བྱང་ཤར་ཁག་གི་བོད་མིའི་གཞིས་ཆགས་ཡར་རྒྱས་ཀྱི་སྲིད་བྱུས་གང་མགྱོགས་གཏན་འབེབས་བྱ་འཆར།

ཟླ་འདིའི་ཚེས་༡༩ ཉིན་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་གྱིས་ཨ་རུ་ནཱ་ཅལ་མངའ་སྡེའི་བསྟི་གནས་ཨི་ཊ་ན་གར་ནང་སྤྱི་ཁྱབ་བློན་ཆེན་སྐུ་ཞབས་པདྨ་མཁའ་འགྲོར་མཇལ་འཕྲད་གནང་སྟེ། ཡུལ་དེར་གནས་སྡོད་བོད་མིའི་དཀའ་ངལ་སྐོར་ལ་གོ་བསྡུར་གནང་ཡོད་པ་རེད།

སྐབས་དེར་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་གྱིས་མངའ་སྡེའི་བློན་ཆེན་ལ་མེའོ་དང་ཀྲུ་ཀྲིང་། ཏི་ཛུ། བསྟན་འཛིན་སྒང་བཅས་སུ་གནས་སྡོད་བྱེད་བཞིན་པའི་བཙན་བྱོལ་བོད་མི་རྣམས་ཀྱི་དཀའ་སེལ་སླད་མངའ་སྡེའི་གཞུང་ནས་མཐུན་འགྱུར་གནང་སྐྱོང་ཡོང་བའི་འབོད་སྐུལ་ཞུ་ཡིག་ཅིག་ཕུལ་བ་དང་སྦྲགས།  ཕྱི་ལོ་༢༠༡༤ བཙན་བྱོལ་བོད་མིའི་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས། ཞེས་པ་རྒྱ་གར་གཞུང་གིས་གཏན་འབེབས་གནང་ཟིན་པའི་སྲིད་བྱུས་དེ་ཨ་རུ་ནཱ་ཅལ་མངའ་སྡེའི་གཞུང་གིས་གང་མགྱོགས་གཏན་འབེབས་གནང་སྐྱོང་ཡོང་བའི་འབོད་སྐུལ་ཡང་ཞུས་འདུག

སྐབས་དེར་སྤྱི་ཁྱབ་བློན་ཆེན་གྱིས་ཀྲུ་ཀྲིང་ཁུལ་དུ་རོགས་སྐྱོབ་དགོས་གལ་ཆེ་བའི་བོད་མི་ཁྱིམ་ཚང་༩༦ གི་གཞིས་ཆགས་བསྐྱར་གསོ་དང་མཐུན་རྐྱེན་སྦྱོར་སྤྲོད་ཐད་བཀའ་ཤག་ལྷན་རྒྱས་སུ་བཀའ་བསྡུར་གནང་སྟེ་ཐག་གཅོད་གནང་རྒྱུ་དང་། དེ་བཞིན་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་གང་མྱུར་ལག་བསྟར་བྱེད་རྒྱུའི་ཁས་ལེན་གནང་ཡོད་པ་རེད།

དེ་རྗེས་ནང་སྲིད་བཀའ་བློན་མཆོག་བྷ་ལུཀ་པོངྒ་ Bhalukpong ཏུ་ཕེབས་ཏེ་འཕགས་བོད་མཛའ་འབྲེལ་ཚོགས་པས་ Bharat Tibbat Sahyog Manch གོ་སྒྲིག་གནང་བའི་རྟ་དབང་གོམ་བགྲོད་ཅེས་པའི་ནང་མཉམ་ཞུགས་གནང་མཁན་ཚོགས་མི་རྣམས་དང་ཐུགས་འཕྲད་གནང་བ་དང་། ཕྱི་ཚེས་༢༡ ཉིན་ནང་སྲིད་བཀའ་འཕགས་བོད་མཛའ་འབྲེལ་ཚོགས་པས་གོ་སྒྲིག་གནང་བའི་རྒྱལ་ཡོངས་ཆིག་སྒྲིལ་གོང་སྤེལ་སླད་རྟ་དབང་ན་གཞོན་གོམ་བགྲོད་ཅེས་པའི་ལྷན་ཚོགས་སུ་མཉམ་ཞུགས་གནང་ཡོད་པ་རེད།།

གསར་འགོད་པ་ཆོས་ཉིད་འོད་ཟེར།