བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བརྒྱད་པ་དབུ་འཛུགས་དང་དཔལ་ལྡན་ཚོགས་གཙོའི་གསུང་བཤད།

ཟླ་འདིའི་ཚེས་༡༡ ་ཉིན་གྱི་ཞོགས་པར་ཉིན་གྲངས་བརྒྱད་རིང་གི་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བརྒྱད་པ་དེ་དཔལ་ལྡན་ཚོགས་གཙོ་དབུ་བཞུགས་ཐོག་དབུ་འཛུགས་གནང་སོང་།

ཚོགས་འདུའི་ལས་རིམ་གསུམ་པར་དཔལ་ལྡན་ཚོགས་གཙོས་ཚོགས་འདུ་དབུ་འཛུགས་ཀྱི་གསུང་བཤད་གནང་སྐབས། ཁོང་གིས་གྲོས་ཚོགས་ཚོགས་དུས་བརྒྱད་པ་དེ་ཕྱི་ཟླ་དགུ་པའི་གྲོས་ཚོགས་ཆགས་ཀྱི་ཡོད་པ་དང་། ལོ་གཅིག་ལ་གྲོས་ཚོགས་ཐེངས་གཉིས་ལས་ཕྱི་ཟླ་གསུམ་པའི་གྲོས་ཚོགས་དེ་སྔོན་རྩིས་གྲོས་ཚོགས་དང་ཕྱི་ཟླ་དགུ་པའི་གྲོས་ཚོགས་དེ་ལས་བསྡོམས་ཀྱི་གྲོས་ཚོགས་ཆགས་ཀྱི་ཡོད་པས། ཐེངས་འདིའི་གྲོས་ཚོགས་ནང་སྤྱི་འཐུས་ཚོས་ལས་ཉིན་མང་བ་དེ་ཕྱི་ལོ་༢༠༢༣ ནས་༢༠༢༤ ཡི་འཛིན་སྐྱོང་གི་ལས་བསྡོམས་ཐོག་ལ་གཏོང་དགོས་པ་ཆགས་ཀྱི་ཡོད་པ།

དེ་བཞིན་བར་སྐབས་༧གོང་ས་མཆོག་ཞབས་པུས་སྨན་བཅོས་ཆེད་དུ་ཨ་རིར་ཆིབས་སྒྱུར་གནང་བ་དང་། སྨན་བཅོས་ལེགས་གྲུབ་བྱུང་ནས་ཨ་རི་ལ་ཟླ་བ་གཉིས་ཙམ་རིང་སྐུ་ངལ་གསོས་རྗེས། ཨ་རིའི་ནིའུ་ཡོག་ནས་སུད་སི། དེ་ནས་བཞུགས་སྒར་རྡ་སར་བདེ་བླག་ངང་ཆིབས་བསྒྱུར་གནང་ཐུབ་པ་བྱུང་བ། ཉེ་ཆར་མོན་ཡུལ་གྱི་ལྷ་སྡེ་མི་སྡེ་ཡོངས་ཀྱིས་༧གོང་ས་མཆོག་ལ་བརྟན་བཞུགས་བསྟར་འབུལ་དང་། ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་ཆེད་བཅར་གྱིས་༧གོང་ས་མཆོག་གི་གོ་སྟོན་སྲུང་བརྩིའི་མཛད་སྒོ་ཚོགས་པ་སོགས་སྐལ་བ་བཟང་པོ་བྱུང་ཡོད་པ་དང་། རྒྱུན་དུ་༧གོང་ས་མཆོག་གིས་དགུང་ལོ་བརྒྱ་དང་བཅུ་ཕྲག་ཁ་ཤས་བཞུགས་རྒྱུའི་ཞལ་བཞེས་གནང་ཡོད་པ་ལྟར་མུ་མཐུད་གསོལ་འདེབས་ཞུ་རྒྱུ་དང་བོད་མི་སྤྱི་མཐུན་གྱི་བསོད་ནམས་གོང་འཕེལ་གཏོང་ཐུབ་དགོས་རྒྱུ་གལ་ཆེན་ཡིན་པ། ༧གོང་ས་མཆོག་གི་ཐུགས་བསྐྱེད་དམ་བཅའ་བཞིས་མཚོན་པའི་ཁོང་གི་དགོངས་གཞིའི་ཐོག་ལ་འགན་འཁུར་བཞེས་ཐུབ་དགོས་རྒྱུ་གལ་ཆེན་ཡིན་པ་སོགས་གསུངས་སོང་ལ།

