བོད་མིའི་སློབ་གྲྭ་ཁག་གི་ཕ་མའི་ཚོགས་ཆེན་ཐེངས་དང་པོ།

ཟླ་འདིའི་ཚེས་༡༡ ཉིན་དྷ་ཤོད་བོད་ཁྱིམ་སློབ་གྲྭའི་ཚོགས་ཁང་དུ་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་གོ་སྒྲིག་འོག བོད་མིའི་སློབ་གྲྭ་ཁག་གི་ཕ་མའི་ཚོགས་ཆེན་ཐེངས་དང་པོ་ཚོགས་སོང་།
ཚོགས་ཆེན་དེ་ཉིན་གསུམ་རིང་ཚོགས་འཆར་ཡོད་པ་དང། ཉིན་དང་པོའི་དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོ་སྲིད་སྐྱོང་བློ་བཟང་སེང་གེ་གཙོས། ཤེས་རིག་བཀའ་བློན་དངོས་གྲུབ་ཚེ་རིང་དང་འབྲེལ་ཡོད་ཤེས་རིག་ལྷན་ཁང་གི་ལས་བྱེད། བོད་ཁྱིམ་དང་མ་སུ་རི་སློབ་གྲྭ། དེ་བཞིན་སམ་བྷོ་ཊ་བཅས་ཀྱི་དབུ་འཛིན་རྣམ་པ། ས་གནས་༤༣ ནས་སླེབས་པའི་ཕ་མའི་འཐུས་ཚབ་༢༥༠ བཅས་མཉམ་ཞུགས་བྱས་ཡོད་པ་རེད།
མཛད་སྒོའི་ཐོག་བོད་རྒྱལ་ཁབ་དང་མི་རིགས་ཀྱི་ཆེད་དུ་སྐུ་སྲོག་བློས་གཏོང་མཁན། རྒྱལ་གཅེས་དཔའ་བོ་དཔའ་མོ་རྣམས་རྗེས་དྲན་ཆེད་སྐར་མ་གཅིག་རིང་ངག་བཅད་གུས་འདུད་བྱས་སོང།

ཤེས་རིག་བཀའ་བློན་དངོས་གྲུབ་ཚེ་རིང་གིས་ཚོགས་ཆེན་ངོ་སྤྲོད་དང་འབྲེལ་བའི་གསུང་བཤད་གནང་དོན། “དེ་རིང་འདིར་ཤེས་རིག་ལས་ཁུངས་ཀྱིས་ཕ་མའི་ཚོགས་ཆེན་དང་ཟབ་སྦྱོང་ཞིག་མཉམ་འབྲེལ་ཐོག་གོ་སྒྲིག་ཞུས་ཡོད། བཀའ་ཤག་སྐབས་བཅུ་བཞི་པའི་ཐོག་ནས་ཤེས་ཡོན་ནི་གལ་ཆེན་ལ་ངོས་འཛིན་གནང་བ་བཞིན། སྟོང་བཤད་ཙམ་མ་ཡིན་པར་དངོས་སུ་ཤེས་ཡོན་ཐོག་ལས་འཆར་དང་། དཔལ་འབྱོར། གང་སྤྱིའི་ཐོག་ནས་འབད་བརྩོན་གནང་ཡོད། དེར་བརྟེན། ཤེས་ཡོན་དེ་ཕུན་སུམ་ཚོགས་པ་ཞིག་ཡོང་བར་ཆ་རྐྱེན་ཁག་བཞི་མེད་དུ་མི་རུང་བ་ཆགས་ཡོད། སློབ་མ་དང་དགེ་རྒན། འཛིན་སྐྱོང་དང་ཕ་མ། ཆ་རྐྱེན་བཞི་པོ་དེ་དག་ཡ་མ་བྲལ་བ་འགྲོ་དགོས་པ་ཞིག་ངེས་པར་དུ་ཆགས་འདུག་”ཅེས་གསུངས་སོང།

