མི་མང་ལ་ཡོད་པའི་དབང་ཆ།

བོད་ཀྱི་བང་ཆེན་སྤྱིའི་འདོན་ཐེངས་ ༧༥༣   ཕྱི་ལོ་ ༢༠༡༩/༥ /༢༩

རྒྱ་གར་རྒྱལ་ཁབ་ཆེན་པོའམ། རྒྱ་གར་འཕགས་པའི་ཡུལ་ནི་འཛམ་གླིང་ཤར་ནུབ་ཡུལ་གྲུ་ཀུན་ནས་རང་དབང་དང་མང་གཙོའི་རྒྱལ་ཁབ་ཆེས་ཆེ་ཤོས་དེ་ཡིན་པ་དང་། གཞུང་གི་མཛད་གཙོ་རྣམ་པ་མི་མང་གིས་འོས་འདེམས་ཀྱི་ལམ་ནས་བསྐོ་གཞག་དགོས་ཤིང་། ཁོང་རྣམ་པའི་ངོས་ནས་ཀྱང་རྒྱལ་ཁབ་ཀྱི་གནས་སྟངས་སྤྱི་དང་བྱེ་བྲག་མི་མང་གི་བདེ་སྡུག་ལ་གཟིགས་རྟོག་དགོས་པ་དེ་ཡང་ཁྲིམས་ཀྱིས་བསྐུར་བའི་ལས་འགན་ཉག་གཅིག་ཏུ་གྱུར་ཡོད་པས། གལ་སྲིད་རྒྱལ་ཁབ་ཀྱི་ལས་དོན་ལ་འཐུས་ཤོར་བཏང་བ་དང་། མི་མང་གི་བདེ་སྡུག་ལ་ཐུགས་ཁུར་མ་བཞེས་ན། སླར་ཡང་ཆབ་སྲིད་ཀྱི་ཞབས་སྟེགས་ཕུལ་དང་མི་འབུལ་ནི་རང་དབང་མང་གཙོ་ཡུལ་གྲུ་ཞིག་ལ་མཚོན་ན་མི་མང་གི་རང་དབང་དང་ནུས་པ་ཆེ་ཤོས་དེ་ཡིན་པས། ད་ལན་བསྐྱར་དུ་རྒྱ་གར་མི་མང་(BJP)ཚོགས་པར་རྒྱ་གར་རྒྱལ་ཡོངས་འོས་བསྡུ་ཆེན་མོའི་ནང་རྒྱལ་ཁ་ཆེན་པོ་ཐོབ་པ་ནི། སྲིད་བློན་མོ་ཏི་གཞུང་འཛིན་གྱི་སྐབས་སུ་རྒྱ་གར་མི་མང་གི་མངོན་འདོད་འགྲུབ་པའི་བདེན་དཔང་གསལ་སྟོན་བྱུང་བར་ངོས་འཛིན་མི་བྱེད་ཐབས་མེད་དུ་གྱུར་ཡོད།

མང་གཙོའི་སྤྱི་ཚོགས་ནང་སྲིད་དབང་འཛིན་མཁན་དག་གི་ངོས་ནས་དོན་དངོས་སུ་མི་མང་གི་མངོན་འདོད་བསྒྲུབ་དགོས་པ་དང་། མི་མང་གཙོ་བོར་བཟུང་ནས་ལས་ཀ་བྱེད་དགོས་པ་དེ་རང་བཞིན་གྱི་འགན་འཁྲི་ཉག་གཅིག་ཏུ་གྱུར་ཡོད། སྲིད་དབང་འཛིན་པའི་སྐབས་སུ་རང་ཉིད་ཀྱི་སྲིད་དོན་ཚོགས་པ་དང་། མི་སྒེར་གྱི་དོན་དག་སྒྲུབ་མཁན་མང་པོ་ཡོད་ནའང་། དེ་དག་གིས་མི་མང་གི་ལས་དོན་གཙོ་བོ་བྱེད་བཞིན་ཡོད་ཚུལ་འགྲེལ་བརྗོད་བྱེད་དགོས་ཐུག་གི་ཡོད། མི་མང་གི་འདོད་པ་དང་མཐུན་པ་ཞིག་བྱུང་མེད་ན་བསྐྱར་དུ་འོས་བསྡུའི་རྒྱལ་ཁ་ཐོབ་ཐབས་མེད་པས་ཁ་ཞེ་གཉིས་ནས་མི་མང་གཙོ་བོར་མི་འཛིན་ཀ་མེད་ཀྱི་གནས་སྟངས་ཤིག་ཡོད་པ་དང་། དེ་ལ་བརྟེན་ནས་མི་མང་ལ་གོ་སྐབས་དང་ཆ་རྐྱེན་ཆེན་པོ་ཡོད་པ་དེ་མང་གཙོའི་སྤྱི་ཚོགས་ཀྱི་ཐོབ་ཐང་དམིགས་བསལ་བ་ཞིག་ཏུ་གྱུར་ཡོད། དཔེར་ན་ད་ལྟ་རྒྱ་གར་གྱི་སྲིད་བློན་མི་མང་གིས་དགའ་མོས་ཆེན་པོ་བྱེད་ཡུལ་མོ་ཏིས་ལ་མཚོན་ན་ཐོག་མ་ཇ་འཚོང་མཁན་ཞིག་ནས་འཛམ་གླིང་ཤར་ནུབ་གཉིས་ནས་མང་གཙོའི་ཡུལ་གྲུ་ཆེ་ཤོས་ཀྱི་སྲིད་བློན་དུ་གྱུར་པ་འདིའི་ཐོག་ནས་ར་སྤྲོད་བྱས་ཡོད།

