མདོ་སྨད་རྔ་པ་ཀིརྟི་དགོན་པའི་གྲྭ་བློ་བཟང་བསྟན་པས་རྒྱ་གཞུང་ལ་ངོ་རྒོལ།

ཕྱི་ལོ་༢༠༡༤ཟླ་༤ ཚེས་༢༦ ཉིན་བོད་མདོ་སྨད་རྔ་པ་ཀིརྟི་དགོན་པའི་གྲྭ་བློ་བཟང་བསྟན་པས་མགོ་ལ་བོད་ཀྱི་རྒྱལ་དར་བྲིས་མ་ཞིག་དཀྲིས་ཤིང་། ལག་ཏུ་༧གོང་ས་མཆོག་གི་སྐུ་པར་ཆེན་པོ་ཞིག་བཟུང་ནས་རྔ་བ་རྫོང་མཁར་གྱི་གཞུང་ལམ་དུ་རྒྱ་གཞུང་ལ་ངོ་རྒོལ་སྐད་འབོད་བྱེད་བཞིན་གོམ་བགྲོད་བྱས་པར་བརྟེན། རྒྱ་གཞུང་གི་ཉེན་རྟོག་པས་འཇུ་བཟུང་བཙན་ཁྲིད་བྱས་ཡོད་འདུག

དྷ་ས་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་དང་ཀ་ཉག་ཚེ་རིང་གཉིས་ཀྱིས་གཉིས་གནས་ཚུལ་མཁོ་སྤྲོད་བྱས་པ་ལྟར་ན། ཀིརྟི་དགོན་པའི་གྲྭ་བློ་བཟང་བསྟན་པས།རྒྱ་གཞུང་གིས་བོད་ཐོག་བཟུང་བའི་གཏིང་གནག་པའི་སྲིད་བྱུས་ལ་ངོ་རྒོལ་བྱས་པ་ཞིག་ཡིན་པ་དང་། ཁོང་གིས་ངོ་རྒོལ་བྱས་ཏེ་སྐར་མ་ཁ་ཤས་ལས་མ་འགོར་བར་སྔ་ས་ནས་གྲ་སྒྲིག་བྱས་ནས་ཡོད་པའི་རྒྱ་གཞུང་གི་ཉེན་རྟོག་དམག་མིས་ཁོང་བཙན་ཁྲིད་བྱས་ཡོད་འདུག

སྐད་འབོད་ཀྱི་ནང་དོན་སོགས་ད་བར་ཤེས་རྟོགས་ཐུབ་མེད་པ་དང་། ཁོང་ནི་བོད་མདོ་སྨད་རྔ་པ་རང་སྐྱོང་ཁུལ། རྔ་པ་རྫོང་རྨེའུ་རུ་མའི་རུ་ཆེན་གཉིས་པ་ནས་ཡིན་ཞིང་། ཕ་ངག་ཆུང་དང་མ་སྒྲོལ་མ་ཆོས་ཁོ་གཉིས་ཀྱི་བུ་ཆུང་བ་ཡིན་འདུག བློ་བཟང་བསྟན་པ་ད་ལྟ་རང་ལོ་༡༩ ཡིན་པ་དང་། ཆུང་ཆུང་སྐབས་ནས་རྔ་པ་ཀིརྟི་དགོན་པར་གྲྭ་པ་བྱས་ནས་དེང་སྐབས་རྔ་པ་ཀིརྟི་དགོན་པའི་ནང་བསྟན་སྔོན་འགྲོའི་སློབ་གྲྭའི་འཛིན་གྲྭ་དགུ་པ་ཡིན་འདུགཁོང་ལ་མ་གཅིག་གི་སྤུན་རྒན་པ་གྲྭ་པ་གཉིས་ཡོད་པའི་གཅིག་དེང་སྐབས་རྒྱ་གར་ལྷོ་ཕྱོགས་འབྲས་སྤུངས་སུ་སློབ་གཉེར་བྱེད་བཞིན་ཡོད་པ་དང་། གཅིག་རྔ་པ་ཀིརྟི་དགོན་པའི་ནང་དུ་ཡོད་འདུག

དེང་སྐབས་ཀྱི་རྔ་པ་ནི་སྔར་བཞིན་རྒྱ་ནག་གི་དྲག་ཆས་ཉེན་རྟོག་པ་དང་དམིགས་བསལ་ཉེན་རྟོག་པ་བརྒྱ་ཕྲག་མང་པོས་གོམ་པ་གང་གི་རྒྱབ་ལོགས་ན་དྲག་གནོན་བྱེད་ཆོག་ཆོག་གི་གྲ་སྒྲིག་བྱས་ནས་ཡོད་པའི་དམ་དྲག་གི་འོག་ལ་ཡོད་ཅིང་།ནམ་རྒྱུན་ཞི་བའི་མི་མང་ལ་མེ་མདའ་ཁ་གཏད་ནས་ཡོད་པའི་ཉེན་རྟོག་དམག་དཔུང་གི་སྐོར་སྲུང་དང་།བརྙན་ལེན་འཕྲུལ་ཆས་ཧ་ཅང་མང་པོས་ག་ས་གང་དུ་ཁེབ་པར་བྱས་པའི་གནས་སྟངས་ཧ་ཅང་སྡུག་པོ་ཞིག་གི་འོག་ལ་ཡོད་པར་གནས་ཚུལ་མཁོ་སྤྲོད་པས་འགྲེལ་བརྗོད་བྱས་འདུག །