བཀའ་བློན་གྱིས་མུ་མཐུད་གསུང་དོན། “གོང་དུ་བཤད་པའི་ཆ་རྐྱེན་བཞི་པོ་དེ་དག་ཧྲ་ཐག་ཐག་ཅིག་མེད་ན་ཤེས་ཡོན་ཡག་པོ་ཞིག་ཡོང་ཐུབ་ཀྱི་མ་རེད། དགེ་རྒན་དང་སློབ་ཕྲུག་གཉིས་ཀ་ཧྲ་ཐག་ཐག་ཅིག་ཡོད་ན་ཤེས་ཡོན་ཡག་པོ་ཞིག་ཡོང་གི་རེད་དམ་ཟེར་ན་ཡོང་གི་རེད། འོན་ཀྱང་ཤེས་ཡོན་ཕུན་སུམ་ཚོགས་པའམ་རྩེ་ཕུད་ཅིག་ཡོང་ཐུབ་བམ་ཟེར་ན། དེར་འཛིན་སྐྱོང་གི་རྒྱབ་བརྟེན། ཕ་མའི་མཉམ་བཞུགས་ཤིག་མེད་པར་ཡོང་ཐུབ་རྒྱུ་ཁག་པོ་རེད་བསམས་ཀྱི་འདུག བཀའ་ཤག་སྐབས་བཅུ་བཞི་པས་ཤེས་ཡོན་དེ་གལ་ཆེན་པོར་བརྩིས་པ་ཇི་བཞིན་ང་ཚོ་ཤེས་རིག་ལས་ཁུངས་ངོས་ནས་ཀྱང་འབད་བརྩོན་རིམ་པ་བྱས་ཡོད། གང་ལྟར་འཛིན་སྐྱོང་ངོས་ནས་ལས་འཆར་དང་དཔལ་འབྱོར་སོགས་ཕྱོགས་གང་ཅིའི་ཐོག་ནས་གང་ཡོང་ཅི་ཡོང་བྱེད་བཞིན་ཡོད། དགེ་རྒན་ཚོའི་ཆ་རྐྱེན་མེད་དུ་མི་རུང་བའི་དགོས་མཁོ་དེ་ཤེས་ཡོན་ཆགས་ཡོད། ཤེས་ཡོན་ཡོད་པའི་ཐོག་སློབ་ཕྲུག་རྣམས་ལ་སློབ་སྦྱོང་གནད་དུ་སྨིན་པ་ཞིག་སྤྲད་ཐུབ་པའི་ཐབས་ལམ། དེ་དག་ཡོང་བར་བྱེད་པ་ལ་ལྷག་བསམ་བཅས་ཆ་རྐྱེན་དེ་གསུམ་ཐོག་ལ་ང་ཚོས་དགེ་རྒན་ཚོར་སྔ་རྗེས་སུ་ཟབ་སྦྱོང་རབ་དང་རིམ་པ་ཞུས་དང་ཞུ་མུས་ཡིན་”ཅེས་གསུངས་སོང་།

“ཤེས་ཡོན་གྱི་སློབ་གསོ་ཧྲ་ཐག་ཐག་ཡོང་བར་ང་ཚོ་ཚང་མས་གོང་དུ་ཞུས་པའི་ཆ་རྐྱེན་བཞི་ཀའི་ཐོག་ཤུགས་རྒྱག་དགོས་པ་དེ་གལ་ཆེན་པོ་འདུག དེ་ཡག་པོ་བྱུང་བ་ཡིན་ན་༸གོང་ས་མཆོག་གི་བཀའ་དགོངས་བསྒྲུབ་ཐུབ་པའི་ཆ་རྐྱེན། བོད་མི་རིགས་ཀྱི་རྩ་དོན་ཧྲ་ཐག་ཐག་ངང་བསྒྲུབ་ཐུབ་པའི་ཆ་རྐྱེན། རྒྱ་མི་ཡིན་ནའང་སྐྲག་དགོས་པའི་ཆ་རྐྱེན་ཞིག་ཆགས་ཡོད། ང་ཚོ་ཚང་མས་འདི་ཕ་མའི་ལས་འགན་རེད། དེ་སློབ་ཕྲུག་གི་ལས་འགན་རེད་ཅེས་ཟུར་དུ་མ་བཞག་པའི་ཐོག་ནས་ཚང་མས་ནུས་པ་གཅིག་སྒྲིལ་གྱི་ཐོག་ནས་སྤྱི་ཚོགས་ནང་གལ་ཆེ་དོན་ཆེན་བརྩིས་དགོས་པ་འདུག་”ཅེས་སོགས་གསུང་བཤད་གནང་ཡོད་པ་རེད། དེའི་རྗེས་སུ་སྲིད་སྐྱོང་གིས་ལམ་སྟོན་གསུང་བཤད་དང་འབྲེལ། དུས་རྟག་ཏུ་འཛིན་སྐྱོང་དང་སློབ་གྲྭ དགེ་རྒན་གྱི་འགྲིག་གི་མི་འདུག་ཅེས་བཤད་ནས་མ་བསྡད་པར། ཕ་མ་ཚོས་ཕྲུ་གུའི་ཆེད་དུ་ག་རེ་བྱེད་ཐུབ་པ་དང་བྱེད་དགོས་ཀྱི་ཡོད་མེད་སྐོར་ཡིན་པར་གསུངས་པ་དང། དེ་བཞིན་ཐོག་མར་༢༠༠༨ ལོའི་མི་མང་ཚོགས་ཆེན་དང་བོད་ཁྱིམ་དུས་ཆེན་སྐབས་༧གོང་ས་མཆོག་གིས་ཤེས་ཡོན་ཐོག་འཐུས་ཤོར་ཕྱིན་ཡོད་པར་བཀའ་གནང་ཡོད་པ་དང། འདི་ལོའི་ནང་ཆོས་ངོ་སྤྲོད་སྐབས་༧གོང་ས་མཆོག་གིས་ཤེས་ཡོན་ཐོག་ཡར་རྒྱས་འགྲོ་ཡི་ཡོད་པའི་རྣམ་པ་འདུག་ཅེས་གསུངས་པ་དེ། གཟེངས་རྟགས་དང་སེམས་ཤུགས་འཕར་བྱེད་ཆེ་ཤོས་ཤིག་ལ་ངོས་འཛིན་བྱེད་ཀྱི་ཡོད་ཅེས་གསུངས་སོང།
གསར་འགོད་པ་སྐལ་བཟང་དོན་གྲུབ།