མཱ་ཁའོ་མི་མང་གིས་དྲང་བདེན་མིན་པའི་འོས་བསྡུར་ངོ་རྒོལ་བྱས་འདུག 

ཧོང་ཀོང་ནང་དུ་མང་གཙོར་རྒྱབ་སྐྱོར་བྱེད་མཁན་རྣམས་གྲོས་ཚོགས་ཀྱི་འོས་བསྡུར་འོས་འགྲན་བྱེད་ཐུབ་ཐབས་མེད་པ་བཟོས་ཏེ་བཀག་འགོག་བྱེད་བཞིན་ཡོད་པ་ལྟར། མཱ་ཁའོ་ནང་དུ་ཡང་དེ་ལྟར་བྱས་འདུག་པས་མི་མང་གི་རྣམ་པ་འདྲ་མིན་ཐོག་ནས་འོས་བསྡུར་ངོ་རྒོལ་བྱས་འདུག 

ཟླ་༩ པའི་ཚེས་༡༥ ཉིན་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ། ཟླ་༩ པའི་ཚེས་༡༢ ཉིན་རྒྱ་ནག་གི་དམིགས་བསལ་འཛིན་སྐྱོང་གི་མངའ་ཁུལ་མཱ་ཁའོ་(Macau) ནང་དུ་གྲོས་ཚོགས་ཀྱི་འོས་བསྡུ་གོ་སྒྲིག་བྱས་ཡོད་འདུག་པ་དང་། ཐེངས་འདིའི་གྲོས་ཚོགས་འོས་བསྡུར་འོས་བསྡུ་ལས་ཁང་གིས་མང་གཙོར་རྒྱབ་སྐྱོར་བྱེད་མཁན་དང་གུ་ཡངས་ཀྱི་ལྟ་བ་འཛིན་མཁན་འོས་མི་༢༡ ཞིག མཱ་ཁའོ་དམིགས་བསལ་འཛིན་སྐྱོང་མངའ་ཁུལ་གྱི་ཁྲིམས་ལ་སྲུང་བརྩི་བྱས་མེད་པའི་དཔང་རྟགས་རྙེད་སོན་བྱུང་བས། འོས་འགྲན་བྱེད་མི་ཆོག་པའི་བཀའ་བཏང་ཡོད་འདུག

འོས་བསྡུའི་ཉིན་མོར་དེབ་སྐྱེལ་བྱེད་མཁན་འོས་འཕེན་པ་བརྒྱ་ཆ་༤༢ མ་གཏོགས་མཉམ་ཞུགས་བྱས་མེད་ཁར། འོས་ཤོག་འཕངས་པའི་ཁྲོད་ནས་འོས་ཤོག་སྟོང་པ་དང་འོས་ཤོག་སྟེང་དུ་ངོ་རྒོལ་གྱི་བསྒྲགས་ཚིག་འབྲི་མཁན་མང་པོ་ཞིག་བྱུང་ཡོད་པ་རེད། དེ་ཡང་འོས་ཤོག་འཕེན་མཁན་མི་གྲངས་༡༣༧༠༠༠ ལྷག་བྱུང་བའི་ཁོངས་ནས་འོས་ཤོག་སྟོང་པ་༣༡༤༡ བྱུང་ཡོད་འདུག་པས། སྐབས་སྔོན་མའི་འོས་བསྡུ་དང་བསྡུར་ན་གྲངས་ཀ་༢༢༡༩ འཕར་ཡོད་འདུག དེ་བཞིན་འོས་ཤོག་རྩིས་མེད་སོང་བ་ཡང་ལྡབ་གཉིས་འཕར་ཡོད་པ་རེད་འདུག 

འོས་ཤོག་ཐོག་ཏུ་ངོ་རྒོལ་བསྒྲགས་ཚིག་བྲིས་ནས་འོས་ཤོག་ཆེད་དུ་མངགས་ནས་རྩིས་མེད་བཏང་བའི་ཁོངས་ནས། འོས་འཕེན་པ་ཚོས་ང་ལ་ཡོངས་ཁྱབ་འོས་བསྡུའི་ཐོབ་ཐང་ཚད་ལྡན་དགོས་ཞེས་དང་། ངོ་རྒོལ། ངོ་རྒོལ། དེ་བཞིན་རེ་བ་མི་མང་ནས་ཐོན། འགྱུར་བ་འགོག་རྒོལ་ནས་ཐོན་ཞེས་པ། ལྐོག་ཟ་རུལ་སུངས་སོགས་བྲིས་ཡོད་པ་རེད་འདུག 

