བོད་རང་བཙན་སློབ་ཕྲུག་ཚོགས་པའི་སྤྱི་ཁྱབ་འགན་འཛིན་གསར་པ་བསྐོ་བཞག་བྱུང་འདུག 

སྤྱི་འཐུས་རྡོ་རྗེ་ཚེ་བརྟན་གྱིས་བོད་རང་བཙན་སློབ་ཕྲུག་ཚོགས་པའི་སྤྱི་ཁྱབ་འགན་འཛིན་གྱི་ལས་ཁུར་ཞུ་བའི་དུས་ཡུན་མཇུག་བསྒྲིལ་བ་དང་བསྟུན། ལས་འགུལ་འགན་འཛིན་པད་མ་སྒྲོལ་མ་སྤྱི་ཁྱབ་འགན་འཛིན་གསར་པར་བསྐོ་བཞག་བྱུང་འདུག 

ཟླ་༨ པའི་ཚེས་༣༡ ཉིན་བོད་རང་བཙན་སློབ་ཕྲུག་ཚོགས་པས་གསལ་བསྒྲགས་ཤིག་སྤེལ་འདུག་པ་དང་། དེའི་ནང་དུ་ཁྱེད་རྣམ་པར་བོད་རང་བཙན་སློབ་ཕྲུག་ཚོགས་པའི་འགོ་ཁྲིད་དང་འབྲེལ་བའི་གནད་དོན་གལ་ཆེན་ཞིག་སྙན་སེང་ཞུ་རྒྱུར། རྡོ་རྗེ་ཚེ་བརྟན་ལགས་ནས་མི་ལོ་ལྔ་ཡི་རིང་བོད་རང་བཙན་སློབ་ཕྲུག་ཚོགས་པའི་སྤྱི་ཁྱབ་འགན་འཛིན་གྱི་ལས་ཁུར་ཞུས་ཏེ་ལས་ཡུན་མཇུག་བསྒྲིལ་གྱི་ཡོད་པ་རེད། ཁོང་གིས་བོད་རང་བཙན་སློབ་ཕྲུག་ཚོགས་པའི་དཔལ་འབྱོར་གྱི་གཞི་རྟེན་བརྟན་པོ་བཟོས་ཡོད་ཁར། བོད་དོན་འཐབ་རྩོད་ཀྱི་ལས་འགུལ་ནང་བོད་རང་བཙན་སློབ་ཕྲུག་ཚོགས་པ་མུ་མཐུད་ནས་མདུན་ཐོན་པའི་ཚོགས་པ་ཞིག་གནས་ཐུབ་པ་བཟོས་ཡོད་པ་དང་། བོད་དང་ཡུ་གུར། ཧོང་ཀོང་། ཐའེ་ཝན། རྒྱ་རིགས་མང་གཙོ་དོན་གཉེར་བ་བཅས་ཀྱི་བར་དུ་མཉམ་ལས་ཀྱིས་རྒྱ་ནག་གཞུང་ལ་ཁ་གཏད་ཀྱི་རྒྱལ་སྤྱིའི་ལས་འགུལ་ཁྲོད་དུ་བོད་རང་བཙན་སློབ་ཕྲུག་ཚོགས་པའི་ལས་འགན་གཙོ་བཞེས་གནང་ཡོད་པ་རེད། རྡོ་རྗེ་ཚེ་བརྟན་ལགས་ནས་མི་ལོ་བཅུ་གཉིས་ཀྱི་རིང་བོད་རང་བཙན་སློབ་ཕྲུག་ཚོགས་པར་རང་ཉིད་ཀྱི་འཆར་སྣང་དང་ཞབས་ཞུ་གནང་བར་བཀའ་དྲིན་ཆེ་ཞུ་རྒྱུ་ཡིན། ཁོང་གི་ལས་ཡུན་རྫོགས་ལ་ཉེ་བ་དང་བསྟུན། ང་ཚོས་སྤྱི་ཁྱབ་འགན་འཛིན་གསར་པ་པད་མ་སྒྲོལ་མ་ལགས་ལ་འཚམས་འདྲི་ཞུ། པད་མ་ལགས་ནི་བོད་རང་བཙན་སློབ་ཕྲུག་ཚོགས་པའི་དམིགས་ཡུལ་དང་རྒྱལ་སྤྱིའི་སྙོབ་ཚད། ལས་འགུལ་འདྲ་མིན་བར་གྱི་མཉམ་ལས་སོགས་ལ་ཤུགས་སྣོན་གསར་པ་དང་ཆེ་བ་རྒྱག་པར་གྲ་སྒྲིག་སྔོན་ཚུད་ནས་ཡོད་མཁན་ཞིག་རེད། ཁོང་གིས་བོད་རང་བཙན་སློབ་ཕྲུག་ཚོགས་པའི་ལས་འགུལ་སྦྱོང་བརྡར་ཁག་གི་ཐོག་ཏུ། མི་གྲངས་བརྒྱ་ཕྲག་མང་པོར་སྦྱོང་བརྡར་གནང་མྱོང་ཡོད་ཁར། བོད་རང་བཙན་སློབ་ཕྲུག་ཚོགས་པའི་ལས་འགུལ་ཁག་གི་ཐོག་ཏུ་ལྷག་བསམ་དང་རྣམ་དཔྱོད། ཐབས་བྱུས་སོགས་ཀྱི་ལེགས་སྐྱེས་བསྟུད་མར་ཕུལ་མཁན་ཞིག་རེད་ཅེས་བཀོད་འདུག 

སྤྱི་ཁྱབ་འགན་འཛིན་གསར་པ་པད་མ་སྒྲོལ་མས་ཕྱི་ལོ་༢༠༡༦ ལོར་བོད་རང་བཙན་སློབ་ཕྲུག་ཚོགས་པའི་དབུས་ལས་ཁུངས་སུ་ཉམས་གསོག་བྱས་འདུག་པ་དང་། དེའི་རྗེས་སུ་རང་ཉིད་ཀྱི་གཙུག་ལག་སློབ་གཉེར་ཁང་དུ་བོད་རང་བཙན་སློབ་ཕྲུག་ཚོགས་པའི་ཡན་ལག་ཅིག་གསར་འཛུགས་བྱས་ནས་ཚོགས་གཙོའི་ལས་ཁུར་ཞུས་འདུག སློབ་ཐོན་རྗེས་བོད་དོན་ལ་རྒྱབ་སྐྱོར་ཆེན་པོ་བྱེད་མཁན་གྲོས་ཚོགས་འོག་མའི་འཐུས་མི་ཇཱེམ་མེག་གྷོ་ཝན་དང་། དེ་བཞིན་གྲོས་ཚོགས་གོང་མའི་འཐུས་མི་ཨཱེ་ལི་ཛེ་བྷེ་ཌ་ཝ་རན་གཉིས་ཀྱི་འོག་ཏུ་ཉམས་གསོག་བྱེད་མྱོང་འདུག ཕྱི་ལོ་༢༠༡༩ ལོར་ཁོང་གིས་བོད་རང་བཙན་སློབ་ཕྲུག་ཚོགས་པའི་དབུས་ལས་ཁུངས་སུ་གཞི་རིམ་འབྲེལ་མཐུད་པའི་ལས་ཁུར་ཞུས་ནས། ཕྱིས་སུ་ལས་འགུལ་འགན་འཛིན་གྱི་ལས་ཁུར་བླངས་ཡོད་པ་རེད་འདུག །

གསར་འགོད་པ་སྐལ་བཟང་དོན་གྲུབ།