚམས་འཇོག་བྱེད་པ་ཞིག་ཆགས་ཀྱི་མེད། བོད་ནང་དུ་བྱུང་བའི་ཞི་རྒོལ་ལས་འགུལ་ཁག་གི་ཁྱད་ཆོས་གཅིག་ནི་ཚོགས་པ་དང་སྒྲིག་འཛུགས་སམ། ཡང་ན་དབང་ཤུགས་ལྡན་པའི་མི་སྣ་བྱེ་བྲག་པ་གང་རུང་གི་བརྒྱུད་སྐུལ་སོགས་ལ་བརྟེན་ནས་བྱུང་བ་ཞིག་གཏན་ནས་མ་ཡིན་པར། ཚང་མས་མ་བགྲོས་བསམ་པ་གཅིག་མཐུན་དང་མ་སྐུལ་དྭང་བླངས་ཀྱི་ཐོག་ནས་སྤེལ་བ་ཤ་སྟག་ཆགས་ཡོད། དེ་མཚུངས་བཙན་འབྱོལ་བོད་མིའི་སྒྲིག་འཛུགས་ཀྱི་ངོས་ནས་ཀྱང་གཞིས་ལུས་བོད་མིས་ལས་འགུལ་སྤེལ་བར་དུས་ནམ་ཡང་བརྒྱུད་སྐུལ་བྱེད་ཀྱི་མེད་པའི་བཞེངས་ཕྱོགས་གསལ་པོ་རེད། དེ་ལ་བརྟེན་ནས་རྒྱལ་སྤྱིའི་སྤྱི་ཚོགས་ཀྱི་ངོས་འཛིན་གནང་ཕྱོགས་ཐད་ལའང་གདེང་འཇོག་གང་མཚམས་ཤིག་ཐེབས་ཐུབ་ཡོད།

འོན་ཀྱང་། རྒྱ་གཞུང་གིས་རྒྱལ་སྤྱིའི་སྤྱི་ཚོགས་ལ་བོད་ནང་དུ་བྱུང་བའི་ཞི་རྒོལ་དང་འབྲེལ་བའི་ཐད་གསལ་བཤད་བྱེད་དུས། རྣམ་ཀུན་བོད་ནང་གི་བོད་མི་རྣམས་ཀྱི་འཚོ་བ་ཡར་རྒྱས་ཕྱིན་ཡོད་ཚུལ་དང་། བོད་ནང་དུ་བྱུང་བའི་“ཟིང་འཁྲུག་”ཡོངས་སུ་རྫོགས་པ་དེ་“ཁ་བྲལ་རིང་ལུགས་”དང་“ཏཱ་ལའི་བླ་མ་”ཡིས་“ངན་སྐུལ་”བྱས་པར་བརྟེན་ནས་ཡོང་གི་ཡོད་ཚུལ་སོགས་སྒྲོག་གི་ཡོད། ད་ལན་སྐུ་ངོ་སྤེན་པ་ཚེ་རིང་གིས་མང་གཙོའི་དུས་ཆེན་གྱི་སྡིངས་ཆ་བེད་སྤྱོད་བཏང་སྟེ་ཡོངས་གྲགས་བྱས་པའི་གནད་དོན་དེ་ནི། ཏག་ཏག་ང་ཚོ་བཙན་འབྱོལ་སྒྲིག་འཛུགས་འདི་ཉིད་རྒྱ་གཞུང་གིས་སྙོན་འཛུགས་བྱས་པ་ཇི་བཞིན། བོད་ནང་གི་ལས་འགུལ་རྣམས་དང་ཐད་ཀར་འབྲེལ་བ་ཡོད་ཅེས་ཞྭ་མོ་ནག་པོ་ཞིག་ཁོ་རང་སྒེར་གྱིས་མ་སྐུལ་དྭང་བླངས་ཀྱིས་གྱོན་པ་མ་ཟད། བཙན་འབྱོལ་བོད་མིའི་རྟེན་གཞིར་གྱུར་པའི་སྒྲིག་འཛུགས་འདི་ཉིད་ལའང་བཙན་གྱིས་གཡོགས་ཏེ་བོད་སྤྱི་པའི་རྩ་དོན་འཐབ་རྩོད་ལ་དོ་ཕོག་ཚབ་ཆེན་བཏང་ཡོད།

