མི་༡༣༢ ཡོད་པའི་རྒྱ་ནག་གི་གནམ་གྲུ་ཞིག་བརྡབ་སྐྱོན་བྱུང་འདུག 

ཟླ་༣ པའི་ཚེས་༢༡ ཉིན་རྒྱ་ནག་གི་གྲོང་ཁྱེར་ཀུན་མིང་ནས་གྷོན་ཛའོ་བར་འཕུར་མཁན་རྒྱ་ནག་ཤར་ཕྱོགས་གནམ་གྲུ་ཚོང་ལས་ཁང་གི་འགྲུལ་སྐྱེལ་གནམ་གྲུ་ཞིག་བརྡབ་སྐྱོན་བྱུང་ནས་མེ་འབར་ཡོད་པ་རེད།

བརྡབ་སྐྱོན་བྱུང་ཡུལ་གྱི་ས་གནས་དེར་འགྲུལ་བཞུད་བྱེད་རྒྱུ་གུ་དོག་པོ་ཡོད་འདུག་པ་དང་། ད་ལྟའི་ཆར་ཉེན་སྐྱོབ་རུ་ཁག་ནས་གནམ་གྲུ་དེའི་ནང་གི་མི་གསོན་པོ་གཅིག་ཀྱང་རྙེད་མེད་པས། འབྲེལ་ཡོད་ནང་མི་ཚོས་འགྲུལ་པ་༡༢༣ དང་གནམ་གྲུའི་ལས་བྱེད་༩ བཅས་ཁྱོན་བསྡོམས་མི་གྲངས་༡༣༢ ཚང་མའི་ཚེ་སྲོག་ཤོར་ཡོད་པའི་སེམས་འཚབ་བྱེད་བཞིན་འདུག 

གནམ་གྲུའི་ཚོང་ལས་ཁང་དེས་ནང་མི་ཚང་མར་གདུང་སེམས་མཉམ་བསྐྱེད་ཡོད་པའི་བསྒྲགས་གཏམ་སྤེལ་འདུག་པ་དང་། བརྡབ་སྐྱོན་བྱུང་རྐྱེན་རྩད་གཅོད་བྱེད་བཞིན་སྐོར་བརྗོད་འདུག 

སྤྱིར་བཏང་རྒྱལ་སྤྱིའི་ནང་རྒྱ་ནག་གི་གནམ་ཐོག་འགྲུལ་བཞུད་ལས་དོན་དེར་གདེང་འཇོག་ཡག་པོ་ཡོད་པ་དང་། ཕྱི་ལོ་༢༠༡༠ ལོར་གནམ་གྲུ་ཞིག་བརྡབ་སྐྱོན་བྱུང་ནས་མི་གྲངས་༤༢ ཀྱི་ཚེ་སྲོག་ཤོར་བའི་གནད་དོན་རྗེས་ད་བར་བརྡབ་སྐྱོན་གྱི་གནད་དོན་ཆེན་པོ་ལྷག་མྱོང་མེད་པ་རེད། 

གནམ་གྲུ་བརྡབ་སྐྱོན་གྱི་འབྱུང་རྐྱེན་རྩད་གཅོད་སྐབས་སུ་འབྲེལ་ཡོད་རྟོག་ཞིབ་པ་ཚོས། འཕྲུལ་ཆས་འཕྲོ་བརླག་སོང་བ། འཇིགས་སྐུལ་རིང་ལུགས་པའི་བྱ་སྤྱོད། བར་སྣང་དུ་གདོང་ཐུག་སོགས་ཀྱི་གནད་དོན་ལ་རྟོག་ཞིབ་བྱེད་རྒྱུ་ཡིན་འདུག་པ་དང་། གནམ་གྲུའི་ཚོང་ལས་ཁང་དེས་བརྡབ་སྐྱོན་བྱུང་བའི་གནམ་གྲུ་དེའི་ཁྱད་ཆོས་མཚུངས་པའི་གནམ་གྲུ་གཞན་ཚང་མར་ད་ལྟའི་ཆར་གནམ་ཐོག་འགྲུལ་བཞུད་བྱེད་རྒྱུ་མེད་པ་བཟོས་འདུག །

གསར་འགོད་པ་སྐལ་བཟང་དོན་གྲུབ།