བྱང་ཆིངས་སྒྲིག་འཛུཌ་ཀྱི་ཚོཌ་འདུའི་ཐོག་རྒྱལ་ཁབ་དུ་མས་ཡུག་རེན་ལ་མཚོན་ཆ་མང་པོ་སྤྲོད་རྒྱུའི་ཁས་ལེན་བྱས།
བདུན་ཕྲག་འདིར་ཨ་རིའི་ནང་བྱང་ཆིངས་སྒྲིག་འཛུགས་ཀྱི་ཚོགས་འདུ་འཚོག་བཞིན་ཡོད་འདུག་པ་དང་། ཚོགས་འདུའི་ཐོག་ཡུག་རེན་གྱི་གནད་དོན་གཙོ་བོར་བྱས་པའི་རྒྱལ་སྤྱིའི་གནད་དོན་དུ་མའི་སྐོར་གླེང་སློང་བྱེད་བཞིན་ཡོད་འདུག
ཕྱི་ཚེས་༡༠ ཉིན་རྒྱལ་སྤྱིའི་གསར་ཁང་ཆེ་ཁག་གིས་གནས་ཚུལ་སྤེལ་གསལ་ལྟར་ན། བདུན་ཕྲག་འདིའི་གཟའ་མིག་དམར་ཉིན་ཨ་རིའི་རྒྱལ་ས་ཝ་ཤིན་ཊོན་དུ་(Washington DC)བྱང་ཆིངས་སྒྲིག་འཛུགས་ཀྱི་ཚོགས་འདུ་ཚོགས་འགོ་བཙུགས་ཡོད་འདུག་ལ། ཉིན་གྲངས་གསུམ་རིང་འཚོགས་རྒྱུ་ཡིན་པའི་ཚོགས་འདུ་འདིའི་ཐོག་བྱང་ཆིངས་སྒྲིགས་འཛུགས་ཀྱི་ཚོགས་མི་རྒྱལ་ཁབ་༣༢ མཉམ་ཞུགས་གནང་ཡོད་འདུག ཐེངས་འདིའི་ཚོགས་འདུའི་ཐོག་རྒྱལ་སྤྱི་དང་བྱང་ཆིངས་སྒྲིག་འཛུགས་སོགས་ཀྱི་གནད་དོན་དུ་མ་ཞིག་གི་སྐོར་གླེང་སློང་ཆེན་པོ་བྱེད་བཞིན་ཡོད་འདུག་པ་ལས། གནད་དོན་གལ་ཆེ་ཤོས་གཅིག་ནི་ཨུ་རུ་སུ་དང་ཡུག་རེན་གཉིས་བར་གྱི་དམག་འཁྲུག་སྐོར་ཡིན་འདུག
ཚོགས་འདུ་དབུ་འབྱེད་མཛད་སྒོའི་ཐོག་ཨ་རིའི་སྲིད་འཛིན་ཇོ་བྷ་ཌན་གྱིས་ཁོང་འབྱུང་འགྱུར་ཨ་རིའི་འོས་བསྡུའི་ཁྲོད་མཉམ་ཞུགས་གནང་ནས་རྒྱལ་ཁ་ལེན་རྒྱུ་ཡིན་པའི་གཏམ་བཤད་གནང་ཡོད་འདུག་ལ། དེ་བཞིན་ད་ཆར་ཨུ་རུ་སུས་ཡུག་རེན་ཐོག་མི་སྤྱོད་ལས་འདས་པའི་གཏོར་རྒོལ་བྱེད་ཀྱི་ཡོད་པས། མ་འོངས་པར་བྱང་ཆིངས་སྒྲིག་འཛུགས་ཀྱི་ཐོག་ནས་རོགས་རམ་མུ་མཐུད་ནས་བྱེད་རྒྱུ་གལ་ཆེན་ཡིན་པ་དང་། ཨུ་རུ་སུས་གོ་ལའི་སྒྲོམ་གཞི་སྤྱི་ཡོངས་ལ་གནོད་སྐྱོན་གཏོང་ཐབས་བྱེད་ཀྱི་ཡོད་པས། ཡུག་རེན་ལ་རོགས་རམ་བྱས་ནས་གཅིག་བསྡུའི་དབང་འཛིན་རིང་ལུགས་པར་རྒྱལ་ཁ་ཐོབ་བཅུག་མི་ཉེན་པར་བརྗོད་ཡོད་འདུག