བོད་རང་སྐྱོང་ལྗོངས་ཀྱི་ལས་བྱེད་༡༥ ལ་བོད་རང་བཙན་དང་འབྲེལ་བའི་ཉེས་འཛུགས།

བོད་རང་སྐྱོང་ལྗོངས་ཀྱི་གཞུང་ཞབས་ལས་བྱེད་༡༥ ཡིས་ཕྱི་ཕྱོགས་ཀྱི་ཏཱ་ལའི་སྒྲིག་འཛུགས་ལ་གསང་བའི་གནས་ཚུལ་མཁོ་སྤྲོད་བྱས་པའི་ཉེས་འཛུགས་འོག ད་ལྟ་དངོས་སུ་ཞིབ་བཤེར་བྱེད་བཞིན་ཡོད་འདུག

རྒྱ་ནག་གཞུང་འབྲེལ་བརྒྱུད་ལམ་<<མི་དམངས་ཉིན་རེའི་ཚགས་པར་>> སྟེང་། བོད་རང་སྐྱོང་ལྗོངས་སྒྲིག་བཤེར་ཨུ་ཡོན་ལྷན་ཁང་གི་དྲུང་ཆེ་ཝང་ཀང་གི་སྐད་ཆ་ལུང་འདྲེན་བྱས་པ་ལྟར་ན། “ལོ་སྔོན་མའི་ནང་བོད་རང་སྐྱོང་ལྗོངས་སྒྲིག་བཤེར་ལྷན་ཁང་གིས་དམར་ཤོག་ཚོགས་མི་དང་གཞུང་གི་ལས་བྱེད་ཀྱི་ཆབ་སྲིད་སྒྲིག་འགལ་གནད་དོན་རྩད་ཆོད་པའི་ཁྲོད། ཁྲིམས་འགལ་གྱིས་གསང་བའི་བོད་རང་བཙན་གྱི་སྒྲིག་འཛུགས་ནང་འཛུལ་ཞུགས་དང་། ཏཱ་ལའི་སྐུ་ཕྲེང་བཅུ་བཞི་པའི་རུ་ཚོགས་ལ་གསང་བའི་གནས་ཚུལ་མཁོ་སྤྲོད་བྱས་ཏེ། རྒྱལ་ཁབ་ཀྱི་བདེ་འཇགས་ལ་གནོད་འཚེ་གཏོང་བའི་ལས་འགུལ་ལ་རོགས་སྐྱོར་བྱས་པ་སོགས། ཏང་གི་ཆབ་སྲིད་སྒྲིག་གཞི་ལ་ཚབས་ཆེའི་རྒྱབ་འགལ་བྱས་པའི་དམར་ཤོག་ཚོགས་མི་ལས་བྱེད་ཉུང་ཤས་ཤིག་གི་ནག་ཉེས་ལ་དངོས་སུ་ཞིབ་བཤེར་བྱེད་བཞིན་ཡོད།”

ཟླ་འདིའི་ཕྱི་ཚེས་༢༧ ཉིན་ཝང་ཀང་གིས་བརྗོད་དོན། “ལོ་སྔོན་མའི་ནང་བོད་རང་སྐྱོང་ལྗོངས་ཀྱི་ལས་བྱེད་༡༥ ཚབས་ཆེའི་ཆབ་སྲིད་སྒྲིག་འགལ་གྱི་གནད་དོན་ལ་བརྟེན་ནས་ཏང་སྲིད་ཁྲིམས་གསུམ་གྱི་ཐོག་ནས་ཐག་གཅོད་བྱས་ཡོད་པ་དང་། སྡེ་ཚན་༦ ནང་གི་དམར་ཤོག་ཚོགས་མི་དང་གཞུང་གི་ལས་བྱེད་མི་སྣའི་ཆབ་སྲིད་སྒྲིག་འགལ་གྱི་གྱོད་དོན་གཞུང་འབྲེལ་ཐོག་གསལ་བསྒྲགས་བྱས་ཡོད་ལ། ད་དུང་ལས་བྱེད་༤༥ ཙམ་ལས་གནས་ནས་ཕྱིར་ཕུད་ཀྱིས་ཐག་གཅོད་ནན་མོ་བྱས་ཡོད།”

