བོད་ཟས་བཟོ་སྟངས་ཀྱི་དེབ་གཅིག་ཟས་དེབ་རྩེ་ཕུད་ལྔའི་ནང་ཚུད་འདུག 

རྒྱལ་སྤྱིའི་ནང་དུས་དེབ་སྙན་གྲགས་ཆེ་གྲས་ཤིག་གིས་ཟ་མ་བཟོ་སྟངས་ཀྱི་དེབ་རྩེ་ཕུད་ལྔ་ངོ་སྤྲོད་བྱས་འདུག་པའི་ཁོངས་སུ། བོད་མི་ཞིག་དང་ཁོང་གི་བཟའ་ཟླ་དབྱིན་ཇི་བ་གཉིས་ཀྱིས་བྲིས་པའི་བོད་ཟས་བཟོ་སྟངས་དང་འབྲེལ་བའི་དེབ་གཅིག་ཚུད་འདུག 

ཟླ་༤ པའི་ཚེས་༡༢ ཉིན་རྒྱལ་སྤྱིའི་ནང་དུས་དེབ་རྙིང་གྲས་དང་སྙན་གྲགས་ཆེ་གྲས་སུ་ཡོད་པ་National Geographic ནས་དཔྱིད་ཀའི་ནམ་དུས་དང་འབྲེལ་ནས། རྒྱལ་སྤྱིའི་ནང་ཉེ་ཆར་པར་སྐྲུན་བྱས་པའི་ཟས་རིགས་བཟོ་སྟངས་ཀྱི་དེབ་ཁོངས་ནས། རྩེ་ཕུད་ཀྱི་དེབ་ལྔ་ངོ་སྤྲོད་ཀྱི་རྩོམ་ཐུང་ཞིག་སྤེལ་འདུག་པ་དང་། དེའི་ནང་དབྱིན་ཡུལ་དུ་ཡོད་པའི་བོད་ཟས་ཟ་ཁང་(Taste Tibet) ཞེས་པའི་སྦྱིན་བདག་བོད་མི་ཡེ་ཤེས་བྱམས་པ་དང་། ཁོང་གི་བཟའ་ཟླ་(Julie Kleeman) གཉིས་ཀྱིས་བྲིས་པའི་དེབ་Taste Tibet ཞེས་པ་དེ་ཚུད་འདུག རྩོམ་ཡིག་གི་ནང་དུ་དེབ་འདིའི་ནང་ཡེ་ཤེས་འཚར་ལོངས་བྱུང་ཡུལ་ཧི་མ་ལ་ཡའི་འབྲོག་ཁུལ་གྱི་ཟས་རིགས་རིག་གཞུང་བཏོན་ཡོད་པ་དང་། དེའི་ནང་དུ་བྲོ་བ་ལྡན་པའི་ཐང་རིགས་དང་དལ་བཙོས་ཟས་རིགས། དེ་བཞིན་ཟ་ཁང་དེའི་སྙན་གྲགས་ཆེ་བའི་བྱ་ཤ་ཚོ་མ་ལྡན་པའི་ཁུ་བ་སོགས་བཟོ་སྟངས་དང་། དེ་བཞིན་འཐེན་ཐུག་བཟོ་སྟངས་ཀྱི་གསང་བ་ཤེས་རྒྱུ་ཡོད་སྐོར་འཁོད་འདུག 

དེབ་དེ་ཕྱི་ལོ་༢༠༢༢ ལོའི་ཟླ་༣ པའི་ནང་པར་འགྲེམས་བྱས་ཡོད་འདུག་པ་དང་། དེའི་ནང་ཟས་རིགས་འདྲ་མིན་བཟོ་སྟངས་༨༠ ཡོད་སྐོར་འཁོད་ཡོད་པ་རེད། 

དེ་ཡང་ཕྱི་ལོ་༢༠༢༡ ལོའི་དབྱིན་ཡུལ་གྱི་གསར་ཁང་བྷི་བྷི་སིའི་རྒྱལ་ཡོངས་ནང་ཟ་ཁང་གཉེར་བ་དང་། ཞིང་ལས་ཐོན་སྐྱེད་བརྒྱུད་རྒྱལ་ཁབ་ཡར་རྒྱས་གོང་འཕེལ་གཏོང་མཁན་རྣམས་ལ་དམིགས་ཏེ། རིག་ཚན་མི་འདྲ་བའི་ཐོག་ལ་རྒྱལ་ཡོངས་འགྲན་སྡུར་ཞིག་གོ་སྒྲིག་བྱས་ཡོད་པ་དང་། སྐབས་དེར་ཁོང་གཉིས་ཀྱི་ཟ་ཁང་དེ་འགྲན་སྡུར་གྱི་རིམ་པ་མང་པོ་བརྒྱུད་རྗེས། སྲང་ལམ་ཁ་ཟས་དང་ཁ་ཟས་ཡག་ཤོས་ (Best Street Food and Takeaway) ཚན་པའི་རྟིང་རྩོད་འགྲན་སྡུར་ནང་སླེབས་ཐུབ་པ་བྱུང་འདུག །

གསར་འགོད་པ་སྐལ་བཟང་དོན་གྲུབ།