བོད་མིའི་སེམས་ནང་གི་པཎ་ཆེན་རིན་པོ་ཆེ།

བོད་ཀྱི་བང་ཆེན་སྤྱིའི་འདོན་ཐེངས་ ༤༨༨ ཕྱི་ལོ་ ༢༠༡༤/༤/༣༠
བོད་མི་ཚོའི་ཁ་རྒྱུན་དུ་གནམ་ལ་ཉི་ཟླ་རྣམ་གཉིས་དང་ས་ལ་རྒྱལ་པཎ་རྣམ་གཉིས་ཞེས་པའི་བཤད་སྲོལ་ཞིག་ཡོད་ལ། དེ་མཚུངས་བཞིན་ཁོང་རྣམ་གཉིས་ལ་བོད་པའི་སྤྱི་ཚོགས་ཀྱི་ཁྱོན་ཡོངས་སུ་ཤུགས་རྐྱེན་ཧ་ཅང་ཆེན་པོ་ལྡན་ཡོད། ལོ་རྒྱུས་ནང་༧གོང་ས་སྐུ་ཕྲེང་ལྔ་པ་ནས་བཟུང་སྐུ་ཕྲེང་མང་པོ་ཞིག་གིས་བོད་ཀྱི་ཆབ་སྲིད་ཀྱི་ཐུགས་འགན་བཞེས་ཡོད་ཀྱང། པཎ་ཆེན་སྐུ་ཕྲེང་རིམ་བྱོན་གྱིས་བོད་ཀྱི་ཆབ་སྲིད་དབུ་ཁྲིད་གནང་བའི་ལོ་རྒྱུས་བྱུང་མྱོང་མེད། རྒྱ་དམར་པོའི་བཙན་འཛུལ་བོད་དུ་སླེབས་སྐབས་༧རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་དང། ༧པཎ་ཆེན་སྐུ་ཕྲེང་བཅུ་བཞི་པ་ཆེན་པོ་མཆོག་སྐུ་ན་ཧ་ཅང་གཞོན་པའི་དུས་སྐབས་སུ་འཁེལ་ཡོད་ཀྱང་རྒྱ་དམར་གཞུང་གི་ཆབ་སྲིད་ཀྱི་གཡོ་ཐབས་མང་པོ་ཞིག་ལ་གདོང་ལེན་གནང་དགོས་བྱུང། ལྷག་པར་དུ་༧གོང་ས་མཆོག་གིས་དབུས་བོད་མི་མང་པོ་ཞིག་བཙན་བྱོལ་དུ་ཕེབས་རྗེས། ༧པཎ་ཆེན་རིན་པོ་ཆེས་བོད་ཀྱི་ཛ་དྲག་གི་གནས་བབས་ཐུགས་ཀྱིས་མ་བཟོད་པར་རྒྱ་གཞུང་ལ་ཞུ་གཏུག་སྔ་རྗེས་གནང་ཡོད།

གཙོ་བོ་རྒྱ་ནག་གི་སྲིད་བློན་ཀྲུའུ་ཨན་ལེ་བརྒྱུད་ནས་ཡིག་འབྲུ་ཁྲི་བདུན་གྱི་སྙན་ཞུ་རྒྱ་དམར་གཞུང་ལ་ཕུལ་བར་བརྟེན། ༧པཎ་ཆེན་པོ་ཆེ་མི་ལོ་༡༠ མ་ཟིན་ཙམ་གྱི་རིང་བཙོན་འཇུག་བྱས་པ་དང། མི་མང་འཛོམས་སར་འཐབ་འཛིང་ཡང་མང་པོ་བཏང་བ་རེད། ༧ཀུན་གཟིགས་མཆོག་གློད་གྲོལ་དང་དཀར་འདོན་ཐོབ་པའི་རྗེས་སུའང་མུ་མཐུད་བོད་མི་རིགས་ཀྱི་བདེ་སྡུག་དང། བོད་ཀྱི་ཆོས་དང་རིག་གནས་ཉམས་པ་སླར་གསོའི་ཆེད་རྒྱ་གཞུང་ལ་འབོད་སྐུལ་ཞུས་ཤིང། བོད་ས་སྟོད་སྨད་བར་གསུམ་ཀུན་ཏུ་ཞབས་ཀྱིས་བཅགས་ནས་གནས་སྟངས་དངོས་ལ་གཟིགས་ཞིབ་ཀྱིས། བཀའ་སློབ་ལམ་སྟོན་ཡང་ཡང་བསྩལ་ནས་བོད་ནང་གི་བོད་མི་རྣམས་ཀྱི་སེམས་ངོར་ཆོས་དང་རིག་གནས་ཀྱི་ཟུངས་ཤུགས་གསར་པ་ཞིག་བསྩལ་ཡོད་པ་མ་ཟད། ད་ལྟའི་ཆར་བོད་ནང་དུ་བོད་ཀྱི་ཆོས་དང་རིག་གནས་དར་སྤེལ་རྒྱུན་གནས་ཀྱི་ཐོག་ལ་གྲུབ་འབྲས་མི་དམན་པ་ཞིག་ཐོབ་པ་ནི། གཙོ་ཆེ་ཤོས་༧ཀུན་གཟིགས་པཎ་ཆེན་རིན་པོ་ཆེ་མཆོག་གི་བཀའ་དྲིན་དང་མཛད་རྗེས་སུ་གྱུར་ཡོད།

