བོད་རྩེད་འགྲན་གྱི་ཐོག་ནས་མངོན་ཐུབ།

བོད་ཀྱི་བང་ཆེན་སྤྱིའི་འདོན་ཐེངས་ ༤༩༥ ཕྱི་ལོ་ ༢༠༡༤/༦/༡༨

རྩེད་མོ་ལ་རྣམ་གྲངས་ཧ་ཅང་མང་པོ་ཡོད་པ་དང་དེ་དག་ཚང་མ་མིའི་འཚོ་ལ་དངོས་ལ་བརྟེན་ནས་བྱུང་བའི་ཉམས་མྱོང་ལས་བྱུང་བ་འབའ་ཞིག་ཡིན། སྤྱི་ཚོགས་གང་ཞིག་ཡིན་ཡང་རྩེད་མོའི་རིགས་དར་ཁྱབ་བྱུང་བའི་བརྒྱུད་རིམ་དང་བསམ་བློའི་རྒྱབ་ལྗོངས། ལྷག་པར་དུ་རིག་གནས་དང་འཚོ་བའི་ཁོར་ཡུག་ལ་བརྟེན་ནས་རྩེད་མོའི་རིགས་མི་འདྲ་བ་མང་པོ་བྱུང་ཡོད་པ་མ་ཟད། རྩེད་མོའི་རྣམ་གྲངས་དེ་དག་ལ་བརྟེན་ནས་མི་རིགས་དེའི་ཐུན་མོང་མ་ཡིན་པའི་རིག་གཞུང་གི་ངོ་བོ་ཡང་རགས་ཙམ་རྟོགས་ཐུབ་པ་ཞིག་རེད། བོད་ལ་ཐུན་མོང་མ་ཡིན་པའི་རྩེད་རིགས་གང་མང་ཞིག་དར་ཁྱབ་བྱུང་བའི་ནང་ནས་དེང་སྐབས་འཛམ་གླིང་དུ་དར་ཁྱབ་ཆེ་བའི་རྟ་རྩལ་སྤོ་ལོ་ནི་བོད་ནས་ཐོག་མ་དར་ཁྱབ་བྱུང་བ་ཞིག་ཡིན་པ་དང། དར་རས་དྲིལ་ནས་རྡོག་རྡོག་བཟོས་ཤིང་རྟ་གོང་ནས་དབྱུག་པ་ལ་བརྟེན་ནས་རྩེ་བའི་སྤོ་ལོ་ཞིག་ཡིན་ལ་དར་གྱི་ཕོ་ལོང་ཡང་ཟེར། རྒྱ་བཟའ་གོང་འཇོ་བོད་ལ་མནའ་མར་བསུ་སྐབས་རྟ་རྩལ་སྤོ་ལོ་འགྲན་ནས་རྒྱ་ནག་ཕམ་པར་བཟོས་པའི་གཏམ་རྒྱུད་དང། རྟ་རྩལ་སྤོ་ལོ་ཐོག་མ་བོད་ནས་དར་བ་རྒྱ་ནག་གིས་ཀྱང་ཁས་ལེན།

ད་ལྟའི་ཆར་བོད་ལ་དམག་དོན་དང་དཔལ་འབྱོར་ཆབ་སྲིད་སོགས་གང་ཐད་ནས་ཤུགས་རྐྱེན་དང་ཁོར་ཡུག་རྒྱ་ཆེན་པོ་གང་ཡང་མེད་ཀྱང། བོད་དུ་ཡོད་པའི་བོད་རིགས་རྣམས་ཀྱིས་རྒྱ་ནག་གི་མིང་ཐོག་ནས་རྒྱལ་སྤྱིའི་རྩེད་འགྲན་ཁག་ཏུ་ཞུགས་ཐུབ་པ་ཞིག་དང། བཙན་བྱོལ་ནང་དུ་ཡོད་མཁན་ཚོས་ཡུལ་ལུང་སོ་སོའི་མིང་ཐོག་ནས་རྒྱལ་སྤྱིའི་རྩེད་འགྲན་ཁག་ཏུ་ཞུགས་ཐུབ་པ་ཞིག་བྱུང་ན། དེ་ལ་བརྟེན་ནས་བོད་དང་བོད་མི་རིགས་ངོ་སྤྲོད་བྱེད་རྒྱུར་ཕན་ཐོགས་ཆེན་པོ་ཡོད། དཔེར་ན་སྐབས་སྔོན་མ་རྒྱལ་སྤྱིའི་ཨོ་ལིམ་པིག་རྩེད་འགྲན་ནང་བོད་རིགས་བུ་མོ་ཞིག་གིས་རྒྱང་རྒྱུག་འགྲན་སྡུར་ནང་ཨང་གསུམ་པ་ལེན་ཐུབ་པ་བྱུང་ཞིང། དེ་ལ་བརྟེན་ནས་སེམས་ཤུགས་འཕར་མཁན་གྱི་བོད་པ་མང་པོ་བྱུང་ཡོད། བཙན་བྱོལ་ནང་ནས་ཀྱང་གོ་སྐབས་དེ་ལྟ་བུ་རྩོད་ལེན་བྱེད་དགོས་པ་གལ་ཆེ་བ་མ་ཟད། ན་གཞོན་སྒེར་སོ་སོའི་ངོས་ནས་རྩེད་རིགས་སོ་སོར་རིགས་གཅིག་རྐང་འཛིན་གྱིས་སྦྱང་བརྩོན་དང། སྒྲིག་འཛུགས་དང་འབྱོར་ལྡན་རྣམས་ཀྱི་ངོས་ནས་དེ་ལ་མཐུན་རྐྱེན་སྦྱོར་སྤྲོད་བྱེད་ཐུབ་ན་གོ་སྐབས་དེ་གཏན་ནས་ལེན་མི་ཐུབ་པ་ཞིག་ཀྱང་ཡིན་རྒྱུ་མ་རེད།

