མི་མང་གི་ལས་འགུལ་ལ་བརྟེན་ནས་ཨི་རག་གི་སྲིད་བློན་རྩ་དགོངས་ཞུས་འདུག

དམག་འཁྲུག་དང་འཇིགས་སྐུལ་རིང་ལུགས། སྟོབས་ཆེན་རྒྱལ་ཁབ་ཁག་གི་ཐེ་བྱུས་སོགས་ཀྱི་རྐྱེན་པས་བརྟན་ལྷིང་མེད་པའི་དཀྱིལ་ཤར་ཡུལ་གྲུ་ཨི་རག་ནང་དུ། གཞོན་སྐྱེས་གཙོས་པའི་མི་མང་ཚོས་གཞུང་དང་ཆབ་སྲིད་ལམ་ལུགས། ལྐོག་ཟ་རུལ་སུངས་སོགས་ལ་ངོ་རྒོལ་ཟླ་བ་༢ ལྷག་བྱས་ནས་ཚེ་སྲོག་མང་པོ་ཤོར་བའི་རྗེས། རྒྱལ་ཁབ་དེའི་སྲིད་བློན་རྩ་དགོངས་ཞུས་འདུག་ནའང་། མི་མང་གི་མངོན་འདོད་ད་དུང་ཡང་སྒྲུབ་རྒྱུ་ཡིན་འདུག 

ཟླ་༡༢ པའི་ཚེས་༢ ཉིན་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ། ཟླ་༡༢ པའི་ཚེས་༡ ཉིན་ཨི་རག་གྲོས་ཚོགས་ཀྱིས་རྒྱལ་ཁབ་དེའི་སྲིད་བློན་ཨ་ཌེལ་ཨབ་ཌུལ་མཱཧ་ཌི་ཡིས་རྩ་དགོངས་ཞུས་པར་ངོས་ལེན་རྒྱབ་སྐྱོར་བྱས་འདུག 

དེ་ཡང་ཟླ་༡༠ པའི་མགོ་སྟོད་ནས་བཟུང་། ཨི་རག་ནང་སྤྱི་ཚོགས་འབྲེལ་མཐུད་དྲ་ལམ་བརྒྱུད་ནས། རྒྱལ་ཁབ་དེའི་ནང་ལས་ཀའི་གོ་སྐབས་མེད་པ་དང་། སྤྱི་དམངས་ཞབས་ཞུའི་མཐུན་རྐྱེན་ཞན་པོ་ཡོད་པ། དེ་བཞིན་གཞུང་ནང་ལྐོག་ཟ་རུལ་སུངས་ཁྱབ་ཆེན་ཡོད་པ་སོགས་ལ་ངོ་རྒོལ་ཆེད། ངོ་རྒོལ་གྱི་འཆར་གཞི་འཐེན་ཏེ། ཟླ་༡༠ པའི་ཚེས་༡ དང་༢ ལ་ཨི་རག་གི་གྲོང་ཁྱེར་ཆེ་ཁག་མང་པོ་ཞིག་ནང་མི་མང་གིས་ངོ་རྒོལ་ལས་འགུལ་ཆེན་པོ་སྤེལ་ཡོད་འདུག ངོ་རྒོལ་ནང་དུ་འགོ་ཁྲིད་དམིགས་བསལ་མེད་ཁར། ཆོས་ལུགས་དང་སྲིད་དོན་གྱི་ཚོགས་པ་བྱེ་བྲག་གི་རྒྱབ་སྐྱོར་དང་འབྲེལ་བ་ཡང་མེད་པས། གཞོན་སྐྱེས་གཙོས་པའི་མི་མང་གི་ངོ་རྒོལ་ད་བར་ཁྱབ་ཆེ་ཤོས་དེ་ཆགས་འདུག ཐོག་མར་ལས་འགུལ་ཉིན་༦ རིང་སྤེལ་ནས་ལས་འགུལ་བ་༡༤༩ ཡི་ཚེ་སྲོག་ཤོར་ཡོད་པ་དང་། སྐབས་དེར་སྲིད་བློན་གྱིས་བློན་ཆེན་ལས་ཁུངས་ནང་བློན་ཆེན་རྣམས་འཕོ་འགྱུར་གཏོང་རྒྱུ་དང་། མཐོ་རིམ་ལས་བྱེད་ཚོས་གླ་ཆ་གཅོག་རྒྱུ། གཞོན་སྐྱེས་ལས་མེད་ཀྱི་དཀའ་ངལ་སེལ་རྒྱུ་སོགས་ཁས་ལེན་བྱས་ཡོད་ཀྱང་། ཟླ་༡༠ པའི་ཟླ་མཇུག་ཏུ་ངོ་རྒོལ་བ་ཚོས་ཁོ་ཚོའི་དགོས་འདུན་སྒྲུབ་མེད་སྐོར་བརྗོད་ནས་ལས་འགུལ་བསྐྱར་གསོ་བྱས་ནས་ད་བར་འགྲོ་བཞིན་པ་རེད་འདུག ད་བར་ཁྱོན་བསྡོམས་མི་གྲངས་ཉུང་མཐར་༤༣༠ ལྷག་གི་ཚེ་སྲོག་ཤོར་འདུག་པ་དང་། བདེ་སྲུང་མི་སྣ་༡༢ ཙམ་གྱི་ཚེ་སྲོག་ཤོར་འདུག དེ་བཞིན་མི་གྲངས་༡༩༠༠༠ ལ་རྨས་སྐྱོན་ཕོག་ཡོད་འདུག 

