བོད་མི་སྐྱབས་བཅོལ་བ་ཏུར་ཀིའི་མཚོ་ཁར་སླེབས་པ།

ཟླ་འདའི་ཚེས་༢༠ ཉིན་ཏུར་ཀིའི་ས་བྷ་ཞེས་པའི་དྲ་ལམ་གསར་ཤོག་སྟེང། ཡུ་རོབ་ཏུར་ཀིའི་ནུབ་བྱང་གི་ས་ཁུལ་ཁཱ་ན་ཀ་ལི་(cannakale)ཞེས་པའི་མཚོ་ཁ་ལས། སྐྱབས་བཅོལ་བའི་གྲུ་གཟིངས་ཤིག་མཚོ་ལ་ཐིམ་འགོ་ཚུགས་སྐབས་སུ། ཏུར་ཀིའི་མཚོ་སྲིང་དམག་གིས་ཉེན་སྐྱོབས་བྱེད་ཐུབ་པའི་གནས་ཚུལ་འཁོད་འདུག

དེའི་ནང་ཨབ་གྷ་ནི་སི་ཐན་དང། འབར་མ། བོད་མི་བཅས་སྐྱབས་བཅོལ་བ་མི་གྲངས་༥༡ ཡོད་པ་དང་། བོད་མི་ག་ཚོད་ཡོད་མེད་ཀྱི་གྲངས་ཐོ་འཁོད་མེད་འདུག

གྲུ་གཟིངས་དེ་གྷི་རི་སིའི་གླིང་ཕྲན་ཞིག་ལ་བསྐྱོད་འཆར་ཡོད་ཀྱང། ཏུར་ཀའི་མཚོའི་ནང་དུ་ཐིམ་འགོ་ཚུགས་ཡོད་འདུག

རྒྱལ་སྤྱིའི་སྐྱབས་བཅོལ་ཚོགས་པས་ཕྱི་ལོ་༢༠༡༥ ལོར་ཁྱོན་མི་གྲངས་༣,༥༦༣ མཚོ་བརྒྱུད་ནས་ཡུ་རོབ་ཏུ་ཡོང་སྐབས་ཤི་ཡོད་པ་དང། དེ་ཡང་མི་གྲངས་༥༨༩ ཙམ་ཏུར་ཀིའི་མཚོའི་ཉེ་འཁོར་ལ་ཤི་ཡོད་འདུག

བཙན་བྱོལ་བོད་མིའི་དཔལ་འབྱོར་གྱི་གནས་སྟངས་ཡག་པོ་ཡོད་པ་རྣམས། ཉེན་ཁ་ཆུང་བའི་ལམ་ཁ་བརྒྱུད་ཡུ་རོབ་དང་ཨ་རི་སོགས་ལ་བདེ་བླག་ངང་སྐྱབས་བཅོལ་དུ་འགྲོ་ཐུབ་མཁན་མང་པོ་ཡོད་ཀྱང། དཔལ་འབྱོར་གྱི་དཀའ་ངལ་ཡོད་པའམ་ཡང་ན་ཉེན་ཁར་མི་འཛེམས་མཁན་མང་པོ་ཞིག་མཚོ་བརྒྱུད་ནས་ནུབ་ཕྱོགས་ལུང་པར་འགྲོ་མཁན་ཡོད་པ་རེད། དེང་སང་ཡུ་རོབ་ཏུ་སི་རི་ཡའི་སྐྱབས་བཅོལ་བའི་དཀའ་ངལ་འཕྲད་བཞིན་ཡོད་ཁར། ལུང་པ་གཞན་ནས་ཀྱང་སྐྱབས་བཅོལ་བ་ཡོང་མཁན་མང་པོ་ཡོད་འདུག །

གསར་འགོད་པ་སྐལ་བཟང་དོན་གྲུབ།