བཙན་བྱོལ་བོད་མི་ལ་མཚོན་ན་རྩེད་མོའི་ནང་ནས་དོ་སྣང་དང་དབྱིངས་ཆེ་ཤོས་རྐང་རྩེད་སྤོ་ལོ་འདི་ཉིད་ཡིན་ལ། བོད་རྒྱལ་ཡོངས་རྩེད་རིགས་ཚོགས་པ་ཞེས་པ་ཞིག་ཡོད་ཅིང། དེའི་ངོས་ནས་ཀྱང་ལོ་ལྟར་རྒྱལ་ཡུམ་ཆེན་མོ་རྗེས་དྲན་གྱི་རྐང་སྤོལ་རྩེད་འགྲན་གོ་སྒྲིག་བྱེད་བཞིན་ཡོད། ལོ་ཁ་ཤས་སྔོན་རྒྱལ་ཁབ་གཞན་ཁག་ཅིག་དང་མཉམ་དུ་རྩེད་འགྲན་བྱ་རྒྱུའི་གོ་སྐབས་ཀྱང་བྱུང་ཡོད་པ་སོགས་དེའི་ཐོག་ནས་རྩེད་རིགས་གཞན་དང་མི་འདྲ་བར་ཉམས་མྱོང་ཡང་གང་འཚམས་ཆེན་པོ་ཡོད་པས། ན་གཞོན་ཁག་གཅིག་ལ་ཆེད་དུ་མཐུན་རྐྱེན་སྦྱར་ནས་རྐང་རྩེད་སྤོ་ལོའི་ཐོག་སྦྱོང་བརྡར་སྤྲད་དེ་སྐད་གྲགས་ཡོད་པའི་རྩེད་འགྲན་པ་གསོ་སྐྱོང་བྱེད་ཐུབ་ན། གནས་ཡུལ་རྒྱལ་ཁབ་ཀྱི་མིང་ཐོག་ནས་རྒྱལ་སྤྱིའི་རྩེད་འགྲན་ཁག་ཏུ་ཞུགས་ཐུབ་པའི་འབད་བརྩོན་བྱེད་དགོས་ཤིང། རྩེད་འགྲན་པ་གྲགས་ཅན་མི་སྣ་གཅིག་ལས་གསོ་སྐྱོང་བྱེད་མ་ཐུབ་པའི་དབང་དུ་བཏང་ཡང་ཆེ་ས་ནས་རྒྱལ་ཁབ་དང་མི་རིགས་ཀྱི་ལ་རྒྱ་ལ་ཕན་པ་དང། ཆུང་ས་ནས་མི་སྒེར་སོ་སོའི་འཚོ་བའི་ཐོག་ནས་བཤད་ཀྱང་གྲུབ་འབྲས་ཆེན་པོ་ཡོད་པ་ནི་སྨྲོས་མ་དགོས་པ་རེད།