མཱ་ཁའོ་ཡི་གྲོས་ཚོགས་ནང་དུ་མི་མང་གིས་ཐད་ཀར་འོས་འདེམས་བྱེད་པའི་རྐུབ་སྟེགས་གྲངས་༡༤ དང་ཐད་ཀར་མ་ཡིན་པའི་རྐུབ་སྟེགས་གྲངས་༡༢ ཞིག་ཆེད་ལས་པ་ཁོངས་ནས་བདེམས་ཐོན་བྱུང་གི་ཡོད་འདུག དེ་བཞིན་རྐུབ་སྟེགས་༧ ལ་འཐུས་མི་མཱ་ཁའོ་ཡི་སྤྱི་ཁྱབ་དཔོན་གྱིས་ཐད་བསྐོ་བྱེད་ཀྱི་ཡོད་པ་རེད།

ཐེངས་འདིའི་འོས་བསྡུར་མི་མང་གི་མཉམ་ཞུགས་ཀྱི་བརྒྱ་ཆ་དེ་སྐབས་སྔོན་མ་དང་བསྡུར་ནས་བརྒྱ་ཆ་༡༥ མར་ཆགས་ཡོད་པ་དང་འབྲེལ་ནས། འོས་བསྡུ་ལས་ཁང་གིས་དེའི་རྒྱུ་མཚན་ནི་ཏོག་དབྱིབས་ནད་དུག་གི་གནས་སྟངས་དང་གནམ་གཤིས་ཚ་བོ་ཡོད་རྐྱེན་ཡིན་ཚུལ་བརྗོད་འདུག འོན་ཀྱང་འདས་པའི་བདུན་ཕྲག་དྲུག་ནང་མངའ་ཁུལ་དེར་ཏོག་དབྱིབས་ནད་པ་གཅིག་ཀྱང་ཐོན་མེད་ཁར། འོས་བསྡུའི་ཉིན་མོར་ཚ་དྲོད་ནི་སཱེལ་ཤི་སེ་༣༤ ཡིན་འདུག 

འོས་བསྡུར་འོས་འགྲན་བྱས་མ་བཅུག་པའི་འོས་མི་ཁག་ཅིག་གིས་བརྗོད་དོན་ལ། འོས་བསྡུ་ལས་ཁང་གིས་ཁོ་ཚོ་བཀག་སྡོམ་བྱས་པའི་རྒྱུ་མཚན་དུ་ཁོ་ཚོས་སྤྱི་ཚོགས་དྲ་ལམ་ཐོག་ཏུ་ཧོང་ཀོང་གི་མང་གཙོ་ལས་འགུལ་བ་ཚོ་དང་པར་བརྒྱབ་པ། དེ་བཞིན་གནམ་སྡེ་སྒོ་མོའི་དུས་དྲན་ལ་མཉམ་ཞུགས། ཐའེ་ཝན་ལ་འགྲུལ་སྐྱོད་བྱས་པ་སོགས་དྲངས་ཀྱི་ཡོད་སྐོར་བརྗོད་འདུག 

ཧོང་ཀོང་ནང་དུ་ཡང་མང་གཙོའི་ལས་འགུལ་བ་མང་པོ་ཞིག་བཙོན་འཇུག་བྱས་ཡོད་པ་དང་། ཁག་ཅིག་བྲོས་བྱོལ་ཕྱིན་ཡོད་པ་རེད་ལ། མང་པོ་ཞིག་གྲོས་ཚོགས་འོས་བསྡུར་འོས་འགྲན་བྱེད་རྒྱུར་བཀག་སྡོམ་བྱས་ཟིན་པ་རེད།།

གསར་འགོད་པ་སྐལ་བཟང་དོན་གྲུབ།