སྐབས་འདིའི་ཚོགས་འདུའི་ཐོག་ཨ་རི་དང་། འཇར་མན། ཨི་ཊ་ལི། ནེ་ཐར་ལན་ཌི་བཅས་ནས་ཡུག་རེན་ལ་གོ་མཚོན་འགོག་རྒོལ་བྱེད་ཆེད་ཀྱི་གོ་མཚོན་མང་པོ་ཞིག་སྤྲོད་རྒྱུ་ཁས་ལེན་བྱས་ཡོད་འདུག
ཇོ་བྷ་ཌན་གྱིས་ཡུག་རེན་ནམ་ཡང་ཕམ་ཉེས་འབྱུང་གི་མ་རེད། ཡུག་རེན་ནམ་ཡང་རང་དབང་དང་རང་བཙན་རྒྱལ་ཁབ་གཅིག་ལ་གནས་ཀྱི་རེད་ཅེས་བརྗོད་ཡོད་འདུག བྱང་ཆིངས་སྒྲིག་འཛུགས་ཀྱི་ཚོགས་འདུ་འཚོག་བཞིན་པའི་སྐབས་སུ་ཨ་རིའི་དམངས་གཙོ་ཚོགས་པའི་གྲོས་ཚོགས་འཐུས་མི་རྣམས་ཀྱིས། ཇོ་བྷ་ཌན་མ་འོངས་པའི་སྲིད་འཛིན་འོས་མིའི་ནང་བཞག་ནས་ཁ་གཏད་སྲིད་འཛིན་ཟུར་པ་ཌོ་ནལ་ཊམ་ཕམ་ཉེས་གཏོང་ཐུབ་མིན་གྱི་སྐོར་གྲོས་བསྡུར་བྱས་ཡོད་འདུག ཨ་རིའི་གྲོང་ཁྱེར་(New Jersey)ནས་ཡིན་པའི་དམངས་གཙོ་ཚོགས་པའི་འཐུས་མི་(Mikie Sherrill)ཟེར་བ་ཞིག་གིས་ཇོ་བྷ་ཌན་འོས་བསྡུ་འདིའི་ནང་མ་ཞུགས་རོགས་ཞེས་བརྗོད་ཡོད་འདུག
དེ་བཞིན་བྱང་ཆིངས་སྒྲིག་འཛུགས་ཀྱི་འཐུས་མི་ཡིན་པའི་ཡུ་རོབ་ཀྱི་འཐུས་མི་མིང་བརྗོད་འདོད་མེད་པ་ཞིག་གིས་ངས་ཇོ་བྷ་ཌན་མ་འོངས་པའི་ལོ་བཞིའི་ནང་ཨ་རིའི་སྲིད་འཛིན་ལས་ཁུངས་དང་བྱང་ཆིངས་སྒྲིག་འཛུགས་ནང་འདུག་ཐུབ་ཡོང་བསམ་པའི་བསམ་བློ་ནམ་ཡང་འཁོར་ཐུབ་ཀྱི་མི་འདུག་ཅེས་བརྗོད་འདུག འོན་ཀྱང་། ཨ་རིའི་ཕོ་བྲང་དཀར་པོའི་མགྲིན་ཚབ་པས་ཇོ་བྷ་ཌན་འོས་མིའི་ནང་ལང་རྒྱུ་ཡིན་པ་དང་། ཁོང་སྲིད་འཛིན་འོས་མི་བྱེད་ཐུབ་ཀྱི་ཡོད་ཚུལ་སོགས་རྒྱབ་སྐྱོར་བྱེད་ཀྱི་ཡོད་འདུག