བཙན་བྱོལ་བོད་པའི་སྤྱི་ཚོགས་ཆུང་ངུ་འདི་ལ་མཚོན་ནའང་མང་གཙོའི་ཐོབ་ཐང་ལོངས་སུ་སྤྱོད་བཞིན་ཡོད་པ་དང་། དེའི་རིན་ཐང་གཙོ་བོ་མངོན་ཐུབ་པའི་དཔེ་མཚོན་གཅིག་ནི། སྐུ་གཤེགས་བཀའ་ཟུར་དབང་འདུས་རྡོ་རྗེའི་སྐུ་ཚེའི་ལོ་རྒྱུས་ཀྱི་དེབ་མིང་དུ། <<སྒེར་ཟུར་ཁང་གི་གཡོག་ནས་བཀའ་བློན་ཁྲི་པའི་བར་གྱི་ལོ་རྒྱུས་>>ཞེས་ཚིག་ཐུང་ཐུང་འདིའི་ནང་དུ་གནད་དོན་ཆེན་པོ་ཞིག་བསྟན་ཡོད་པ་དང་། ད་ལྟའི་སྲིད་སྐྱོང་བློ་བཟང་སེང་གེ་ལ་མཚོན་ནའང་མི་ཚང་དཀྱུས་མ་ཞིག་གི་ཁྱིམ་དུ་སྐྱེས་ཀྱང་། བཙན་བྱོལ་བོད་གཞུང་གི་ཆབ་སྲིད་ཀྱི་དབུ་ཁྲིད་དུ་གྱུར་པ་འདིའི་ཐོག་ནས། ༧གོང་ས་༧སྐྱབས་མགོན་ཆེན་པོ་མཆོག་གིས་བཙན་བྱོལ་བོད་མི་ལ་རང་དབང་མང་གཙོ་གསོལ་རས་སུ་བསྩལ་བའི་ཁེ་ཕན་གསལ་སྟོན་བྱས་ཡོད་པ་མ་ཟད། མི་རེ་ཟུང་གིས་མཛུབ་མོས་གར་བསྟན་ཤར་བྱས་དང་བྱེད་བཞིན་པའི་རྒྱ་དམར་དྲག་པོའི་གཞུང་གི་དཔོན་རིགས་རྣམས་སླེབས་སྟངས་ཀྱི་རྒྱབ་ལྗོངས་དང་བསྡུར་ནས་བལྟས་ན། སྟོབས་འབྱོར་དང་དབང་ཤུགས་ཆེ་ཆུང་ལ་མ་ལྟོས་པར་བཙན་བྱོལ་བོད་པའི་སྤྱི་ཚོགས་ཀྱི་ངོས་ནས་སྤོབས་པ་སྐྱེ་འོས་པ་ཞིག་རེད།