འདས་པའི་བྱུང་རིམ་ནང་དུ་ཕྱི་མིག་ཅིག་བལྟས་ན། སྐུ་ངོ་སྤེན་པ་ཚེ་རིང་གིས་ད་ལན་རྒྱ་གཞུང་ལ་ལག་པ་འཆང་སའི་ལག་ཆ་སྤྲད་པའི་གནས་སྟངས་དེ་ནི་ཐོག་དང་པོ་ཆགས་མེད། དེའང་ཕྱི་ལོ་༢༠༡༣ ལོར་མདོ་སྨད་ཀྱི་སྤྱི་ཟུར་ཞིག་གིས་རང་ལུས་མེར་སྲེག་དང་འབྲེལ་བའི་ལམ་སྟོན་ཡིག་ཆ་ཞིག་འབྲི་རྩོམ་གནང་སྟེ་བཀྲམས་མྱོང་ཡོད་ཅིང་། དུས་དེ་ནས་བཟུང་རྒྱ་གཞུང་གིས་རྒྱལ་སྤྱིའི་སྤྱི་ཚོགས་ཁྲོད་དུ་“ལམ་སྟོན་”དེ་ཉིད་ཡང་དང་བསྐྱར་དུ་བེད་སྤྱོད་མང་པོ་བཏང་བ་བརྒྱུད་ལམ་ཁག་ཏུ་གཟིགས་རྒྱུ་ཡོད། དེ་ནི་“ཙི་ཙིའི་རིལ་མ་གཅིག་གིས་ཐུག་པ་ཆ་ཚང་བརྫད།”ཟེར་བའི་དཔེ་ཇི་བཞིན། མི་གཅིག་གི་བྱས་ཉེས་ལ་བརྟེན་ནས་བཙན་འབྱོལ་བ་ཡོངས་ལ་ཞྭ་མོ་ནག་པོ་ཞིག་གཡོགས་པའི་གནས་སྟངས་ཤིག་ཀྱང་ཆགས་མྱོང་།

སྒྲིག་འཛུགས་ཤིག་གི་མགོ་འཁྲིད་མཁན་གྱི་གང་ཟག་ཅིག་ལ་མཚོན་ན། ཉུང་མཐར་སྒྲིག་འཛུགས་ཀྱི་ལང་ཕྱོགས་གང་ཡིན་པ་དེའི་ཐོག་བབ་རླིང་བརྟན་གསུམ་དུ་གནས་ཤེས་དགོས་མོད། འོན་ཀྱང་། ད་ལན་སྐུ་ངོ་སྤེན་པ་ཚེ་རིང་གིས་སོ་སོའི་འདོད་འདུན་ལྟར་ནང་ཁུལ་དུ་འཇིགས་སྐུལ་དང་འབུར་འཇོམས་གཏོང་ཆེད་སྤྱི་པའི་སྒྲིག་འཛུགས་ཀྱི་ལང་ཕྱོགས་བློས་གཏོང་བྱས་པ་ནི་ཧ་ཅང་གི་ཕམ་པོ་ཞིག་ཆགས་ཡོད་ལ། དེས་སྐུ་ངོ་ཁོང་གི་འདོད་འདུན་ལྟར་ནང་ཁུལ་དུ་འཇིགས་སྐུལ་མ་ཐེབས་པའི་ཁར་རྒྱ་གཞུང་ལའང་གཞུང་འབྲེལ་གྱི་ཐོག་ནས་ལག་ཆ་ཚད་མཐོན་པོ་ཞིག་སྤྲད་པའི་གནས་སྟངས་ཆགས་ཡོད་པས། གང་ཟག་སུ་ཞིག་ཡིན་རུང་གུ་ཡངས་གཏན་ནས་གཏོང་ཐབས་བྲལ་བ་ཞིག་ཡིན་མོད། འོན་ཀྱང་དུས་ཚོད་ཅེས་པ་དེ་ནི་ཕྱི་ནུར་རྒྱག་རྒྱུ་མེད་པས་གནད་དོན་འདིར་སྔ་འགྱོད་ཕྱི་སྡོམ་གྱི་སྒོ་ནས་བླང་དོན་འཛོལ་མེད་བྱེད་ཐབས་ལས་འདེམས་ཀ་གཞན་ཞིག་ལུས་མེད་དོ། །