མི་རིགས་ནག་པོའི་བུད་མེད་ཅིག་ཐེངས་དང་པོར་ཨ་རིའི་གཞུང་གི་མགྲིན་ཚབ་པར་བསྐོ་བཞག

རྗོ་བྷའེ་ཌན་གྱིས་སྲིད་དོན་ཁོར་ཡུག་ནང་ཉམས་མྱོང་ཡོད་པའི་མི་རིགས་ནག་པོའི་བུད་མེད་ཅིག་མགྲིན་ཚབ་པའི་ལས་གནས་སུ་བསྐོ་གཞག་བྱས་འདུག་པ་དང་། ཁོང་ནི་ཨ་རིའི་ལོ་རྒྱུས་ནང་མི་རིགས་ནག་པོའི་བུད་མེད་དང་མཚན་མཐུན་དགའ་རོགས་བྱེད་མཁན་བུད་མེད་གཅིག་གལ་གནད་ཆེ་བའི་ལས་གནས་དེར་བསྐོ་གཞག་བྱུང་བ་ཐེངས་དང་པོ་ཡིན་འདུག་པས། ལོ་རྒྱུས་རང་བཞིན་ཅན་གྱི་གནད་དོན་ཞིག་ཆགས་འདུག 

ཟླ་༥ པའི་ཚེས་༦ ཉིན་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ། ཨ་རིའི་སྲིད་འཛིན་རྗོ་བྷའེ་ཌན་གྱིས་གསལ་བསྒྲགས་ཤིག་སྤེལ་ནས། ད་ཡོད་ཨ་རིའི་གཞུང་གི་གསར་འགོད་དྲུང་ཆེ་ལྕམ་ཇེན་པཱ་སེ་ཀཱི་བདུན་ཕྲག་འདིའི་མཇུག་ཏུ་ལས་གནས་ནས་རྩ་དགོངས་ཞུ་ཡི་ཡོད་པ་དང་། མོའི་ཚབ་ཏུ་ད་ཡོད་གསར་འགོད་དྲུང་གཞོན་ལྕམ་ཀཱེ་རན་ཇེན་པཱིར་གྱིས་ལས་ཁུར་ལེན་རྒྱུ་ཡིན་ཁར། སྲིད་འཛིན་སྒེར་གྱི་དྲུང་ཡིག་གི་ལས་ཁུར་ལེན་རྒྱུ་ཡིན་པས་དགའ་སྤོབས་ཆེན་པོ་ཡོད་སྐོར་བརྗོད་འདུག 

ལྕམ་ཁོང་ནི་དེ་སྔོན་ཨོ་བྷ་མའི་སྲིད་གཞུང་སྐབས་སུ་འབྲེལ་མཐུད་དང་སྲིད་དོན་ལས་དོན་ཐོག་ཏུ་མཐོ་རིམ་ལས་བྱེད་ཡིན་འདུག་པ་དང་། དེ་བཞིན་རྗོ་བྷའེ་ཌན་གྱི་སྲིད་འཛིན་དྲིལ་བསྒྲགས་ལས་འགུལ་སྐབས་སུ་ཡང་དེ་ལྟར་ལས་ཁུར་བླངས་འདུག དེ་བཞིན་ཨ་རིའི་གསར་ཁང་ཆེ་གྲས་ཁག་ཅིག་གིས་སྲིད་དོན་དཔྱད་བརྗོད་པའི་ལས་གནས་ཐོག་ཏུ་ཡང་ལས་ཀ་བྱེད་མྱོང་ཡོད་འདུག་པས། སྲིད་དོན་ཁོར་ཡུག་ནང་ཉམས་མྱོང་ཕྱུག་པོ་ཡིན་པ་རེད་འདུག འོན་ཀྱང་ཐེངས་འདིར་ཁོང་ཨ་རིའི་གཞུང་གི་མགྲིན་ཚབ་པ་སྟེ་གསར་འགོད་དྲུང་ཆེར་བསྐོ་གཞག་བྱུང་བ་དེ་ནི་ལོ་རྒྱུས་རང་བཞིན་ཅན་ཞིག་ཆགས་འདུག་པས། མི་ཚོས་དགའ་བསུ་ཆེན་པོ་བྱེད་བཞིན་འདུག 

ལྕམ་ཁོང་གིས་བསྐོ་གཞག་དེ་ནི་ལོ་རྒྱུས་རང་བཞིན་ཅན་ཞིག་ཡིན་པས་དགའ་སྤོབས་ཆེན་པོ་ཡོད་ཁར། ལས་འགན་ལྕི་པོ་ཡིན་པར་ངོས་འཛིན་ཐུབ་པའི་ཐོག་ནས་ལས་དོན་ཧུར་ཐག་བྱེད་རྒྱུ་ཡིན་སྐོར་བརྗོད་འདུག 

དེ་ཡང་ཨ་རིའི་གཞུང་གི་གསར་འགོད་དྲུང་ཆེ་དེ་ནི་ཨ་རིའི་སྲིད་འཛིན་དང་སྲིད་གཞུང་གི་མགྲིན་ཚབ་པ་ཡིན་ཁར། རྒྱལ་ནང་དང་རྒྱལ་སྤྱིའི་ནང་དུ་ངོ་ཤེས་ཐུབ་པའི་མི་སྣ་གལ་ཆེན་ཞིག་ཆགས་ཀྱི་ཡོད་ཁར། ཉིན་རེའི་གསར་འགོད་ལྷན་ཚོགས་ཐོག་ཏུ་སྲིད་གཞུང་གི་མགྲིན་ཚབ་བྱས་ཏེ་ལན་འདེབས་བྱེད་དགོས་ཀྱི་ཡོད་པ་རེད། སྤྱིར་བཏང་གསར་འགོད་དྲུང་ཆེ་ཚོས་སྲིད་གཞུང་གི་སྲིད་བྱུས་གཏན་འབེབས་ཐོག་ཏུ་ཐེ་བྱུས་བྱེད་ཀྱི་མེད་ཀྱང་། མང་ཚོགས་ནང་སྲིད་གཞུང་ལ་ལྟ་ཕྱོགས་གང་འདྲ་ཆགས་མིན་ལ་ཤུགས་རྐྱེན་སྤྲོད་པའི་ལས་འགན་དང་ནུས་པ་ཆེན་པོ་ཡོད་འདུག འདས་པའི་གསར་འགོད་དྲུང་ཆེ་ཁག་ཅིག་ལ་མང་ཚོགས་ནས་དགའ་མོས་ཆེན་པོ་བྱེད་ཀྱི་ཡོད་པ་དང་། ཁག་ཅིག་ཆོབ་སློང་ཡུལ་དུ་ཆགས་པ་དེ་འདྲ་ཡང་ཡོད་འདུག 

ཟླ་༡༡ ནང་ཨ་རིའི་གྲོས་ཚོགས་ཀྱི་བར་མའི་འོས་བསྡུ་བྱེད་རྒྱུ་ཡིན་པས། མང་གཙོ་ཚོགས་པའི་སྲིད་གཞུང་གི་མགྲིན་ཚབ་པ་གཅིག་ལ་ལས་འགན་ལྕི་མོ་ཡོད་པ་རེད། །

གསར་འགོད་པ་སྐལ་བཟང་དོན་གྲུབ།