མི་རིགས་རིང་ལུགས་ཚོགས་པ་ཐེངས་དང་པོར་གྲོས་ཚོགས་ནང་སླེབས་ཐུབ་འདུག

སེ་པན་གྱི་རྒྱལ་ཡོངས་གྲོས་ཚོགས་འོས་བསྡུའི་གྲུབ་དོན་དུ་གཞུང་འཛིན་སྤྱི་ཚོགས་རིང་ལུགས་ཚོགས་པར་རྒྱལ་ཁ་ཐོབ་ཀྱང་། དགོས་ངེས་ཀྱི་རྐུབ་སྟེགས་མང་ཤོས་ཐོབ་མེད་པས་སྲིད་དོན་ཚོགས་པ་གཞན་དང་ཟླ་སྒྲིལ་གྱིས་གཞུང་འཛིན་བྱེད་དགོས་ཀྱི་ཡོད་ཁར། ཡུ་རོབ་ཀྱི་རྒྱལ་ཁབ་གཞན་ནང་ཕྱི་མི་ལ་ངོ་རྒོལ་གྱི་ལྟ་བ་ཁྱབ་སྤེལ་བྱེད་མཁན་གྱི་སྲིད་དོན་ཚོགས་པར་རྒྱབ་སྐྱོར་མང་དུ་འགྲོ་བཞིན་ཡོད་པ་ལྟར། ཐེངས་འདིའི་སེ་པན་གྱི་གྲོས་ཚོགས་འོས་བསྡུའི་གྲུབ་དོན་དུ། ལོ་ངོ་བཅུ་ཕྲག་བཞི་ཡི་རྗེས་སུ་ཐེངས་དང་པོར་མི་རིགས་རིང་ལུགས་ཀྱི་ལྟ་བ་མཁྲེགས་འཛིན་མཁན་གྱི་སྲིད་དོན་ཚོགས་པར་གྲོས་ཚོགས་ནང་རྐུབ་སྟེགས་ཐོབ་འདུག

ཟླ་༤ པའི་ཚེས་༢༨ ཉིན་སེ་པན་ནང་འོས་འཕེན་པའི་ཆ་རྐྱེན་ཚང་བའི་མི་མང་བརྒྱ་ཆ་༧༥.༨ ཀྱིས། རྒྱལ་ཡོངས་གྲོས་ཚོགས་འོས་བསྡུར་མཉམ་ཞུགས་བྱས་འདུག་པ་དང་། ཐེངས་འདིའི་འོས་བསྡུ་དེ་ནི་ལོ་བཞིའི་ནང་གི་ཐེངས་གསུམ་པ་དེ་ཆགས་ཀྱི་འདུག དེ་ཡང་ལྐོག་ཟ་རུལ་སུངས་དང་དཔལ་འབྱོར་ཉམས་རྒུད། ཀེ་ཌ་ལོ་ནི་ཡའི་རང་བཙན་ལས་འགུལ་སོགས་ཀྱི་གནས་ཚུལ་ལ་བརྟེན་ནས་གཞུང་འཛིན་འཕོ་འགྱུར་གཏོང་དགོས་པའི་གནད་དོན་ཁག་ཅིག་བྱུང་ཡོད་པ་རེད།

