བོད་ནང་རྒྱ་གཞུང་གི་སྲིད་བྱུས་ལ་ངོ་རྒོལ་བྱས་འདུག

ཟླ་འདིའི་ཚེས་༢༨ ཉིན་བྷི་བྷི་སི་གསར་ཁང་གི་གནས་ཚུལ་སྤེལ་གསལ་ལྟར་ན། མི་མང་རྒྱ་ཕྲག་ཁ་ཤས་ཀྱིས་བོད་ཀྱི་རྒྱལ་ས་ལྷ་ས་ལ་རྒྱ་ནག་གཞུང་གི་ཏོག་དབྱིབས་གཉན་རིམས་ཀླད་ཀོར་ཞེས་པའི་སྲིད་བྱུས་ལ་ངོ་རྒོལ་བྱས་ཡོད་པའི་གནས་ཚུལ་ཐོན་འདུག

བོད་ནི་དམ་དྲག་ཧ་ཅང་ཆེ་བའི་ས་ཁུལ་ཅིག་ཡིན་པ་དང་ལྷག་པར་དུ་ཏིག་དབྱིབས་གཉན་རིམས་ཁྱབ་བརྡལ་ཕྱིན་པའི་དབང་གིས་རྒྱ་ནག་གཞུང་གིས་སྒོ་རྒྱ་བསྡམས་ནས་ད་བར་ཟླ་བ་གསུམ་མ་ཟིན་ཙམ་འགྲོ་བཞིན་ཡོད་པར་བརྟེན། བདུན་འདིའི་རེས་གཟའ་ལྷག་པའི་ཕྱི་དྲོ་མི་མང་བརྒྱ་ཕྲག་ཁ་ཤས་ཀྱིས་བོད་ཀྱི་རྒྱལ་ས་ལྷ་ས་ལ་རྒྱ་ནག་གཞུང་གི་ཏོག་དབྱིབས་གཉན་རིམས་ཀླད་ཀོར་ཞེས་པའི་དམ་དྲག་དང་གདུག་རྩུབ་ཆེ་བའི་སྲིད་བྱུས་ལ་ངོ་རྒོལ་བྱས་ཡོད་པ་དང་། སྐབས་དེར་ལས་འགུལ་བ་ཚོ་དང་རྒྱ་ནག་གི་ཉེན་རྟོག་པ་ཚོའི་བར་ལ་གདོང་ཐུག་བྱུང་བཞིན་ཡོད་པའི་བརྙན་ཐུང་ཁག་ཅིག་ཕྱིར་ཐོན་ཡོད་པ་དང་། རྒྱ་ནག་གཞུང་ལ་ངོ་རྒོལ་བྱས་པའི་བརྙན་ཐུང་དེ་དག་རྒྱ་གཞུང་གིས་རྒྱ་ནག་གི་སྤྱི་ཚོགས་བརྒྱུད་ལམ་ཁག་ནས་མེད་པ་བཟོས་ཡོད་ཀྱང་། མི་མང་པོས་བརྙན་ཐུང་དེ་དག་སླར་ཡང་ཊི་ཝེ་ཊར་ཐོག་ཏུ་སྤེལ་ཡོད་པའི་གནས་ཚུལ་ཐོན་འདུག

ཕྱི་ལོ་༢༠༠༨ ལོར་བོད་ནང་ལ་གཞི་རྒྱ་ཆེ་བའི་ཞི་བའི་ངོ་རྒོལ་གྱི་ལས་འགུལ་ཅིག་སྤེལ་ཡོད་པ་དང་སྐབས་དེར་ཉུང་མཐའ་ལ་བོད་མི་༡༩ བསད་ཡོད་རབས་དང་། དུས་དེ་ནས་བཟུང་བདུན་འདིའི་རེས་གཟའ་ལྷག་པའི་ཉིན་གྱི་ངོ་རྒོལ་གྱི་ལས་འགུལ་དེ་ནི་ལས་འགུལ་གཞི་རྒྱ་ཆེ་ཤོས་ཤིག་ཡིན་པ་དང་། ལྷག་པར་དུ་ཐེངས་འདིའི་ངོ་རྒོལ་བྱེད་མཁན་མང་ཆེ་བ་ནི་རྒྱ་ནག་ནས་བོད་དུ་ལས་ཀ་བྱེད་དུ་ཡོང་མཁན་གྱི་ལས་མི་ཡིན་རབས་ཀྱི་གནས་ཚུལ་སྤེལ་འདུག

གསར་འགྱུར་བརྒྱུད་ལམ་གཞན་གྱི་ནང་དུ་གནས་ཚུལ་སྤེལ་གསལ་ལ་ལྟར་ན། ངོ་རྒོལ་གྱི་ལས་འགུལ་སྤེལ་ས་ནི་བོད་ཀྱི་རྒྱལ་ས་ལྷ་སའི་ལྕགས་རོང་གཞིས་ཁུལ་དང་བརྒྱད་གཅིག་ལམ་གཉིས་སུ་ཡིན་པ་དང་། རྒྱ་ནག་དམར་ཤོག་ཚོགས་པའི་ཚོགས་ཆེན་ཐེངས་ཉི་ཤུ་པ་དེ་ཉིད་མཇུག་སྒྲིལ་ཟིན་ན་ཡང་། བོད་ནང་ལ་སྒོ་རྒྱ་བསྡམས་པའི་སྲིད་བྱུས་མུ་མཐུད་ལག་བསྟར་བྱེད་བཞིན་པའི་རྐྱེན་གྱིས་བོད་མི་རྣམས་འུ་ཐུག་ནས་ངོ་རྒོལ་གྱི་ལས་འགུལ་དེ་སྤེལ་ཡོད་རབས་བརྗོད་འདུག

ལོ་འདིའི་ཕྱི་ཟླ་བརྒྱད་པ་ནས་རྒྱ་ནག་གཞུང་གི་བོད་ནང་ལ་རིམས་ནད་ཚོད་འཛིན་གྱི་མིང་ཐོག་ནས་དམ་དྲག་ཚོད་མེད་བྱས་པར་བརྟེན་ཉིན་གསུམ་གྱི་རིང་ལྷ་ས་ལ་བོད་མི་ལྔ་ཡིས་རང་ཤི་བརྒྱབ་པ་སོགས་ཀྱི་གནས་ཚུལ་ཐོན་ཡོད། ས་གནས་དཔོན་པོ་ཚོས་རྒྱ་ནག་དམར་ཤོག་ཚོགས་པའི་ཚོགས་ཆེན་མ་ཚར་བར་དུ་བཟོད་སྒོམ་བྱེད་དགོས་རབས་བརྗོད་ཡོད་ཀྱང་། ཚོགས་ཆེན་ཚར་ཡང་སྲིད་བྱུས་དང་དམ་དྲག་ལ་འགྱུར་བ་གང་ཡང་ཕྱིན་མེད་པར་བརྟེན། བོད་མི་ཚོ་འུ་ཐུག་ནས་ས་གནས་འགོ་ཁྲིད་ཚོས་ཁ་དན་ཚིག་ལ་གནས་དགོས་པ་དང་མི་མང་གི་འཚོ་བ་དང་སེམས་ཁམས་ཀྱི་དཀའ་ངལ་ལ་བསམ་གཞིགས་བྱེད་དགོས་ཞེས་ངོ་རྒོལ་བྱས་ཡོད་པ་དང་། ངོ་རྒོལ་བ་ཁ་ཤས་ཀྱིས་དམ་དྲག་གི་སྲིད་བྱུས་དེ་ཕྱིར་འཐེན་མ་བྱས་ན་རང་ཤི་རྒྱག་གི་ཡིན་ཞེས་བརྗོད་ཡོད་པའི་གནས་ཚུལ་ཐོན་འདུག །

གསར་འགོད་པ། བློ་བཟང་རྒྱ་མཚོ།