༧ཀུན་གཟིགས་པཎ་ཆེན་རིན་པོ་ཆེ་མཆོག་གིས་བོད་མི་རིགས་དང་བོད་ཀྱི་རིག་གནས་ཀྱི་ཆེད་དུ་ཐུགས་བརྩོན་ལྷོད་མེད་དུ་མཛད་པར་བརྟེན། རྒྱ་གཞུང་གི་དཔོན་རིགས་ཁག་ཅིག་གི་“པཎ་ཆེན་གྱི་མཇུག་མ་གནམ་གྲུ་ལས་མཐོ་བ་འདུག་”ཅེས་ཁོང་ལ་ཟུར་ཟ་དང་སྐྱོན་བརྗོད་བྱས་ཡོད་པ་མ་ཟད། ཕྱི་ལོ་༡༩༨༩ ལོར་གློ་བུར་དུ་སྐུ་གཤེགས་པའི་གནས་ཚུལ་ཡ་ང་བ་ཞིག་བྱུང་བ་དེ་ཡང། རྒྱ་དམར་གཞུང་གི་དཔོན་ངན་ཁག་ཅིག་གི་གསང་འཕྲུལ་ནག་པོ་ཞིག་ཡིན་པར་བོད་མི་ཕལ་མོ་ཆེས་དོགས་པ་བྱེད་བཞིན་ཡོད་པ་དང། ཧུའུ་ཅིན་ཐའོ་ཡང་དེ་དག་གི་གཙོ་བོའི་གྲས་སུ་ཡོད་པར་ངོས་འཛིན་བྱེད་བཞིན་ཡོད་པ་རེད། གང་ལྟར་བོད་མི་རིགས་དང་བོད་ཀྱི་རིག་གནས་ཀྱི་ཆེད་དུ་སྐུ་ངལ་འཛེམས་མེད་ཀྱི་ཐོག་ནས་རྒྱ་གཞུང་ལ་རྩོད་གླེང་དང།  བོད་མི་རིགས་ལ་ལམ་སྟོན་དང་བཀའ་སློབ་དང་སྣེ་ཁྲིད་གནང་མཁན་གྱི་༧ཀུན་གཟིགས་པཎ་ཆེན་རིན་པོ་ཆེ་གློ་བུར་དུ་སྐུ་གཤེགས་པ་ནི་བོད་མི་རིགས་ཀྱི་སེམས་ནང་གི་རེ་བ་ཆེན་པོ་ཞིག་བརླགས་སོང་བ་རེད།

