བོད་རྒྱལ་ཡོངས་བུད་མེད་རྐང་སྤོལ་རུ་ཁག་འཛམ་གླིང་བུད་མེད་རྐང་སྤོལ་འགྲན་བསྡུར་ནང་མཉམ་ཞུགས་མ་ཐུབ་པ།

ནོར་ཝེ་གཞུང་གིས་བོད་རྒྱལ་ཡོངས་བུད་མེད་རྐང་སྤོལ་རུ་ཁག་ལ་མཐོང་མཆན་རྐང་སྤོལ་འགོ་མ་བཙུགས་པའི་སྔོན་དུ་མ་རག་པའི་དབང་གིས་ཕྱི་ལོ་༢༠༢༤ ལོའི་ཀོ་ནི་ཧྥ་(CONIFA) ་ཞེས་པའི་འཛམ་གླིང་བུད་མེད་ཀྱི་རྐང་སྤོལ་གཟེངས་རྟགས་ཀྱི་འགྲན་བསྡུར་ནང་མཉམ་ཞུགས་གནང་མ་ཐུབ་པ་དང་། པྰ་ལགས་གསེར་གྱི་བུམ་པའི་རྐང་སྤོལ་འགྲན་བསྡུར་ཐེངས་དང་པོ་འགོ་འཛུགས་ལ་ཉེ་བའི་གནས་ཚུལ་འདུག

ཕྱི་ཚེས་༥ དགོང་མོར་བོད་རྒྱལ་ཡོངས་རྩེད་རིགས་ཚོགས་པའི་བརྒྱུད་ལམ་ཐོག་གི་གསལ་བསྒྲགས་སྤེལ་གསལ་ལྟར་ན། བོད་རྒྱལ་ཡོངས་རྩེད་རིགས་ཚོགས་པས་ལོ་འདིའི་ཕྱི་ཟླ་༣ པའི་ནང་རྩེད་འགྲན་པ་བསྡུ་རུབ་གནང་རྒྱུའི་གསལ་བསྒྲགས་སྤེལ་ནས་ཟླ་༤ ་པའི་ཟླ་མཇུག་ཏུ་རྩེད་འགྲན་པ་བསྡུ་རུབ་ཀྱི་ལས་དོན་དག་གྲུབ་ཅིང་། ཟླ་༦ ཚེས་༣ ནས་༨ བར་ཉིན་གྲངས་༦ གི་རིང་ནོར་ཝེ་ལ་༢༠༢༤ ལོའི་ཀོ་ནི་ཧྥ་(CONIFA) ་འཛམ་གླིང་བུད་མེད་ཀྱི་རྐང་སྤོལ་གཟེངས་རྟགས་ཀྱི་འགྲན་བསྡུར་ནང་མཉམ་ཞུགས་བྱེད་རྒྱུའི་གྲ་སྒྲིག་ཆ་ཚང་ཚར་ཡོད་ན་ཡང་། ནོར་ཝེ་གཞུང་གིས་མཐོང་མཆན་དུས་ལྟར་མ་སྤྲད་པའི་དབང་གིས་མཉམ་ཞུགས་གནང་ཐུབ་མེད་པ་རེད་འདུག ད་ལྟའི་ཆར་ཁོང་རྣམས་ལ་དྭགས་ཀྱི་རྐང་སྤོལ་འགྲན་བསྡུར་ནང་མཉམ་ཞུགས་ཆེད་རྒྱ་གར་བྱང་ཕྱོགས་ལ་དྭགས་སུ་འབྱོར་ཡོད་འདུག

གཞན་ཡང་བརྒྱུད་ལམ་ཁག་ཏུ་གནས་ཚུལ་སྤེལ་གསལ་ལྟར་ན། པྰ་ལགས་གསེར་གྱི་བུམ་པའི་རྐང་སྤོལ་འགྲན་བསྡུར་ཐེངས་དང་པོ་དེ་ཟླ་འདིའི་ཚེས་༡༦ ནས་ཉིན་གྲངས་བཅུའི་རིང་ལྡེ་ར་རྡུན་དོན་གྲུབ་གླིང་དུ་འཚོག་རྒྱུའི་གནས་ཚུལ་ཐོན་འདུག  ཐེངས་འདིའི་རྩེད་འགྲན་ནང་བལ་ཡུལ་དང་རྒྱ་གར་གྱི་ས་གནས་གང་ས་ནས་ཕེབས་པའི་རུ་ཁག་༡༣ མཉམ་ཞུགས་གནང་རྒྱུ་དང་རྩེད་འགྲན་པ་ཚང་མ་ལོ་ན་༤༠ བརྒལ་བ་ཤ་སྟག་ཆགས་ཡོད་འདུག

རྩེད་འགྲན་དེའི་དམིགས་ཡུལ་གཙོ་བོ་ནི་ལོ་ན་༤༠ བརྒལ་མཁན་ཚོའི་འཕྲོད་བསྟེན་ཡར་རྒྱས་གཏོང་རྒྱུའི་ཆེད་དུ་ཡིན་པ་དང་མ་འོངས་པར་ལོ་ལྟར་འཛམ་གླིང་ཨ་ཕའི་ཉིན་མོ་དང་སྟབས་བསྟུན་ནས་རྩེད་འགྲན་འཚོག་འཆར་ཡོད་འདུག།

གསར་འགོད་པ། བློ་བཟང་རྒྱ་མཚོ།