མི་རབས་གཞོན་པ་ཚོ་ལ་ཆང་རག་འཐུང་དགོས་པའི་སྐུལ་མ་བྱས་འདུག

ཟླ་འདིའི་ཚེས་༡༩ ཉིན་བྷི་བྷི་སི་གསར་ཁང་གིས་གནས་ཚུལ་སྤེལ་གསལ་ལྟར་ན། ཉི་ཧོང་གི་ནང་དུ་ཆང་རག་འཐུང་མཁན་མང་ཆེ་བ་ནི་མི་རབས་རྒན་པ་ཚོ་ཡིན་པ་དང་། མི་རབས་གཞོན་པ་ཚོས་ཆར་རག་འཐུང་ཚད་ཧ་ཅང་ཉུང་བས་ཉི་ཧོང་གི་ནང་དུ་ཆང་རག་གི་ཁྲོམ་ར་ཇེ་ཆུང་དུ་འགྲོ་བཞིན་ཡོད་པའི་གནས་ཚུལ་ཐོན་འདུག

ཉི་ཧོང་གི་མི་རབས་རྒན་པ་རྣམས་དང་བསྡུར་ན་མི་རབས་གཞོན་པའི་ཁྲོད་དུ་ཆང་རག་འཐུང་མཁན་ཇེ་ཉུང་དུ་འགྲོ་བཞིན་ཡོད་པ་དང་། ཆང་རག་འཐུང་མཁན་ཉུང་དུ་ཕྱིན་པའི་དབང་གིས་ཆང་རག་ལས་བྱུང་བའི་གཞུང་གི་ཡོང་འབབ་ཀྱང་ཉུང་དུ་ཕྱིན་ཡོད་པར་བརྟེན། ཉི་ཧོང་གི་རྒྱལ་ཡོངས་ཁྲལ་དོན་ལས་ཁུངས་ཀྱིས་སི་ཀེ(Sake Vival) ཞེས་པའི་ལས་འགུལ་ཅིག་སྤེལ་ནས་གཙོ་བོ་གཞོན་སྐྱེས་ལོ་ངོ་༢༠ ནས་༣༩ བར་གྱི་མི་རབས་གཞོན་པ་ཚོ་ལ་ཆང་རག་འཐུང་དགོས་པའི་སྐུལ་མ་གཏོང་བཞིན་ཡོད་པའི་གནས་ཚུལ་ཐོན་འདུག

སྤྱི་ལོ་༡༩༩༥ ལོར་ཉི་ཧོང་གི་ནང་དུ་མི་གཅིག་གི་ལོ་གཅིག་གི་ནང་དུ་ཆང་རག་ཆ་སྙོམ་འཐུང་ཚད་ནི་ལི་ཊར་༡༠༠ ཡིན་པ་དང་། སྤྱི་ལོ་༢༠༢༠ ལོར་ཉི་ཧོང་གི་ནང་དུ་མི་གཅིག་གི་ལོ་གཅིག་གི་ནང་དུ་ཆང་རག་འཐུང་ཚད་ཀྱི་ཆ་སྙོམ་ལི་ཊར་༧༥ མ་གཏོགས་ཟིན་མེད་པ་རེད་འདུག

ཉི་ཧོང་གི་དུས་བབ་གསར་ཁང་གིས་བརྗོད་གསལ་ལྟར་ན། སྤྱི་ལོ་༡༩༨༠ ནང་ཆང་རག་ལས་བྱུང་བའི་ཡོང་འབབ་ནི་ཉི་ཧོང་གི་ཡོང་འབབ་ཀྱི་བརྒྱ་ཆ་༥% ཟིན་ཡོད་ཀྱང་། སྤྱི་ལོ་༢༠༢༠ ལོར་ཆང་རག་ལས་བྱུང་བའི་ཡོང་འབབ་དེ་ཉི་ཧོང་གི་ཡོང་འབབ་ཀྱི་བརྒྱ་ཆ་༡.༧% མ་གཏོགས་ཟིན་མེད་པའི་གནས་ཚུལ་ཐོན་འདུག

ཉི་ཧོང་བ་དག་གིས་འཕྲོད་བསྟེན་ཐོག་ལ་གོ་རྟོགས་ཇེ་ཆེ་ཕྱིན་པ་དང་སྟབས་བསྟུན། མི་རབས་གཞོན་པའི་ཁྲོད་དུ་ཆང་རག་འཐུང་མཁན་ཉུང་དུ་ཕྱིན་ཡོད་རབས་བརྗོད་འདུག་ལ། འཛམ་གླིང་དངུལ་ཁང་གིས་ཚོད་བརྩིས་བྱས་པར་ལྟར་ན། ཉི་ཧོང་གི་མི་འབོར་གསུམ་ཆ་གཅིག་ནི་ལོ་ངོ་དྲུག་ཅུ་རེ་ལྔ་བརྒལ་ཟིན་པའི་རྒན་ཁོག་རྐྱང་པ་ཡིན་པའི་གནས་ཚུལ་སྤེལ་ཡོད་འདུག རྒྱལ་ཁབ་གཅིག་གི་ནང་དུ་ཆང་རག་འཐུང་མཁན་ཇི་ཙམ་ཉུང་ན་དེ་ཙམ་དགའ་འོས་པ་ཞིག་ཡིན་མོད་ཀྱང་། ད་ལྟའི་ཆར་ཉི་ཧོང་གི་ནང་དུ་ཆང་རག་འཐུང་མཁན་ཉུང་དྲགས་པའི་དཀའ་ངལ་ཡོད་རབས་ཀྱི་གནས་ཚུལ་སྤེལ་འདུག །

གསར་འགོད་པ་བློ་བཟང་རྒྱ་མཚོ།