མ་སུ་རི་བོད་ཁྱིམ་སློབ་གྲྭ་དབུ་བརྙེས་ནས་མི་ལོ་༦༠ འཁོར་བ།
༡༠ པའི་ཚེས་༣༠ ཉིན་མ་སུ་རི་བོད་ཕྲུག་ཁྱིམ་སྡེ་སློབ་གྲྭ་དབུ་བརྙེས་ནས་ལོ་ངོ་༦༠ འཁོར་བའི་དགའ་སྟོན་གྱི་མཛད་སྒོ་འཚོགས་ཡོད་པ་རེེད་འདུག
༡༠ པའི་ཚེས་༣༠ ཉིན་མ་སུ་རི་བོད་ཕྲུག་ཁྱིམ་སྡེ་སློབ་གྲྭ་དབུ་བརྙེས་ནས་ལོ་ངོ་༦༠ འཁོར་བའི་དགའ་སྟོན་གྱི་མཛད་སྒོ་འཚོགས་ཡོད་པ་རེེད་འདུག
མཛད་སྒོའི་ཐོག་སྐུ་མགྲོན་མགྲོན་གཙོ་བོ་༸སྐྱབས་མགོན་༸གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་གིས་མ་སུ་རི་བོད་ཁྱིམ་གྱི་དྲུག་ཅུའི་དུས་དེབ་དང་ཕྲེང་རིང་འཇིགས་མེད་སུམ་རྩེན་དབང་པོའི་སྐུ་ཚེའི་ལོ་རྒྱུས་དཔེ་དེབ་དབུ་འབྱེད་གནང་འདུག
བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་ནས་གསུང་བཤད་གནང་དོན། དེ་རིང་མ་སུ་རི་བོད་ཁྱིམ་སློབ་གྲྭ་དབུ་བརྙེས་ནས་ལོ་ངོ་ ༦༠ འཁོར་བཞིན་ཡོད་པ་དང་། སྤྱིར་བཏང་ལོ་དྲུག་ཅུ་ཟེར་དུས་དུས་ཚོད་ཐུང་ཐུང་ཞིག་རྩ་བ་ནས་མ་རེད། མི་གཅིག་གི་མི་ཚེར་བསམ་བློ་བཏང་བ་ཡིན་ན། མི་ཚེ་ཕྱེད་ཀ་ལྷག་ཙམ་རྫོགས་འགྲོ་གི་ཡོད། སློབ་གྲྭ་ཐོག་མར་དབུ་བརྙེས་པ་ནས་ད་བར་གྱི་དུས་ཚོད་དེའི་རིང་དགེ་ལས་སློབ་ཕྲུག་མང་པོ་ཞིག་ལ་གྲུབ་འབྲས་གཡུར་དུ་ཟ་བ་བྱུང་ཡོད། རིགས་གཅིག་ང་ཚོ་དང་མཉམ་དུ་བཞུགས་ཡོད་པ་དང་། ཡང་རིགས་གཅིག་ཕྱི་མའི་ལམ་དུ་འཕོས་ཟིན་པ་རེད། དེ་ཡིན་དུས་ད་རེས་ཁོང་རྣམ་པའི་བཀའ་དྲིན་རྗེས་དྲན་ཞུ་རྒྱུ་དང་། འདས་པའི་ལོ་ངོ་དྲུག་ཅུའི་ཉམས་མྱོང་ལ་གཞིགས་ནས་མ་འོངས་པར་སྔར་ལྷག་ཡར་རྒྱས་གཏོང་ཐུབ་དགོས་པ་དེ་གལ་ཆེན་པོ་ཆགས་ཀྱི་ཡོད་པ་རེད། བོད་ལ་ཆབ་སྲིད་ཀྱི་ཐོག་ནས་དཀའ་ངལ་ཆེན་པོ་ཞིག་འཕྲད་ཡོད་ཅིང་། ཐོག་མར་ང་ཚོ་བཙན་བྱོལ་ལ་ཡོང་བའི་སྐབས་སུ་ངོ་ཤེས་པ་གནམ་དང་ས་མ་གཏོགས་མེད་པའི་གནས་སྟངས་ལྟ་བུ་ཆགས་ཡོད་ཀྱང་། འདས་པའི་དུས་ཚོད་དེའི་རིང་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཐུགས་རྗེའི་བཀའ་དྲིན་དང་། རྒྱ་གར་དབུས་དང་མངའ་སྡེའི་གཞུང་གིས་མཐུན་འགྱུར། མི་ཐོག་རྒན་པ་རྣམ་པས་རྣམ་དཔྱོད་ཆ་ཚང་བ་བཏོན་ནས་ང་རང་ཚོ་བོད་མི་རིགས་ཟེར་བ་དེའི་རིག་གཞུང་དང་། མི་རིགས་ཀྱི་ཁྱད་ཆོས་ཆ་ཚང་ད་ཆ་འཛམ་གླིང་འདིའི་སྟེང་ངོམས་ཐུབ་པའི་གནས་སྟངས་འདྲ་པོ་ཆགས་ཀྱི་ཡོད་དུས། འདས་པའི་དུས་ཚོད་ནང་བོད་ས་ཤོར་བའི་གནས་སྟངས་སྐྱོ་པོ་ཞིག་བྱུང་ཡོད་ཀྱང་། བརྒྱུད་རིམ་དེའི་ནང་བཟང་ཕྱོགས་ཀྱི་གྲུབ་འབྲས་ཤུགས་ཆེན་པོ་ཞིག་ཐོན་ཡོད། དེ་ཚོ་ཚང་མར་ང་ཚོས་དགའ་བ་དང་སྤོབས་པ་སྐྱེས་དགོས་པ་ཞིག་ཆགས་ཀྱི་ཡོད་རེད་བསམ་གྱི་འདུག