བྱང་ཀོ་རི་ཡས་ཨུ་རུ་སུའི་གླས་དམག་ལ་མཚོན་ཆ་བཙོངས་མེད་སྐོར་བརྗོད་འདུག 

ཨ་རིས་བྱང་ཀོ་རི་ཡར་ཨུ་རུ་སུའི་གླས་དམག་ལ་མཚོན་ཆ་བཙོངས་པའི་ཉེས་འཛུགས་བྱས་འདུག་པས། བྱང་ཀོ་རི་ཡས་ཉེས་འཛུགས་དེ་ནི་ཁུངས་ལུང་མེད་པའི་ཉེས་འཛུགས་ཤིག་ཡིན་སྐོར་བརྗོད་ནས་ཁས་ལེན་བྱས་མི་འདུག 

ཟླ་༡༢ པའི་ཚེས་༢༣ ཉིན་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ། ཨ་རིའི་དབུས་གཞུང་གི་རྒྱལ་ཁབ་ཀྱི་བདེ་སྲུང་ལས་ཁང་གི་མགྲིན་ཚབ་པས་བརྗོད་དོན་ལ། ཨུ་རུ་སུའི་གླས་དམག་རུ་ཁག་ཝེག་ནཱར་ཞེས་པ་དེས། ཡུག་ཀེ་རན་ནང་གི་དམག་འཁྲུག་དེའི་ཆེད་དུ་འཛམ་གླིང་གང་སར་མཚོན་ཆ་འཚོང་མཁན་འཚོལ་བཞིན་ཡོད་པ་དང་། བྱང་ཀོ་རི་ཡས་གླས་དམག་རུ་ཁག་དེར་མཚོན་ཆ་མཁོ་སྤྲོད་བྱས་ཡོད་ཁར། གླས་དམག་གིས་ཀྱང་བྱང་ཀོ་རི་ཡར་དངུལ་སྤྲད་ཡོད་པའི་གནས་ཚུལ་ཁུངས་ལྡན་ར་སྤྲོད་བྱུང་བས། གནད་དོན་དེ་ནི་མཉམ་འབྲེལ་རྒྱལ་ཚོགས་ཀྱི་བདེ་འཇགས་ལྷན་ཚོགས་ཀྱི་གྲོས་ཆོད་དང་འགལ་གྱི་ཡོད་པ། དེ་ལ་བརྟེན་ནས་ཨུ་རུ་སུའི་གླས་དམག་རུ་ཁག་དེར་དཔལ་འབྱོར་ཉེས་ཆད་སྣོན་མ་གསལ་བསྒྲགས་བྱེད་རྒྱུ་ཡིན་སྐོར་བརྗོད་འདུག 

དེ་ཡང་ཨུ་རུ་སུའི་གླས་དམག་རུ་ཁག་ཝེག་ནཱར་ཞེས་པ་དེ་ཉེ་ཆར་སི་རི་ཡ་དང་ཨ་ཧྥེ་རི་ཀའི་རྒྱལ་ཁབ་ཁག་ཅིག་གི་དམག་འཁྲུག་ནང་དུ་མཉམ་ཞུགས་བྱས་ཡོད་འདུག་པ་དང་། རུ་ཁག་དེར་ད་བར་དམག་འཁྲུག་གི་ནག་ཉེས་དང་འགྲོ་བ་མིའི་ཐོབ་ཐང་རྡོག་རོལ་བཏང་བའི་ཉེས་འཛུགས་ཐེངས་མང་པོར་བྱས་ཡོད་པ་རེད་འདུག 

ཕྱི་ལོ་༢༠༢༢ ལོའི་ཟླ་༣ པའི་ནང་ཡུག་ཀེ་རན་དུ་གླས་དམག་རུ་ཁག་དེའི་དམག་མི་༡༠༠༠ ཞིག་བཏང་ཡོད་འདུག་པ་དང་། ཕྱིས་སུ་རུ་ཁག་དེའི་དམག་མིའི་གྲངས་འབོར་འཕར་ནས་༢༠༠༠༠ ལས་མང་བ་ཆགས་ནས། ཨུ་རུ་སུའི་དམག་གི་བརྒྱ་ཆ་༡༠ ཙམ་གླས་དམག་རུ་ཁག་དེའི་དམག་མི་ཡིན་འདུག 

ཨ་རིས་བརྗོད་དོན་ལྟར་ན། གླས་དམག་རུ་ཁག་དེས་ཡུག་ཀེ་རན་ནང་གི་དམག་འཁྲུག་ཆེད་དུ་ཟླ་རེར་ཨ་སྒོར་ས་ཡ་༡༠༠ ལས་མང་བའི་འགྲོ་སོང་གཏོང་གི་ཡོད་འདུག 