ད་ལྟའི་ཆར་ལས་འགུལ་བ་ཚོས་སྲིད་བློན་གྱི་རྩ་དགོངས་ཙམ་མ་ཡིན་པར། གྲོས་ཚོགས་རྩ་གྲོལ་བཏང་ནས་འོས་བསྡུ་སྔ་སྣུར་དང་། ད་ལྟའི་དབང་འཛིན་པ་ཆབ་སྲིད་མི་སྣ་དང་དམག་གི་མི་སྣ་ཚང་མར་དབང་ཆ་མེད་པ་བཟོ་རྒྱུའི་དམིགས་ཡུལ་འཛིན་བཞིན་འདུག་པ་དང་། སྲིད་བློན་གྱི་རྩ་དགོངས་དེ་ཡང་རྒྱལ་ཁབ་དེའི་ཁ་ཆེ་ཤིཡ་སྡེ་ཚན་གྱི་ཆོས་དཔོན་མཐོ་ཤོས་ཀྱིས། ཉིན་མ་གཅིག་ལ་བདེ་སྲུང་མི་སྣས་ལས་འགུལ་བ་༥༠ ལྷག་བསད་པའི་རྗེས་སུ་གཞུང་ལ་སྐྱོན་བརྗོད་དང་སྦྲགས། གཞུང་གསར་པ་ཡོང་དགོས་པའི་དགོས་འདུན་བཏོན་པའི་རྗེས་སུ། སྲིད་བློན་གྱིས་རྩ་དགོངས་ཞུས་པ་ཡིན་འདུག 

སྲིད་བློན་རྩ་དགོངས་ཞུས་ཟིན་ཡང་། གྲོས་ཚོགས་ནང་མང་མོས་ཀྱི་རྐུབ་སྟེགས་ཡོད་མཁན་སྲིད་དོན་ཚོགས་པ་གཅིག་ཀྱང་མེད་པས། སྲིད་བློན་གསར་པ་བསྐོ་གཞག་བྱེད་པའི་དབང་ཚད་ཡོད་མཁན་སྲིད་དོན་ཚོགས་པ་གཅིག་ཀྱང་མེད་འདུག སྲིད་དོན་ཚོགས་པ་རྣམས་ཀྱི་དབར་དུ་ཟླ་སྒྲིལ་གྱི་གྲོས་མོལ་འགྲོ་རྒྱུ་ཡིན་པ་དང་། མང་མོས་ཀྱི་རྐུབ་སྟེགས་གྲངས་ལོན་པའི་ཟླ་སྒྲིལ་ཕྱོགས་ཁག་གཅིག་བྱུང་རྗེས། སྲིད་བློན་གསར་པ་ཞིག་བསྐོ་གཞག་དང་གཞུང་གསར་པ་ཞིག་ཡོང་རྒྱུ་ཡིན་འདུག་ཀྱང་། མི་མང་གིས་གཞུང་གསར་པ་དེར་ངོས་ལེན་བྱེད་རྒྱུ་ཁག་པོ་ཡིན་འདུག་པས། ངོ་རྒོལ་ལས་འགུལ་དེ་མུ་མཐུད་འགྲོ་སྲིད་པ་རེད་འདུག 

