བོད་རྒྱལ་ཡོངས་རང་བཙན་ལྷན་ཚོགས་ཀྱིས་སྲིད་འཛིན་བྷ་ཌན་ལ་ངོ་རྒོལ་གྱི་བསྒྲགས་གཏམ་སྤེལ།

ཟླ་འདིའི་ཚེས་༡༧ ཉིན་ཨ་རིའི་ས་གནས་ནིའུ་ཡོག་དང་ནིའུ་འཇར་སི་བོད་རྒྱལ་ཡོངས་རང་བཙན་ལྷན་ཚོགས་ཀྱིས་ཨ་རིའི་སྲིད་འཛིན་གྱིས་བོད་རྒྱ་ནག་གི་ཆ་ཤས་ལ་ངོས་འཛིན་བྱས་པའི་སྐད་ཆ་དེར་ངོ་རྒོལ་གྱི་བསྒྲགས་གཏམ་ཤིག་ཚོགས་པའི་ངོ་དེབ་ཐོག་སྤེལ་འདུག། དེ་ཡང་བདུན་ཕྲག་གཅིག་གི་གོང་སྟེ་ཚེས་༡༢ ་ཉིན་ཨ་རིའི་སྲིད་འཛིན་ཇོ་བྷ་ཌན་གྱིས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་ལ་མཚན་རྟགས་བཀོད་ཡོད་པ་དང་། སྐབས་དེར་སྲིད་འཛིན་བྷ་ཌན་གྱིས་ཁྲིམས་ཡིག་དེས་ཆབ་སྲིད་ཚོགས་པ་གཉིས་ལས་གྲུབ་པའི་ཨ་རིའི་གཞུང་གིས་བོད་རང་སྐྱོང་ལྗོངས་དང་རྒྱ་ནག་གི་བོད་ཀྱི་ས་ཁུལ་གཞན་རྣམས་རྒྱ་ནག་གི་ཆ་ཤས་ལ་ངོས་འཛིན་བྱས་པའི་ཡུན་རིང་གི་སྲིད་བྱུས་ལ་འགྱུར་བ་བཏང་ཡོད་མ་རེད་ཅེས་བརྗོད་ཡོད་པར་བརྟེན། བོད་མི་མང་པོས་དེར་མི་འདོད་པའི་རྣམ་འགྱུར་བསྟན་ཡོད་པ་བཞིན། ཨ་རིའི་བོད་རྒྱལ་ཡོངས་རང་བཙན་ལྷན་ཚོགས་ཀྱིས་ཀྱང་ངོ་རྒོལ་གྱི་བསྒྲགས་གཏམ་ཞིག་སྤེལ་འདུག་པ་དང་།

བསྒྲགས་གཏམ་དེའི་ནང་དུ་སྲིད་འཛིན་བྷ་ཌན་གྱིས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་ལ་མཚན་རྟགས་བཀོད་པར་ཐུགས་རྗེ་ཆེ་ཞུས་པ་དང་། ཁོང་གི་བསྒྲགས་གཏམ་ལ་བློ་ཕམ་བྱུང་ཞེས་བཀོད་འདུག། དེ་བཞིན་སྲིད་འཛིན་བྷ་ཌན་གྱིས་བོད་ཀྱི་རང་དབང་དང་དམངས་གཙོ། འགྲོ་བ་མིའི་ཐོབ་ཐང་ལ་རྒྱབ་སྐྱོར་ཡོད་ཅེས་གསུང་གི་ཡོད་ན་ཡང་། སྲིད་འཛིན་གྱི་བོད་ནི་རྒྱ་ནག་གི་ཆ་ཤས་ཤིག་ཡིན་པའི་ངོས་འཛིན་དེས་གོང་གསལ་གྱི་རིན་ཐང་དེ་དག་དང་འགལ་ཟླ་ཆགས་ཀྱི་ཡོད་པ་དང་། བོད་ནི་རྒྱ་ནག་གི་ཆ་ཤས་ནམ་ཡང་མིན་པ་དང་ང་ཚོས་མུ་མཐུད་རང་དབང་གི་དོན་དུ་རྒྱ་ནག་དམར་ཤོག་ཚོགས་པ་དང་འཐབ་རྩོད་བྱེད་བཞིན་ཡོད་སོགས་བཀོད་འདུག།

གསར་འགོད་པ། བློ་བཟང་རྒྱ་མཚོ།