བོད་མིའི་ཚོང་ལས་བདེ་ཚོགས་ཀྱི་ལོ་འཁོར་ཚོགས་ཐེངས་ ༡༧ པ་དབུ་འཛུགས་གནང་།

ལོ་ལྟར་བོད་མིའི་ཚོང་ལས་བདེ་ཚོགས་ཀྱི་ལོ་འཁོར་ཚོགས་ཆེན་ཞིག་ཚོགས་སྲོལ་ཡོད་པ་བཞིན། འདི་ལོར་ཡང་བོད་མིའི་ཚོང་ལས་བདེ་ཚོགས་ཀྱི་ལོ་འཁོར་ཚོགས་ཆེན་༡༧ པ་དེ་རྡ་སའི་ས་གནས་འགོ་འཛིན་ལས་ཁུངས་ཀྱི་ཚོགས་ཁང་ནང་དུ་འགོ་འཛུགས་གནང་སོང་། 

ཟླ་འདིའི་ཚེས་༣ ཉིན་རྡ་སའི་ས་གནས་འགོ་འཛིན་གྱི་ཚོགས་ཁང་དུ་བོད་མིའི་ཚོང་ལས་བདེ་ཚོགས་ཀྱི་ལོ་འཁོར་ཚོགས་ཐེངས་བཅུ་བདུན་པ་དབུ་འཛུགས་གནང་སོང་། ཐེངས་འདིའི་ཚོགས་ཆེན་གྱི་སྐུ་མགྲོན་གཙོ་བོ་དཔལ་འབྱོར་དྲུང་ཆེ་སྐུ་ངོ་ཚེ་རིང་དོན་གྲུབ་ལགས་དང་། དམིགས་བསལ་སྐུ་མགྲོན་བོད་མི་མང་གི་སྤྱི་འཐུས་སྐུ་ངོ་ཟླ་བ་ཚེ་རིང་། རྡ་སའི་ས་གནས་འགོ་འཛིན་དཀོན་མཆོག་མིག་དམར། བལ་ཡུལ་ཚོང་ལས་བདེ་ཚོགས་ཡན་ལག་གི་ཚོགས་གཙོ། དེ་བཞིན་གཞོན་ནུ་ཚོགས་པའི་སྐུ་ཚབ་དང་བོད་མིའི་ཚོང་ལས་བདེ་ཚོགས་ཀྱི་ཚོགས་མི་བཅས་ཁྱོན་བསྡོམས་ཚོགས་བཅར་བ་༣༥ ལྷག་ཙམ་ཕེབས་འདུག།

སྐབས་དེ་དུས་བོད་མིའི་ཚོང་ལས་བདེ་ཚོགས་ཀྱི་ཚོགས་གཙོ་སྐུ་ངོ་བཀྲ་ཤིས་དབང་འདུས་ཀྱིས་ལོ་གསུམ་གྱི་ཉམས་མྱོང་དང་འབྲེལ་བའི་སྐོར་དང་། དེ་བཞིན་བོད་མིའི་ཚོང་ལས་བདེ་ཚོགས་ཀྱིས་ལོ་སྔོན་མའི་ཕྱི་ཟླ་༡༠ ཚེས་༢༥ ཉིན་༧གོང་ས་མཆོག་ལ་བརྟན་བཞུགས་འབུལ་རྒྱུའི་གོ་སྐབས་ཐོབ་པ་དེ་དུས་ཚོད་བཟང་པོ་ཞིག་ཡིན་པར་བརྗོད་གནང་སོང་། དེ་བཞིན་ཚོང་ལས་བདེ་ཚོགས་དང་འབྲེལ་བའི་ཟབ་སྦྱོང་གང་མང་སྤེལ་དགོས་པའི་སྐོར་དང་། ཟབ་སྦྱོང་སྤེལ་བ་ཡིན་ནའང་མཉམ་བཞུགས་བྱེད་མཁན་ཧ་ཅང་ཉུང་དུ་ཕྱིན་ནས་འདས་པའི་ལས་འཆར་ཁག་ཆ་ཚང་ལེགས་གྲུབ་བྱུང་མེད་ཚུལ་བརྗོད་གནང་སོང་།

དེ་བཞིན་ད་ཆར་འཛམ་བུ་གླིང་དེ་འགྱུར་བ་ཧ་ཅང་ཆེན་པོ་འགྲོ་བཞིན་ཡོད་པས། བོད་པ་ཚོས་སྔོན་མ་ལྟར་ཕ་རྒྱུད་བུས་འཛིན་བྱས་ནས་ཚོང་ལས་བྱས་ན་མི་འགྲིག་པ། དུས་ཀྱི་འགྱུར་འགྲོས་དང་བསྟུན་ནས་ཚོང་ལས་སྒྲུབ་དགོས་པར་བརྗོད་སོང་། ད་ཆར་ཚོང་ལས་ཐོག་སྔར་དང་མི་འདྲ་བའི་ཁྱབ་བསྒྲགས་བྱེད་སྟངས་དང་། དཔྱ་ཁྲལ་འགྲོ་སྟངས་སོགས་འགྱུར་བ་ཆེན་པོ་ཕྱིན་ཡོད་པས། དེ་དག་གི་ཐོག་ཟབ་སྦྱོང་སྤྲོད་རྒྱུ་གལ་ཆེན་ཡིན་པར་ཡང་བརྗོད་སོང་། སྐུ་མགྲོན་གཙོ་བོ་དཔལ་འབྱོར་དྲུང་ཆེ་སྐུ་ངོ་ཚེ་རིང་དོན་གྲུབ་ཀྱིས་ད་ལྟ་བཙན་བྱོལ་ནང་ཡོད་པའི་གཞོན་སྐྱེས་མང་པོ་ཞིག་ཕྱི་ཕྱོགས་སུ་འགྲོ་ཡི་ཡོད་པས། གཞིས་ཆགས་སྲ་བརྟན་ཆེད་བོད་མིའི་ཚོང་ལས་བདེ་ཚོགས་ཀྱི་ངོས་ནས་གཞིས་ཆགས་ནང་ལས་ཀ་གསར་སྐྲུན་དང་། ཚོང་ལས་ཀྱི་གོ་སྐབས་སྐྲུན་ཐུབ་ན་གཞིས་ཆགས་སྲ་བརྟན་ལ་ཕན་པ་དང་། བོད་པའི་སྤྱི་ཚོགས་ལ་ཡང་ཁེ་ཕན་ཡོད་ཚུལ་བརྗོད་སོང་། 

གསར་འགོད་པ། བསྟན་འཛིན་སྒྲོལ་དཀར།