བོད་མཚོ་སྔོན་ཕྱོགས་སུ་དྲག་ཆར་གྱིས་མི་རྒྱུ་ཟོག་གསུམ་ལ་གོད་ཆག་ཆེན་པོ་བཟོས་འདུག
དེ་རིང་བོད་ཀྱི་ནང་གི་བརྒྱུད་ལམ་ཁག་གི་གནས་ཚུལ་ལྟར་ན། ཟླ་འདིའི་ཕྱི་ཚེས་༡ དགོང་མོ་ནས་བོད་མཚོ་སྔོན་ཕྱོགས་སུ་དྲག་ཆར་ཤུགས་ཆེན་བབས་ཏེ་མི་རྒྱུ་ཟོག་གསུམ་ལ་གོད་ཆག་ཆེན་པོ་བཟོས་འདུག ཐེངས་འདིར་དྲག་ཆར་འབབ་ས་གཙོ་བོ་བོད་ནང་གི་ས་ཆ་མཚོ་སྔོན་ཞིང་ཆེན་གྱི་མཚོ་ལྷོ་དང་མཚོ་བྱང་། དེ་བཞིན་མཚོ་ཤར་སོགས་ཀྱི་ས་ཁུལ་ཁག་ཏུ་ཡིན་འདུག་པ་དང་། ཕྱི་ཚེས་ ༢ ཉིན་མཚོ་ལྷོ་ཁུལ་གསེར་ཆེན་རྫོང་། རྨ་ལྷོ་ཁུལ་རྩེ་ཁོག་རྫོང་སོགས་ཀྱི་སྡེ་པ་མང་པོ་ལ་ཆུ་ལོག་བརྒྱུགས་ཏེ་མི་རྒྱུ་ཟོག་གསུམ་ལ་གནོད་སྐྱོན་ཆེན་པོ་བཟོས་འདུག དེ་ཡང་ད་བར་རླངས་འཁོར་ཞིག་གི་ནང་མི་༥ དང་ཆུས་ཁྱེར་བ་གཅིག་བཅས་མི་༦ གི་ཚེ་སྲོག་ཤོར་ཡོད་པར་རྗོད་ཀྱི་འདུག་ལ། གཞན་ཡང་ས་ཆ་ཁ་ཤས་སུ་ལུག་གཙོས་པའི་སེམས་ཅན་མང་པོ་ཆུའི་ཁྱེར་བའི་རོ་གང་སར་ནས་མཐོང་རྒྱུ་ཡོད་པ་མ་ཟད། ཟམ་པ་དང་ལམ་ཆད་པ། ཁང་པ་གཏོར་བ་སོགས་ཀྱི་མང་པོ་ཡང་མཐོང་རྒྱུ་འདུག དེ་བཞིན་ཟི་ལིང་ཕྱོགས་སུ་ཡང་ཆུ་ལོགས་ཀྱིས་གཞུང་ལམ་སོགས་ལ་གནོད་འཚེ་ཆེན་པོ་བཟོས་འདུག མཚོ་སྔོན་གྱི་གནམ་གཤིས་ལས་ཁུངས་ཀྱིས་ཕྱི་ཚེས་ ༣ ནས་ ༥ བར་མཚོ་སྔོན་གྱི་ཕྱོགས་མང་པོར་སེར་བ་དང་དྲག་ཆར་འབབ་རྒྱུ་དང་། དེས་རྐྱེན་གྱིས་ཆུ་ལོག་དང་འདམ་རུད་སོགས་ཀྱི་གནོད་འཚེ་ཡོང་རྒྱུའི་ཉེན་བརྡ་བཏང་ཡོད་འདུག བོད་མི་ཞིག་གིས་དྲྭ་ལམ་དུ་གནམ་གཤིས་ལས་ཁུངས་ཀྱིས་བཤད་པའི་དྲག་ཆར་འབབ་ཚད་ལ་གཞིགས་ན་ད་བར་དེ་འདྲ་འབབ་མྱོང་མེད་པར་རྗོད་ཀྱི་འདུག
གསར་འགོད་པ། བསྟན་འཛིན་ལམ་བཟང་།