མང་གཙོའི་ལམ་ལུགས་ནང་མི་མང་གཙོ་བོར་འཛིན་བཞིན་ཡོད་པ་དང་། ཆབ་སྲིད་ཀྱི་ལམ་ལུགས་ནང་ནས་ཡག་ཤོས་ལྟ་བུར་གྱུར་ཡོད་ཀྱང་། ཡོངས་རྫོགས་ཕུན་སུམ་ཚོགས་པའམ། ཡང་དག་པ། སྐྱོན་གཏན་ནས་མེད་པ་ཞིག་རེད་ཅེས་བརྗོད་དཀའ་བའི་གནས་ཚུལ་ཡང་མང་པོ་ཡོད། ལྷག་པར་ད་ལྟའི་ཆར་རྒྱ་གར་རྒྱལ་ཡོངས་གྲོས་ཚོགས་འོག་མའི་ནང་ས་མིག་གྲངས་༥༤༣ ཙམ་ཡོད་པའི་ནང་ནས། བྷི་ཇི་པི་སྲིད་དོན་ཚོགས་པར་གྲོས་ཚོགས་འཐུས་མི་གྲངས་༣༠༣ དང་། ཚོགས་པ་དེ་དང་ཟླ་སྒྲིལ་ཚོགས་པ་ཁག་གི་འཐུས་མི་བསྡོམས་ན་གྲོས་ཚོགས་འཐུས་༣༥༠ ལས་བརྒལ་ནས་གྲོས་ཚོགས་ཀྱི་འཐུས་མིའི་བརྒྱ་ཆ་༦༥ ཙམ་ཟིན་ཡོད་པས། གྲོས་ཚོགས་ནང་ཚོགས་པ་དེའི་ཁེ་ཕན་ནམ། ཡང་ན་ཆོས་ལུགས་བྱེ་བྲག་པའི་ཁེ་ཕན་སོགས་སྤྱི་ཚོགས་ཡོངས་ཀྱི་ཁེ་ཕན་དང་འདྲ་མཉམ་ལ་གནོད་པའི་རྩ་ཁྲིམས་བསྒྱུར་བཅོས་ལྟ་བུའི་རིགས་སླེབས་སྲིད་པའི་དབང་དུ་བཏང་ན། སྐབས་དེར་གྲོས་ཚོགས་ནང་དེ་ལ་གཞན་གྱིས་དགག་བྱ་བྱེད་པའི་ནུས་པ་གང་ཡང་མེད་པར་བྷི་ཇི་པི་སྲིད་དོན་ཚོགས་པ་ཁོ་ནའི་འཐུས་མི་ཚོས་ཐག་གཅོད་བྱེད་ཆོག་པ་ཞིག་ཏུ་གྱུར་ཡོད།

མདོར་ན་མང་གཙོའི་སྤྱི་ཚོགས་ནང་གཞུང་འཛིན་ཚོགས་པར་སྤྱི་ཡོངས་ནས་དབང་ཆ་ཡོད་ཀྱང་། ཁ་གཏད་ཚོགས་པ་ཁག་ལ་ནུས་པ་གཏན་ནས་མེད་པར་གྱུར་ཡོང་དུས་གཞུང་འཛིན་ཚོགས་པ་དེས་རང་སྣང་གང་དྲན་བྱེད་མི་སྲིད་པ་མིན་པ་འདི་ཡང་གནད་འགག་ཅིག་ཏུ་གྱུར་ཡོད། ཕྱོགས་གཅིག་ནས་ལས་དོན་བཟང་པོ་ཞིག་བསྒྲུབ་འདོད་ཀྱང་ཚོགས་པ་གཞན་ལ་ལྟོས་མི་དགོས་པར་ཐད་ཀར་ཐག་གཅོད་བྱེད་ཆོག་པའི་ཁེ་ཕན་ཡང་ཡོད་མོད། བརྗིད་ཉམས་སྟངས་འཛིན་གྱི་གནས་སྟངས་འདི་ཉིད་ཇི་ཙམ་ཉམས་ཞན་དུ་སོང་བ་དེ་ཙམ་གྱིས་དཀའ་ངལ་མང་པོ་ཞིག་རང་བཞིན་གྱིས་ཡོང་སྲིད་པ་རེད། དེར་བརྟེན་ཚོགས་པ་གཅིག་དང་། གང་ཟག་གཅིག་ལ་དབང་ཆ་ཧ་ཅང་ཆེན་པོ་ཐོབ་ཡོང་བའི་སྐབས་སུ་གནས་ཚུལ་འདྲ་མིན་སྣ་ཚོགས་ཡོང་གི་ཡོད་པ། དཔེར་ན་རྒྱ་ནག་གི་མའོ་ཙི་ཏུང་གི་ཚེ་སྟོད་ཀྱི་ཆབ་སྲིད་ལས་འགུལ་གྱི་ལོ་རྒྱུས་དང་དམིགས་ཡུལ་ནི་ཡིད་སྨོན་འོས་པ་ཞིག་ཡོད་ཀྱང་། དབང་ཆ་ཆ་ཚང་ལག་ཏུ་ཐོབ་ཟིན་རྗེས་ཀྱི་བྱེད་སྟངས་ནི་རང་ཉིད་ཀྱི་དམིགས་ཡུལ་དང་འབོད་སྒྲ་དག་དང་རྦད་དེ་རྒྱབ་འགལ་དུ་གྱུར་པ་ལྟ་བུའི་ཉེན་ཁ་ཡང་མེད་པ་ཞིག་མ་རེད།།