བོད་ཨ་མདོ་རྔ་པ་རུ་རང་ལུས་མེར་སྲེག་གི་རྒྱ་རྒོལ།

ཟླ་འདིའི་ཚེས་༡༦ ཉིན་བོད་མི་གནས་སྐྱབས་ཀྱིས་བོད་ཨ་མདོ་རྔ་བ་རྫོང་ལྷ་སྡེ་འགབ་མའི་རང་ཁྱིམ་ར་བའི་ནང་རང་ལུས་མེར་སྲེག་གིས་རྒྱ་རྒོལ་བྱས་རྗེས་སྐུ་ཕུང་རྒྱ་གཞུང་གི་ཉེན་རྟོག་པས་ཁྱེར་བ་དང་། སྤུན་གནས་གང་དང་། མག་པ་ཚེ་རིང་བསམ་འགྲུབ་གཉིས་འདྲི་གཅོད་བཙན་ཁྲིད་བྱས་ཡོད་འདུག

འབྲེལ་ཡོད་ཀྱིས་གནས་ཚུལ་འགྲེལ་བརྗོད་བྱས་པ་ལྟར་ན། ཁོང་གི་མིང་ལ་དམ་དཀར་རམ་གནས་སྐྱབས་ཟེར་གྱི་ཡོད་པ་དང་། རྔ་བ་ཨ་འདུས་རྒྱ་དས་སྡེ་བ་ནས་ཡིན་ཞིང་། ཨ་འདུས་དགོན་པར་གྲྭ་པ་བྱེད་མྱོང་ཡོད་འདུག སྐྱ་སར་བབ་རྗེས་རྔ་བ་རྫོང་དུ་ཀིརྟིའི་ལྷ་སྡེ་འགབ་མར་སོ་རུ་མའི་བུ་མོ་ཞིག་དང་ལྷན་འཚོ་སྡོད་བྱས་ཏེ། འཚོ་བ་ཞིང་ལས་དང་། ཤུལ་དུ་བུ་བུ་མོ་བདུན་ཡོད་འདུག ད་ལྟ་ཁོང་རང་ལོ་༤༥ ཡིན་པ་དང་། ཕ་མིང་ལ་གནས་མོ་དང་། མ་མིང་ལ་དཀར་སྒྲེས་མ་ཟེར་ཞིང་། སྔོན་ནས་ཕ་མ་གཉིས་སྔོན་ནས་འདས་གྲོངས་སོང་ཡོད་འདུག

འབྲེལ་ཡོད་ཀྱིས་གནས་ཚུལ་ངོ་སྤྲོད་བྱས་པ་ལྟར་ན། དེ་སྔོན་ཁོང་གིས་འཛམ་གླིང་ཞི་བདེ་དང་། རྒྱལ་བའི་ཞབས་བརྟན་ཆེད་སྤྱིར་མི་སུ་ཡིན་དང་། ཡང་སྒོས་བོད་མི་གང་ཡིན་ལ་ཡང་འཁྲུག་རྩོད་མི་བྱེད་པའི་དམ་བཅའ་བཞག་ཡོད་འདུག སྐབས་དེར་རྔ་བའི་དགོན་ཁག་ཞེ་གཉིས་ཐུན་མོང་གིས་གནང་བཞིན་པའི་ཞི་བདེའི་དཔུང་རྟགས་ཡང་ཐོབ། དེའི་རྗེས་མི་ངན་འགས་གྲི་འཕྱར་ཞིང་གསོད་དགོས་ཚུལ་གྱི་འཇིགས་སྐུལ་ཡ་ང་བ་བྱས་ཀྱང་། དམ་བཅའ་ལས་མ་གཡོལ་ཞིང་ཀུན་སྤྱོད་ཡང་དག་གི་ལམ་ནས་འཁོན་ལན་ནམ་ཡང་སློག་མྱོང་མེད་པ་རེད།

རང་ལུས་མེར་སྲེག་མ་བཏང་བའི་སྔོན་དེར་༧རྒྱལ་པཎ་རྣམ་གཉིས་ཀྱི་སྐུ་པར་བཤམས་ཤིང་། ཡོན་ཆབ་སོགས་ཕུལ་ནས་རང་ལུས་མེར་སྲེག་བཏང་སྟེ་སྐུ་གྲོངས་ཡོད་འདུག

ཁོང་ནི་སྐད་ཕྲིན་སོགས་གང་དུ་ཡང་འཛམ་གླིང་ཞི་བདེ་དང་། མི་རིགས་མཐུན་སྒྲིལ། རྒྱལ་བའི་བཀའ་དགོངས་བཅས་ཀྱི་ཐད་ནམ་རྒྱུན་གླེང་སློང་མཁན་ཞིག་ཡིན་པ་དང་། སྐད་འཕྲིན་དྲ་མིང་ལ་ཁ་བའི་དོན་གྲུབ་ཅེས་བཏགས་ཡོད་འདུག །
གསར་འགོད་པ་ཆོས་ཉིད་འོད་ཟེར།