དེ་སྔོན་ཨི་རག་གི་གཙུག་ལག་སློབ་གཉེར་ཁང་གི་སློབ་དཔོན་ཞིག་གིས། ཐེངས་འདིའི་ངོ་རྒོལ་ལས་འགུལ་ནི་ཁོང་གིས་ད་བར་མཐོང་བའི་མི་མང་ལས་འགུལ་ཆེ་ཤོས་དང་ཚབས་ཆེ་ཤོས་ཤིག་ཀྱང་ཡིན་པ། དེ་ཡང་ལས་འགུལ་དེའི་ནང་འབོད་སྒྲའམ་དགོས་འདུན་འདྲ་མིན་འདོན་མཁན་ཡོད་པ་དང་། སྤྱི་མོས་ཀྱི་འགོ་ཁྲིད་གཅིག་མེད་ཁར། དེ་དག་ནི་ཆོས་ལུགས་སམ་སྲིད་དོན་ཚོགས་པ་བྱེ་བྲག་གཅིག་གི་རྗེས་འཇུག་པ་མིན་པས། ངོ་རྒོལ་བ་རྣམས་སྟངས་འཛིན་བྱེད་རྒྱུ་དང་། དེ་དག་དང་གྲོས་མོལ་བྱེད་རྒྱུ་ཁག་པོ་ཡིན་སྐོར་བརྗོད་འདུག 

དེ་བཞིན་ཏུར་ཀི་ནང་ཡོད་པའི་དཔྱད་བརྗོད་པ་ཞིག་གིས། ཨི་རག་ནི་དམག་འཁྲུག་གི་གནོད་སྐྱོན་ཕོག་པའི་རྒྱལ་ཁབ་གཅིག་ཡིན་ཁར། མངའ་ཁུལ་དུ་ཨ་རི་དང་ཨི་རན། ཏུར་ཀི་སོགས་དབར་ཤུགས་རྐྱེན་རྒྱ་བསྐྱེད་དང་ཁེ་ཕན་སོགས་ཀྱི་ཐད་ལ་འགལ་ཟླ་ཆེན་པོ་ཡོད་པས། གནས་སྟངས་ཤིན་ཏུ་ཛ་དྲག་ཡིན་པ་དང་། དེ་བཞིན་དུས་ཐུང་ནང་ཨི་རག་གཞུང་དེས་དཔལ་འབྱོར་གནས་སྟངས་འགྱུར་བ་གཏོང་ཐུབ་ཐབས་མེད་ཀྱང་། དེ་ལ་བརྟེན་ནས་གཞུང་འཕོ་འགྱུར་བཏང་ཡང་དཔལ་འབྱོར་གྱི་གནད་དོན། ལྐོག་ཟ་རུལ་སུངས། འཇིགས་སྐུལ་རིང་ལུགས། བདེ་སྲུང་གི་ཉེན་ཁ་སོགས་དང་འཐབ་རྒོལ་བྱེད་པར་ཕན་ཐོགས་ཡོང་རྒྱུ་མིན་སྐོར་བརྗོད་འདུག །

གསར་འགོད་པ་སྐལ་བཟང་དོན་གྲུབ།