ང་ཚོ་ནི་ཆབ་སྲིད་ཀྱི་སྐྱབས་བཅོལ་གྱུར་ནས་ལོ་ངོ་དྲུག་ཅུ་རེ་ལྔ་ཙམ་འགྲོ་བཞིན་ཡོད་པ་དང་རྒྱལ་སྤྱིའི་གཞུང་ཁག་དང་ལྷག་པར་དུ་རྒྱ་གར་གཞུང་དམངས་ཀྱིས་མཐུན་སྦྱོར་རྒྱབ་སྐྱོར་ལ་བརྟེན། སྒྲིག་འཛུགས་འདི་ཡིད་སྨོན་བྱེད་སའི་གནས་སྟངས་ཆགས་ཡོད་པ། བར་སྐབས་ཨ་རིའི་གྲོས་ཚོགས་འཐུས་མིའི་སྐུ་ཚབ་ཚོགས་ཆུང་ཞིག་རྡ་སར་ཕེབས་ཡོད་པ་དང་། ཨ་རིའི་གྲོས་ཚོགས་ཀྱིས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་ཡིག་གཏན་འབེབས་གནང་བ། ཁེ་ན་ཌའི་གྲོས་ཚོགས་ནང་བོད་དོན་ཐོག་གྲོས་ཆོད་བཞག་པ། རྒྱ་གར་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་སླར་གསོ་གནང་ཐུབ་ཡོད་པ། ཉིན་ཤས་སྔོན་ཨོ་སི་ཁྲུ་ལི་ཡའི་གྲོས་ཚོགས་སུ་བོད་དོན་ཐོག་བགྲོ་གླེང་ཤུགས་ཆེན་བྱུང་བ་སོགས་དང་འབྲེལ་ཕྱག་ལས་དང་མཐུན་སྦྱོར་གནང་མཁན་ཚང་མ་ལ་ཐུགས་རྗེ་ཆེ་ཞེས་ཞུས་སོང་།

གཞན་ཡང་བཅའ་ཁྲིམས་ཀྱིས་འགན་དབང་བསྐུལ་ཡས་གཙོ་བོ་དེ་བོད་དོན་བདེན་མཐའ་སེལ་ཐབས་ཆགས་ཡོད་པས་གྲོས་ཚོགས་སུ་གླེང་སློང་དང་བགྲོ་གླེང་ག་རེ་དགོས་པ་དང་ལས་འཆར་ག་རེ་སྒྲིག་དགོས་པ་སོགས་ཀྱི་ཐོག་ལ་དགོངས་པ་བཞེས་ཐུབ་དགོས་པ་གལ་ཆེན་ཡིན་པ་སོགས་ཀྱི་གསུང་བཤད་གནང་སོང་།

ཐེངས་འདིའི་གྲོས་ཚོགས་ཀྱི་ལས་ཉིན་བརྒྱད་ཀྱི་རིང་། འཛིན་སྐྱོང་བཀའ་ཤག་གིས་ལྷན་ཁང་ཁག་བདུན་གྱི་ལས་བསྡོམས་སྙན་སྒྲོན་དང་བཀུར་འོས་སྤྱི་འཐུས་རྣམ་པས་ཕུལ་བའི་དགོངས་ཚུལ་དང་དོགས་དྲི་ཁག་ལ་འཛིན་སྐྱོང་གིས་ལན་འདེབས་གསལ་བཤད་གནང་རྒྱུ། དེ་བཞིན་བོད་ནང་གི་ཛ་དྲག་གནས་སྟངས་ཐོག་གཞུང་འབྲེལ་གྲོས་འཆར་གཏན་འབེབས་གནང་རྒྱུ། ཁྲིམས་བཟོའི་ལས་དོན་དང་འཛིན་སྐྱོང་བཀའ་ཤག་གིས་ཁྱེར་ཡོང་བའི་ཁྲིམས་སྒྲིག་བསྐྱར་བཅོས་ཁག་ཅིག་སོགས་ཀྱི་ཐོག་ལ་བགྲོ་གླེང་དང་གོ་བསྡུར་བྱེད་རྒྱུ་ཡིན་འདུག།

ལས་རིམ་འགྲོ་སྟངས་ཀྱི་ཐོག་ནས་ནམ་རྒྱུན་མི་འདྲ་བར་འགྱུར་བ་ཕྲན་བུའི་ཐོག་ནས་ལས་བསྡོམས་ཁག་སྔོན་ལ་བཏང་སོང་བས། ཆོས་རིག་གི་ལས་བསྡོམས་ནས་འགོ་བཙུགས་སོང་།

གསར་འགོད་པ། བློ་བཟང་རྒྱ་མཚོ།