༧ཀུན་གཟིགས་པཎ་ཆེན་རིན་པོ་ཆེ་མཆོག་སྐུ་གཤེགས་པའི་རྗེས་སུ་རིམ་བཞིན་ལྷ་ལྡན་སྨོན་ལམ་ཆེན་མོ་འཚོགས་མི་ཆོག་པ་བཟོས་པ་མ་ཟད། ༧གོང་ས་མཆོག་གི་སྐུ་པར་ཙམ་ཡང་སྒྲིག་གཤོམ་མི་ཆོག་པ་བཟོས་ནས་བོད་ནང་དུ་དམ་དྲག་དང་མནར་གཅོད་ཆེ་རུ་བཏང་ཡོད་པ་དང། ལྷག་པར་དུ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ཡེ་ཤེས་དབྱིངས་གཟིགས་ཀྱི་ཐོག་ནས་ངོས་འཛིན་མཛད་པ། ༧ཀུན་གཟིགས་པཎ་ཆེན་ཆུང་སྲིད་རིན་པོ་ཆེ་མཆོག་དགུང་གྲངས་༦ གི་ཐོག་ཡབ་ཡུམ་སྐུ་འཁོར་དང་བཅས་བཙན་ཁྲིད་བྱས་ནས་ད་ལྟའི་ཆར་དགུང་གྲངས་༢༥ རུ་ཕེབས་ཡོད་ཀྱང། ཁོང་གི་གནས་སྟངས་གསལ་པོ་ཤེས་རྟོགས་ཐུབ་པ་ལྟ་ཅི་སྐུ་འཚོ་བཞུགས་ཡོད་མེད་ཀྱི་གནས་སྟངས་ཙམ་ཡང་གཏན་ནས་མི་ཤེས་པ་བཟོས་པས། བོད་མི་རིགས་ཀྱི་སེམས་ནང་དུ་སྡུག་བསྔལ་དང་ན་ཟུག་ཆེན་པོ་ཁུར་ནས་སྡོད་དགོས་བྱུང་ཡོད་ལ། ལྷག་པར་དུ་བོད་མི་རིགས་ཀྱི་སྙིང་ལ་སོས་ཐབས་མེད་པའི་རྨ་ཁ་ཞིག་དང། རྒྱ་དམར་གཞུང་ལ་གནོན་མི་ཐུབ་པའི་འཁོན་འཛིན་ཆེན་པོ་ཞིག་ཀྱང་རང་བཞིན་གྱིས་སླེབས་ཡོད།

དེ་ཙམ་དུ་མ་ཟད་རྒྱ་དམར་གཞུང་གིས་པཎ་ཆེན་རིན་པོ་ཆེའི་ཡང་སྲིད་ཀྱི་མཚན་དེ་ཁྱེའུ་ཞིག་ལ་བཙན་གྱིས་བཀལ་ནས་ཁྲི་འདོན་བྱས་ཡོད་པ་དང། ད་ལྟའི་ཆར་ཡང་བོད་ཀྱི་ས་གནས་མང་པོ་ཞིག་ཏུ་བཙན་གྱིས་ཕེབས་བསུ་ཞུ་བཅུག་པ་སོགས་རྒྱ་གཞུང་གིས་གཡོ་བྱུས་གང་མང་ཞིག་འཐེན་བཞིན་ཡོད་ཀྱང། པཎ་ཆེན་རིན་པོ་ཆེའི་ཡང་སྲིད་ཀྱི་མཚན་བཏགས་པའི་རྒྱལ་མཚན་ནོར་བུ་ཡང་བོད་མི་བཀྲུས་ན་མ་དག་པ་ཞིག་ཡིན་པས། ལོ་ན་སོན་པའི་སྐབས་སུ་ཁོ་རང་གི་ངོས་ནས་རྒྱ་གཞུང་གི་བྱེད་སྟངས་དང་དེའི་རྒྱབ་ལྗོངས་ཀྱི་གནས་ཚུལ་མང་པོ་ཞིག་ཤེས་རྟོགས་བྱུང་ནས་མཐའ་གཅིག་ཏུ་རྒྱ་གཞུང་གི་མཛུབ་མོས་གར་བསྟན་ཤར་མི་བྱེད་པའི་གནས་ཚུལ་ཡང་ཡོང་མི་སྲིད་པ་མ་རེད། མདོར་ན་༧ཀུན་གཟིགས་པཎ་ཆེན་རིན་པོ་ཆེ་སྐུ་ཕྲེང་བཅུ་པ་ཆེན་པོ་མཆོག་གིས་བོད་མི་རིགས་དང། བོད་ཀྱི་ཆོས་དང་རིག་གནས་ཀྱི་ཆེད་སྐུ་ངལ་བརྒྱ་ཕྲག་དུ་མ་སྐུ་ཕྲག་ཏུ་བཞེས་ཤིང། མཐའ་མ་ཡང་བོད་མི་རིགས་ཀྱི་ཆེད་དུ་སྐུ་གཤེགས་པའི་གནས་ཚུལ་འདི་དག་བོད་མི་ཕལ་མོ་ཆེའི་སེམས་ནང་དུ་ནམ་ཡང་མི་ནུབ་པར་རྡོ་རིང་བཞིན་གྲོང་ངེར་འགྱིངས་ཡོད།།