ད་ཆར་དབྱིན་ཡུལ་གྱི་འོས་བསྡུའི་ཁྲོད་ངལ་རྩོལ་སྲིད་དོན་ཚོགས་པར་རྒྱལ་ཁ་ཐོབ་ཡོད་འདུག་པ་དང་། དབྱིན་ཡུལ་གྱི་སྲིད་བློན་གསར་པ་(Keir Starmer)ཡིས་བྱང་ཆིངས་སྒྲིག་འཛུགས་ཀྱི་ཚོགས་འདུ་མ་འཚོགས་སྔོན་དུ་གསལ་བསྒྲགས་ཤིག་སྤེལ་ཡོད་འདུག དེའི་ནང་དུ་བརྗོད་དོན། དབྱིན་ཡུལ་གྱི་ངོས་ནས་བྱང་ཆིངས་སྒྲིག་འཛུགས་ལ་རྒྱབ་སྐྱོར་ཡོད་པ་དང་། ཨུ་རུ་སུས་ཡུག་རེན་ལ་བཙན་འཛུལ་བྱེད་ཐབས་ག་ཚོད་བྱས་ཀྱང་། བྱང་ཆིངས་སྒྲིག་འཛུགས་ནི་སྔར་ལས་སྟོབས་ཇེ་ཆེ་དང་མཐུན་སྒྲིལ་དམ་ཟབ་ཇེ་ཆེར་གྱུར་ནས་ཡུག་རེན་ལ་རོགས་རམ་བྱེད་རྒྱུ་ཡིན་ཞེས་བརྗོད་ཡོད་འདུག
བྱང་ཆིངས་སྒྲིག་འཛུགས་ཀྱི་ཚོགས་འདུའི་ཐོག་ཇོ་བྷ་ཌན་གྱིས་ཨ་རིའི་སྲིད་འཛིན་གྱི་རང་དབང་གཟེངས་རྟགས་དེ་བྱང་ཆིངས་སྒྲིག་འཛུགས་ཀྱི་དྲུང་ཆེ་(Jens Stoltenberg)་ལ་སྤྲད་ཡོད་འདུག སྲིད་འཛིན་ཟུར་པ་ཌོ་ནལ་ཊམ་གྱིས་བྱང་ཆིངས་སྒྲིག་འཛུགས་ལ་སྐྱོན་བརྗོད་བྱས་དོན། ཚོགས་མི་རྒྱལ་ཁབ་ཚོས་རང་རང་གི་ལོ་གཅིག་གི་ཡོང་འབབ་ལས་བརྒྱ་༢ རེ་བྱང་ཆིངས་སྒྲིག་འཛུགས་ལ་སྤྲོད་དགོས་ཀྱི་ཡོད་ཀྱང་། རྒྱལ་ཁབ་འགའ་ཤས་ཀྱིས་སྤྲོད་ཀྱི་མེད། གལ་སྲིད་མ་སྤྲད་ན་རྒྱལ་ཁབ་དེ་དག་གི་བདེ་འཇགས་ཐད་བྱང་ཆིངས་སྒྲིག་འཛུགས་ཀྱིས་འགན་ལེན་བྱེད་དགོས་ཀྱི་མ་རེད་ཅེས་བརྗོད་ཡོད་འདུག ཨུ་རུ་སུས་ཡུག་རེན་ལ་བཙན་འཛུལ་འགོ་འཛུགས་དུས་བྱང་ཆིངས་སྒྲིག་འཛུགས་ཀྱི་ཚོགས་མི་རྒྱལ་ཁབ་མང་པོས་སྒོར་ཐེར་འབུམ་མང་པོ་སྤྲོད་འགོ་བཙུགས་ཡོད་འདུག
གསར་འགོད་པ། བསོད་ནམས་ཕུན་ཚོགས།