དེ་བཞིན་ཨེ་ཕེ་གསར་ཁང་གིས་རྒྱ་ནག་གཞུང་གིས་གསར་ཏུ་ཁྱབ་བསྒྲགས་བྱས་པའི་བོད་རང་སྐྱོང་ལྗོངས་ཀྱི་ཏང་ཡོན་ལས་བྱེད་མི་སྣ་ཆབ་སྲིད་སྒྲིག་འགལ་གནད་དོན་དང་འབྲེལ་བའི་སྐོར་གནས་ཚུལ་སྤེལ་བའི་ནང་དབྱེ་ཞིབ་བྱས་པ་ལྟར་ན། དམར་ཤོག་ཚོགས་པའི་ལས་བྱེད་ཀྱིས་བོད་རང་བཙན་ལས་འགུལ་ལ་རྒྱབ་སྐྱོར་བྱས་པའི་གནད་དོན་དེ། རྒྱ་ནག་གཞུང་གིས་ཕྱིར་ཁྱབ་བསྒྲགས་བྱས་པ་ནི་ཧ་ཅང་མཐོང་དཀོན་པ་ཞིག་ཡིན་ཞིང་། དེའི་ཐོག་ནས་བོད་དེ་མུ་མཐུད་དུ་བརྟན་ལྷིང་མེད་པའི་གནས་སྟངས་འོག་ཡོད་པའི་རྣམ་པ་མངོན་ཡོད་སྲིད་པ་ཞིག་ཡིན་འདུག

ཕྱི་ལོ་༢༠༠༨ ལོར་བོད་ས་སྟོད་སྨད་བར་གསུམ་དུ་རྒྱ་ནག་གི་དབང་བསྒྱུར་ལ་ཞི་བའི་ཡར་ལངས་ཀྱི་ངོ་རྒོལ་བྱས་པ་ནས་བཟུང་། རྒྱ་ནག་སྲིད་གཞུང་གིས་བོད་ཀྱི་ས་ཁུལ་ཡོངས་སུ་དམ་དྲག་ཆེན་པོ་བྱེད་བཞིན་ཡོད་པ་དང་། ཐེངས་འདིར་བོད་རང་སྐྱོང་ལྗོངས་ཀྱི་ཏང་ཡོན་ལས་བྱེད་མི་སྣ་བོད་རང་བཙན་གྱི་ལས་འགུལ་དང་འབྲེལ་བའི་ཉེས་འཛུགས་འོག ཕྱིར་ཁྱབ་བསྒྲགས་བྱེད་དགོས་པའི་རྒྱུ་རྐྱེན་གང་ཞིག་ཡིན་མིན་མིག་སྔར་ད་དུང་ཤེས་རྟོགས་མེད་ལ། གཞུང་ཕྱོགས་ནས་ཀྱང་རང་སྐྱོང་ལྗོངས་ཀྱི་འབྲེལ་ཡོད་ལས་བྱེད་སུ་ཞིག་གིས་གསང་བ་གང་ཞིག་ཕྱི་ཕྱོགས་སུ་མཁོ་སྤྲོད་བྱས་ཡོད་མེད་དང་། རྒྱལ་ཁབ་ཀྱི་བདེ་འཇགས་ལ་གནོད་སྐྱོན་ཅི་ཞིག་བཟོས་མིན་སོགས་ཀྱི་ཞིབ་ཕྲའི་གནས་ཚུལ་གང་ཡང་སྤེལ་མེད་ཀྱང་། གཞུང་གིས་སྐྱོན་འཛུགས་བྱས་པའི་མི་སྣ་དེ་དག་ཧ་ལམ་བོད་རིགས་ལས་བྱེད་ཡིན་སྲིད་པ་ཞིག་རེད།།

གསར་འགོད་པ་ཏྲེ་ཧོར་ཐུབ་བསྟན།