གོ་སྐབས་འདི་འཛིན་ཐུབ་པར་གཞུང་སྒེར་གཉིས་ཀའི་ཐོག་ནས་དོ་སྣང་བྱེད་དགོས་པ་དང། མ་འོངས་པར་རྩེད་འགྲན་མི་སྣ་གསོ་སྐྱོང་བྱ་རྒྱུ་དེ་བོད་དོན་དྲིལ་བསྒྲགས་ཀྱི་ཆ་ནས་བཤད་ཀྱང། རྒྱལ་སྤྱིའི་རྩེད་འགྲན་པ་རྣམས་དང་དཔུང་པ་མཉམ་གཤིབས་བྱེད་ཐུབ་མཁན་གྱི་མི་སྣ་རེ་ཟུང་ཞིག་ཐོན་ཐུབ་ན། བོད་མི་རིགས་ཀྱི་སེམས་ཤུགས་འཕར་ཐབས་སོགས་ཕྱོགས་གང་ཐད་ནས་གལ་འགངས་ཆེན་པོར་གྱུར་ཡོད། དེ་ལྟ་བུའི་མི་སྣ་གསོ་སྐྱོང་བྱ་རྒྱུ་དེ་ཧ་ཅང་དཀའ་ངལ་ཆེན་པོ་ཞིག་མིན་པ་དང། དཔེར་ན་རྒྱ་གར་ལ་མཚོན་ན་(Cricket)དབྱུག་རྩེད་སྤོ་ལོའི་རྩེད་འགྲན་ལ་དོ་སྣང་ཆེན་པོ་ཡོད་པས། སྐད་གྲགས་ཡོད་པའི་རྩེད་འགྲན་པ་དེ་དག་ནི་རྒྱ་གར་མི་མང་གི་སེམས་ནང་དུ་ལྷ་ལྟ་བུར་བརྩི་བ་དང། དཔལ་འབྱོར་གྱི་ཐོག་ནས་ཕྱུག་བདག་འབའ་ཞིག་ཏུ་གྱུར་ཡོད། རྒྱ་གར་ནང་འཚར་ལོང་བྱུང་བའི་བོད་རིགས་ན་གཞོན་གཅིག་ཙམ་འདི་ལྟ་བུའི་རྩེད་འགྲན་པའི་ནང་ཚུད་ཐུབ་པ་བྱུང་ཡང། སྤྱི་སྒེར་གང་ཐད་ནས་ཕན་ནུས་ཆེན་པོ་ཡོད་པ་ནི་བཤད་མ་དགོས་པ་རེད།

གོ་སྐབས་འདི་ལེན་ཐུབ་པ་ཞིག་ཡོང་རྒྱུར་དུས་ཡུན་གང་འཚམས་ཤིག་འགོར་དགོས་ཀྱང། དུས་ཐུང་ནང་ནུས་པ་ཐོན་ཐུབ་པའི་ཐབས་ལམ་གཞན་གང་ཡང་མེད་པས་ཐབས་ཤེས་འདི་ལྟ་བུར་ཡང་བསམ་བློ་ངེས་པར་དུ་གཏོང་དགོས་པ་ཞིག་ཏུ་གྱུར་ཡོད། དེ་བཞིན་གཞས་པ་སྐད་གྲགས་ཅན་དང། ཞབས་བྲོའི་སྒྱུ་རྩལ་བ། གློག་བརྙན་འཁྲབ་སྟོན་པ་སོགས་སྒྱུ་རྩལ་ལས་རིགས་ཀྱི་ཐོག་ནས་བོད་རིགས་མི་སྣ་གྲགས་ཅན་གསོ་སྐྱོང་བྱེད་ཐུབ་ན། རྒྱ་གར་སོགས་མི་རིགས་གཞན་དག་གི་སེམས་ནང་དུ་ཤུགས་རྐྱེན་ཆེན་པོ་ཐེབས་ཐུབ་པ་དང། བོད་མི་རིགས་ཀྱི་གཟི་བརྗིད་ངོམ་ཐུབ་ལ། བོད་མི་རིགས་ཀྱི་སྤོབས་པ་ཡང་རྒྱས་ཐུབ། གནད་དོན་འདི་དག་ནི་ཕྱོགས་རེ་ཟུང་ནས་བལྟས་ན་བོད་རིགས་ཆེད་མཁས་མི་སྣ་གསོ་སྐྱོང་བྱ་རྒྱུའི་འཆར་གཞིའི་ནང་ནས་གཙོ་གནད་དུ་འཛིན་དགོས་པ་ཞིག་ཏུ་གྱུར་ཡོད་ལ། མི་སྣ་སྐད་གྲགས་ཅན་རེ་ཟུང་ཞིག་ཐོན་སོང་ན་དེའི་རྗེས་སུ་རང་བཞིན་གྱིས་དོ་སྣང་བྱེད་མཁན་གཞོན་སྐྱེས་མང་པོ་ཡོང་ངེས་རེད།།