མཉམ་འབྲེལ་རྒྱལ་ཁབ་ཀྱི་ཚོགས་མི་རྒྱལ་ཁབ་ཚོས་རྒྱ་ནག་གཞུང་ལ་འགྲོ་བ་མིའི་ཐོབ་ཐང་ལ་བརྩི་སྲུང་ཞུ་བའི་དགོས་འདུན་བཏོན་འདུག

སུད་སིའི་གྲོང་ཁྱེར་ཇི་ནི་ཝའི་ནང་རྟེན་གཞི་བྱས་པའི་མཉམ་འབྲེལ་རྒྱལ་ཁབ་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་༤༨ ཚོགས་བཞིན་པའི་ཐོག  ཚོགས་མི་རྒྱལ་ཁབ་རྣམས་ཀྱིས་རྒྱ་ནག་གཞུང་ལ་བོད་ནང་གི་འགྲོ་བ་མིའི་ཐོབ་ཐང་ལ་བརྩི་སྲུང་བྱེད་པའི་དགོས་འདུན་བཏོན་འདུག

མཉམ་འབྲེལ་རྒྱལ་ཁབ་ཀྱི་ཚོགས་མི་རྒྱལ་ཁབ་ཌེན་མཱརྐ་(Denmark) དང་། ཇར་མ་ནཱི། (Germany) ནི་དར་ལེནྜ། (Netherlands) སྭི་ཌན། (Sweden) སུད་སི། (Switzerland) ཨ་རི་བཅས་ཀྱི་སྐུ་ཚབ་ཚོས་ཚོགས་མི་རྒྱལ་ཁབ་༢༦ ཚབ་བྱས་ཏེ། རྒྱ་ནག་གཞུང་གིས་བོད་དང་། ཤིང་ཅང་། ཧོང་ཀོང་བཅས་ཀྱི་འགྲོ་བ་མིའི་ཐོབ་ཐང་ལ་བརྩི་མེད་རྡོག་རྡོལ་བཏང་དང་གཏོང་བཞིན་པར་སེམས་འཚབ་ཆེན་པོའི་ངང་ནས་སྐྱོན་བརྗོད་ཤུགས་ཆེན་བྱས་ཡོད་འདུག

སྐབས་དེར་ཨ་རིའི་སྐུ་ཚབ་ཀྱིས་རྒྱ་ནག་གཞུང་གིས་འགྲོ་བ་མིའི་ཐོབ་ཐང་ལ་བརྩི་མེད་རྡོལ་རོལ་བཏང་དང་གཏོང་བཞིན་པའི་ཐོག་རིག་གཞུང་རྩ་གཏོར་དང་མི་རིགས་འཐེན་འཁྱེར། དཔལ་འབྱོར་བཤུ་གཞོག་བྱེད་བཞིན་པར་སྐྱོན་འཛུགས་ཤུགས་ཆེན་བྱེད་ཀྱི་ཡོད་པ་མ་ཟད། ལྷག་པར་རྒྱ་ནག་གཞུང་གིས་བོད་ཀྱི་ཆོས་དང་རིག་གཞུང་སྐད་ཡིག་སོགས་ལ་དམ་དྲག་བྱེད་བཞིན་པར་སེམས་འཚབ་ཀྱི་རྣམ་འགྱུར་ཤུགས་ཆེན་བསྟན་འདུག 

ཧྥ་རན་རན་སིའི་སྐུ་ཚབ་ཀྱིས་རྒྱལ་ཁབ་༢༦ ལས་གྲུབ་པའི་ཡོ་རོབ་མཐུན་ཚོགས་ཀྱི་ཚབ་ཞུས་ཏེ་བསྒྲགས་གཏམ་སྒྲོགས་སྦྱང་བྱས་པའི་ནང་། སྐབས་དེར་ཡུ་རོབ་མཐུན་ཚོགས་ཀྱིས་རྒྱ་ནག་གཞུང་ལ་རྒྱལ་སྤྱི་དང་རྒྱ་ནག་རྒྱལ་ནང་གི་ཁྲིམས་གཞིར་བཟུང་བོད་གཙོ་བོར་གྱུར་པའི་གྲང་ཉུང་མི་རིགས་ཤིན་ཅང་དང་ནང་སོག་བཅས་ཀྱི་རང་དབང་ལ་བརྩི་མཐོང་དགོས་སྐོར་ནན་བརྗོད་གནང་ཡོད།

དེ་བཞིན་ཌེན་མཱརྐ་ཡི་སྐུ་ཚབ་ཀྱིས་རྒྱ་ནག་གཞུང་གིས་བོད་ནང་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་གཏོང་བཞིན་པའི་སྙན་ཐོ་ལ་སེམས་འཚབ་ཤུགས་ཆེ་བཏོན་ཡོད་པ་དང་། རྒྱ་ནག་གཞུང་ནས་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་དང་རང་དབང་ཅན་གྱི་རྟོག་ཞིབ་པ་རྣམས་བོད་ནང་ཡོང་ཆོག་པའི་ཆོག་མཆན་སྤྲོད་དགོས་པའི་བསྐྱར་དུ་འབོད་སྐུལ་ཞུས་ཡོད།

གཞན་ཡང་། ཇར་མ་ནཱི་དང་ནི་དར་ལེནྜ། སུད་སི། སྭི་ཌན། ཨིན་ཡུལ། ཕིན་ལེནྜ། ནོར་ཝེ་བཅ་ཀྱི་སྐུ་ཚབ་རྣམས་ཀྱིས་རྒྱ་ནག་གཞུང་གིས་བོད་གཙོས་གྲངས་ཉུང་མི་རིགས་གཞན་ཁག་གཅིག་ལ་འཆར་གཞི་ལྡན་པའི་སྒོ་ནས་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་བཏང་དང་གཏོང་བཞིན་པར་བློ་འཚབ་ཀྱི་རྣམ་པ་བཏོན་ཡོད་པ་བཅས། །

གསར་འགོད་པ་དཀོན་མཆོག་རབ་བརྟན།