ཉེ་ཆར་རྡ་ས་བོད་ཁྱིམ་ཁྱབ་ཁོངས་དང་། བྱང་ཨ་རིའི་བོད་རིགས་སྤྱི་མཐུན་ཚོགས་པ་ཁག་གིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་བརྟན་བཞུགས་ཕུལ་ཡོད། དེའི་སྐབས་༧གོང་ས་མཆོག་གིས་བཀའ་སློབ་གནང་དོན་ལ། ངོས་ཀྱིས་བོད་ཀྱི་རིག་གཞུང་ཐོག་བྱས་རྗེས་ཆེན་པོ་བཞག་ཡོདཅེས་བཀའ་ཕེབས་སོང་། ༧གོང་ས་མཆོག་གིས་ང་ཚོར་བཀའ་སློབ་ལམ་སྟོན་གནང་རྒྱུ་དང་། ང་ཚོས་སྙོབ་མི་ཐུབ་སར་༧གོང་ས་མཆོག་གིས་མཛད་པ་འཕྲིན་ལས་ཀྱིས་བསྙབས་ནས་ང་ཚོར་རོགས་མགོན་ཡོང་གི་ཡོད་པ་དེ་དག་ཀྱང་༧གོང་ས་མཆོག་གི་མཛད་འཕྲིན་ཆགས་ཀྱི་ཡོད། ཡིན་ནའང་༧གོང་ས་མཆོག་གི་དགོངས་བཞེད་གང་ཡོད་པ་དེ་དག་ལ། ང་ཚོས་སློབ་སྦྱོང་དང་། ཆབ་སྲིད། རིག་གཞུང་། དཔལ་འབྱོར་གང་གི་ཐོག་ནས་ཡིན་ནའང་དེ་ཚོའི་ཐོག་ལ་ང་ཚོས་ཞབས་འདེགས་ཞུས་ནས་༧གོང་ས་མཆོག་གི་དགོངས་པ་ལྟར་འགྲོ་དགོས་པ་ང་ཚོ་ཚང་མའི་ལས་འགན་ཆགས་ཀྱི་ཡོད། དེ་ཚོའི་གྲས་ཚང་མས་མ་འོངས་པར་མུ་མཐུད་ནས་སེམས་ལ་ཉར་དགོས་པ་གལ་ཆེན་པོ་རེད་ཅེས་ཞུ་རྒྱུ་ཡིན་ཞེས་སོགས་གསུངས་གནང་འདུག
བོད་མིའི་སྒྲིག་འཛུགས་ཀྱི་་སྲིད་སྐྱོང་སྤེན་པ་ཚེ་རིང་གིས་གསུང་བཤད་གནང་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་ཆེན་པོ་མཆོག་བོད་ནས་རྒྱ་གར་ལ་བཙན་བྱོལ་དུ་ཆིབས་སྒྱུར་བསྐྱངས་རྗེས་མ་སུ་རིར་བཞུགས་གནང་
མཛད་པ་དང་། དེ་ནས་མགོན་པོ་གང་ཉིད་མཆོག་རྡ་སར་ཆིབས་བསྒྱུར་བསྐྱངས་ཏེ་བཞུགས་མུས་ཡིན་པ། དེ་སྔ་ཨ་མ་ཕྲེང་རིང་རིན་ཆེན་སྒྲོལ་མ་ལགས་དང་། མ་སུ་རི་བོད་ཕྲུག་ཁྱིམ་སྡེའི་ལས་བྱེད་མི་རབས་རྒན་པ་རྣམས་ཀྱིས་བློས་བཏང་གིས་སྐུ་ལས་བསྐྱོན་པར་བརྟེན་ད་ཆ་མ་སུ་རི་བོད་ཁྱིམ་ཚགས་ཚུད་བྱུང་ཡོད་པ་སོགས་ཀྱི་སྐོར་དང་། བོད་མི་ཚོས་བོད་ཀྱི་རྩ་དོན་བསྒྲུབ་པར་རེ་བ་བརླག་ཏུ་འཇུག་རྒྱུ་མེད་པ་དང་། མི་རབས་གསར་པ་རྣམས་ཀྱིས་མུ་མཐུད་འགན་འཁུར་གནང་དགོས་པ། ཉེ་ཆར་སྤྱི་ནོར་༸གོང་ས་༸སྐྱབས་མགོན་ཆེན་པོ་ཆེན་པོ་མཆོག་ལ་བོད་མིའི་ཚོགས་པ་ཁག་ནས་བརྟན་བཞུགས་བསྟར་འབུས་ཞུས་པའི་སྐབས་མགོན་པོ་གང་ཉིད་མཆོག་གིས་དགུང་ལོ་བཅུ་ཕྲག་གཉིས་ལྷག་རིང་བཞུགས་རྒྱུའི་ཞལ་བཞེས་གནང་ཡོད་པ། གཙོ་བོ་བླ་མ་དང་སློབ་མའི་དབར་དམ་ཚིག་གཙང་མ་དགོས་པ་དང་། སྲིད་སྐྱོང་གི་ངོས་ནས་མུ་མཐུད་ཧུར་ཐག་འབད་ཐག་གིས་ཞབས་འདེགས་ཞུ་རྒྱུ་ཡིན་ཞིང་། བོད་མི་མང་ཚོགས་ནས་ཀྱང་ཧུར་ཐག་གིས་ཕྱག་ལས་གནང་དགོས་པ། ལོ་ལྟར་སློབ་མ་ཚོས་༸སྐྱབས་མགོན་༸གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་གི་མཇལ་ཁ་དང་ལམ་སྟོན་ཞུ་དགོས་པའི་གལ་གནད་སོགས་ཀྱི་སྐོར་གསུང་བཤད་གནང་ཡོད་པ་རེད་འདུག
སྐུ་མགྲོན་གཙོ་བོ་༸སྐྱབས་མགོན་༸གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་གིས་བཀའ་སློབ་བསྩལ་དོན། གཙོ་བོ་ད་ལྟའི་ང་ཚོ་མི་ཐོག་འདི་དུས་ཚོད་གཉན་འཕྲང་ཅན་གྱི་མི་ཐོག་ཡིན་ཞིང་། སྤྱི་ནོར་༸གོང་ས་༸སྐྱབས་མགོན་ཆེན་པོ་ཆེན་པོ་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་བོད་ཀྱི་བསྟན་པ་དང་ཆབ་སྲིད། རིག་གཞུང་སོགས་རྒྱ་གར་ནང་དར་རྒྱས་གོང་འཕེལ་བྱུང་ཡོད་པ། ནང་གི་ཤེས་ཡོན་གྱི་ལོ་འདབ་རྒྱས་དགོས་ན་སློབ་ཕྲུག་རྣམས་ཀྱིས་སློབ་སྦྱོང་ཧུར་ཐག་གནང་དགོས་པ་དང་། བོད་མིའི་གོམས་གཤིས་བཟང་པོ་མི་ཉམས་རྒྱུན་འཛིན་གནང་དགོས་པ། དེང་སང་འཛམ་གླིང་གཅིག་ལ་གཅིག་བརྟེན་ཆགས་ཡོད་སྟབས། གནའ་རབས་དང་དེང་དུས་ཟུང་དུ་འབྲེལ་བའི་འདབ་གཤོག་གཉིས་ལྡན་གྱི་ཤེས་ཡོན་དགོས་པ་དང་། མི་ཚེ་དོན་དང་ལྡན་པ་སྐྱེལ་དགོས་པ། ཆོས་དང་རིག་གཞུང་གི་རྩ་བ་བོད་ཡིག་ཡིན་སྟབས། བོད་སྐད་དང་བོད་ཡིག་སྦྱང་དགོས་པ། ལྷག་བསམ་དང་སྙིང་སྟོབས་དགོས་པ། བོད་མི་ཚོས་རྒྱུན་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་ཆེན་པོ་མཆོག་གི་བཀའ་དྲིན་དྲན་དགོས་པའི་གལ་གནད་དང་། རྒྱ་གར་གཞུང་མང་གཉིས་ནི་བོད་མི་རྣམས་ལ་བཀའ་དྲིན་ཤིན་ཏུ་ཆེན་པོ་ཡིན་པས། གོ་སྐབས་འདི་བརྒྱུད་རྒྱ་གར་གཞུང་མང་གཉིས་དང་། རྣམ་པ་ཚོ་ཚང་མ་ཐུགས་རྗེ་ཞུ་རྒྱུ་ཡིན། བོད་ཀྱི་བསྟན་བདག་བླ་ཆེན་རྣམ་པ་སྐུ་ཚེ་བརྟན་པ་དང་། གཞིས་བྱེས་བོད་མི་རྣམས་མཉམ་འཛོམས་ཡོང་བའི་སྨོན་འདུན་ཞུ་རྒྱུ་ཡིན། ཞེས་སོགས་གསུངས་གནང་འདུག །
གསར་འགོད་པ་སྐལ་བཟང་དོན་གྲུབ།
