བོད་པའི་སློབ་མ་གཉིས་ལ་གསེར་གྱི་གཟེངས་རྟགས་ཐོབ་འདུག
རྒྱ་གར་ལྷོ་ཕྱོགས་སུ་རྟེན་གཞི་བྱས་པའི་(St. Philomena’s college)མཐོ་སློབ་ཁང་གི་བསླབ་པ་མཐར་སོན་གྱི་མཛད་སྒོའི་སྐབས་སུ། བརྩོན་འགྲུས་བཟང་མོ་དང་བདེ་སྐྱིད་བཟང་མོ་གཉིས་ལ་གཙུག་ལག་རབ་འབྱམས་པའི་གསེར་གྱི་གཟེངས་རྟགས་ཐོབ་འདུག
བརྩོན་འགྲུས་བཟང་མོ་ཡིས་མཐོ་སློབ་འདིར་ཚོང་ལས་རིག་པའི་ཐོག་གཙུག་ལག་རབ་འབྱམས་པའི་སློབ་མཐར་སོན་ཞིང་། ཁོང་ནི་རྒྱ་གར་བྱང་ཕྱོགས་ལ་དྭགས་སུ་སྐྱེས་ཤིང་། འཛིན་རིམ་བཅུ་པ་བར་ལ་དྭགས་བོད་ཁྱིམ་སློབ་གྲྭར་སློབ་གཉེར་གནང་། དེ་རྗེས་རྡ་སྟེང་བོད་ཁྱིམ་སློབ་གྲྭའི་ནང་ཚོང་རིག་སྡེ་ཚན་ཐོག་སློབ་མཐར་སོན་པའི་རྗེས། བྷེང་ལོར་དུ་རྟེན་གཞི་བྱས་པའི་༸ཏཱའི་བླ་མའི་མཐོ་སློབ་ཁང་ཏུ་ཚོང་རིག་ཐོག་(B.Com) ཉེ་བའི་གཙུག་ལག་རབ་འབྱམས་པའི་སློབ་མཐར་སོན། དེ་ནས་༢༠༢༡ ལོའི་སྤྱི་ཟླ་༩ པའི་ནང་St. Philomena’s college མཐོ་སློབ་ནས་སློབ་ཚན་དེའི་ཐོག་བརྒྱ་༩༡།༠༥% ཐོབ་ནས་ཚོང་ལས་རིག་པའི་ཐོག་གཙུག་ལག་རབ་འབྱམས་པའི་སློབ་མཐར་ཕྱིན་ཏེ། ད་ལྟའི་ཆར་བོད་ཀྱི་སྨན་རྩིས་ཁང་དུ་རྩིས་པའི་ཕྱག་ལས་གནང་མུས་ཡིན་འདུག
དེ་བཞིན་བདེ་སྐྱིད་བཟང་མོ་ནི་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་ཆགས་སུ་སྐྱེས་ཤིང་། མོན་གྷོ་གཏན་སློབ་ཏུ་གཞི་རིམ་འོག་མ་དང་གོང་མ་གཉིས་ཀྱི་སློབ་གཉེར་བྱས་པའི་རྗེས། ལྡི་ལི་མཐོ་སློབ་ཏུ་དབྱིན་ཡིག་སློབ་ཚན་ཐོག་ཉེ་བའི་གཙུག་ལག་རབ་འབྱམས་པའི་སློབ་མཐར་སོན། མུ་མཐུད་ St. Philomena’s college མཐོ་སློབ་ཏུ་ལོ་གཉིས་རིང་དབྱིན་ཡིག་ཐོག་གཙུག་ལག་རབ་འབྱམས་པའི་སློབ་གཉེར་གནང་བའི་རྗེས། སློབ་ཚན་དེའི་ཐོག་བརྒྱ་ཆ་༨༨།༠༥% ལོན་ཏེ་སློབ་མ་རྩེ་ཕུད་ཀྱི་གཟེངས་རྟགས་ཐོབ་ནས་བསླབ་པ་མཐར་སོན་བྱུང་འདུག་ཅིང་། ད་ལྟའི་ཆར་ཁོང་མོ་དགེ་རྒན་འོས་སྦྱོང་ནང་མཉམ་ཞུགས་གནང་འཆར་ཡོད་འདུག །
གསར་འགོད་པ་སྐལ་བཟང་དོན་གྲུབ།