དབྱིན་ཡུལ་གྱི་ཕྱི་སྲིད་དྲུང་ཆེ་ཇེམ་སེ་ཁེ་ལེ་ཝེར་ལཱི་ཡིས་ཨ་རིའི་སྐད་ཆར་རྒྱབ་སྐྱོར་བྱས་ཏེ། ཨུ་རུ་སུས་བྱང་ཀོ་རི་ཡ་ནས་རོགས་པ་སློང་གི་ཡོད་པ་དེ་ལས། ཨུ་རུ་སུ་འུ་ཐུག་གི་ཡོད་པ་དང་རྒྱལ་སྤྱིའི་ཚོགས་སྡེ་ཁག་ནས་ཁེར་རྐྱང་དུ་ལུས་ཡོད་པའི་རྣམ་པ་གསལ་པོ་ཐོན་ཡོད་སྐོར་བརྗོད་འདུག 

བྱང་ཀོ་རི་ཡའི་མགྲིན་ཚབ་པས་ཨ་རིའི་སྐད་ཆ་དེ་ཁུངས་ལུངས་མེད་པ་ཞིག་ཡིན་པ་དང་། ཨུ་རུ་སུ་དང་ཡུག་ཀེ་རན་བར་གྱི་དམག་འཁྲུག་ཐད། བྱང་ཀོ་རི་ཡའི་ལངས་ཕྱོགས་འགྱུར་བ་ཕྱིན་མེད་པ། གླས་དམག་དང་བྱང་ཀོ་རི་ཡ་བར་ཚོང་འབྲེལ་དེ་འདྲ་གང་ཡང་བྱུང་མེད་སྐོར་བརྗོད་འདུག 

དེ་བཞིན་གླས་དམག་ཝེག་ནཱར་གྱི་བདག་པོ་དང་འགོ་ཁྲིད་(Yevgeny Prigozhin)ཡིས་ཨ་རིའི་ཉེས་འཛུགས་དེར་ཁས་ལེན་བྱས་མེད་ཁར། དེ་ནི་དཀྲོག་གཏམ་ཡིན་པ་དང་ཚོད་དཔག་བྱས་པའི་སྐད་ཆ་ཞིག་ཡིན་སྐོར་བརྗོད་འདུག 

ཕྱི་ལོ་༢༠༡༤ ལོར་ཨུ་རུ་སུས་ཡུག་ཀེ་རན་གྱི་ཁཱེ་རི་མི་ཡར་བཙན་འཛུལ་བྱས་སྐབས། གླས་དམག་རུ་ཁག་དེས་མཉམ་ཞུགས་བྱས་ཡོད་འདུག་པ་དང་། ད་ལྟའི་ཆར་ཡུག་ཀེ་རན་ནང་ཨུ་རུ་སུའི་གཞུང་དམག་ལ་ཕམ་ཁ་ཆེན་པོ་འབྱུང་བཞིན་པའི་གནས་ཚུལ་ཐོན་གྱི་ཡོད་པས། གླས་དམག་དེའི་དབང་ཤུགས་ཆེ་རུ་སོང་ཡོད་སྐོར་བརྗོད་བཞིན་འདུག 

དབྱིན་ཡུལ་གྱིས་བརྗོད་དོན་ལྟར་ན། གླས་དམག་རུ་ཁག་དེས་ཨུ་རུ་སུའི་བཙོན་ཁང་ཁག་ནས་བཙོན་པ་མང་པོ་ཞིག་དམག་མིའི་ནང་དུ་གསར་འཇུག་བྱེད་ཀྱི་ཡོད་འདུག་པ་དང་། ཕྱི་ལོ་༢༠༢༢ ལོའི་ཟླ་༩ པ་དང་༡༠ པའི་ནང་ཨུ་རུ་སུའི་བཙོན་ཁང་ཁག་ནང་བཙོན་པའི་གྲངས་འབོར་༢༣༠༠༠ ལས་མང་བ་ཉུང་དུ་ཕྱིན་ཡོད་ཁར། དུས་སྐབས་དེའི་རིང་གླས་དམག་རུ་ཁག་དེས་བཙོན་པ་རྣམས་དམག་མིར་གསར་འཇུག་བྱས་ཡོད་འདུག །

གསར་འགོད་པ་སྐལ་བཟང་དོན་གྲུབ།