འོས་བསྡུའི་གྲུབ་དོན་དུ་གཞུང་འཛིན་སྤྱི་ཚོགས་རིང་ལུགས་ཀྱི་སྲིད་དོན་ཚོགས་པར་འོས་གྲངས་བརྒྱ་ཆ་༢༩ ལྷག་ཐོབ་སྟེ། གྲོས་ཚོགས་ནང་རྐུབ་སྟེགས་༡༢༣ ཐོབ་འདུག་པས་རྐུབ་སྟེགས་མང་ཤོས་ཆགས་ཏེ་རྒྱལ་ཁ་ཐོབ་འདུག་ཀྱང་། གཞུང་འཛིན་བྱེད་པར་དགོས་ངེས་ཀྱི་མང་མོས་རྐུབ་སྟེགས་གྲངས་༡༧༦ ཐོབ་མེད་པས། སྲིད་དོན་ཚོགས་པ་གཞན་དང་ཟླ་སྒྲིལ་གྱིས་གཞུང་འཛིན་བྱེད་དགོས་ཀྱི་འདུག ཟླ་སྒྲིལ་གྱི་ལས་དོན་ཐད་གྲོས་མོལ་ནང་ཀེ་ཌ་ལོ་ནི་ཡའི་རང་བཙན་ལ་རྒྱབ་སྐྱོར་བྱེད་མཁན་གྱི་ཁུལ་དེའི་སྲིད་དོན་ཚོགས་པ་དང་ཟླ་སྒྲིལ་བྱེད་དགོས་པ་ཆགས་སྲིད་པ་རེད་འདུག་པས། འོས་ཐོབ་སྲིད་དོན་ཚོགས་པ་དེའི་སྲིད་བློན་འོས་མིས། ཀེ་ཌ་ལོ་ནི་ཡའི་རང་བཙན་ལ་རྒྱབ་སྐྱོར་བྱེད་ཀྱི་མི་འདུག་པས། གྲོས་མོལ་ལམ་ལྷོངས་ཡོང་རྒྱུ་ཁག་པོ་ཡིན་འདུག དེའི་ཐོག་སྲིད་དོན་ཚོགས་པ་ཆུང་བ་གཞན་དང་ཟླ་སྒྲིལ་བྱེད་ཐུབ་མིན་ཚོད་དཔག་བྱེད་དཀའ་བ་ཡིན་པས། ཟླ་སྒྲིལ་གྱི་གྲོས་མོལ་དེ་རིང་པོ་དང་ཁག་པོ་ཆགས་ཉེན་ཡོད་འདུག

དེ་བཞིན་ལོ་༥ ཡི་སྔོན་དུ་གསར་འཛུགས་བྱས་པའི་སེ་པན་གྱི་མི་རིགས་རིང་ལུགས་ལྟ་བ་མཁྲེགས་འཛིན་མཁན་གྱི་སྲིད་དོན་ཚོགས་པ་ཝོག་སེ་ཞེས་པ་དེར། གྲོས་ཚོགས་ནང་རྐུབ་སྟེགས་༢༤ ཐོབ་འདུག དེ་ཡང་སེ་པན་ནང་དམག་གི་དབང་བསྒྱུར་མཇུག་བསྒྲིལ་ནས་ལོ་ངོ་བཅུ་ཕྲག་བཞི་ལྷག་གི་རྗེས་སུ། ཐེངས་དང་པོར་གྲོས་ཚོགས་ནང་ཕྱི་མི་གནས་སྤོ་བ་དང་སྐྱབས་བཅོལ་བ། བུད་མེད་ཀྱི་ཐོབ་ཐང་རྩོད་ལེན། ཁ་ཆེ་ཆོས་ལུགས། མངལ་དབྱུང། མཚན་མཐུན་ཆང་ས་སོགས་ལ་ངོ་རྒོལ་ཤུགས་ཆེན་བྱེད་ཀྱི་ཡོད་པའི་སྲིད་དོན་ཚོགས་པ་དེར་གྲོས་ཚོགས་ནང་རྐུབ་སྟེགས་ཐོབ་པ་དེས། སེ་པན་ནང་སྲིད་དོན་ཚོགས་པ་ཆེ་གྲས་ལྔ་ཆགས་ནས། སྔོན་མ་རྙིང་ཞེན་དང་སྤྱི་ཚོགས་རིང་ལུགས་སྲིད་དོན་ཚོགས་པ་གཉིས་ཀྱིས་རེས་མོས་ངང་དབང་བསྒྱུར་བྱེད་པའི་དུས་སྐབས་མཇུག་བསྒྲིལ་ཡོད་འདུག

རྒྱལ་ཁ་ཐོབ་མཁན་གཞུང་འཛིན་ཚོགས་པའི་སྲིད་བློན་གྱིས། ཐེངས་འདིར་མ་འོངས་མདུན་ལམ་ལ་རྒྱལ་ཁ་བྱུང་ཡོད་པ་དང་། སྲིད་དོན་ཚོགས་པ་སུ་དང་མཉམ་དུ་ཟླ་སྒྲིལ་གྱིས་གཞུང་འཛིན་བྱེད་པར་རྩ་ཁྲིམས་ལ་གུས་བརྩི་དང་། སྤྱི་ཚོགས་དྲང་བདེན་ཕྱོགས་སུ་མདུན་བསྐྱོད། མཉམ་གནས། ཆབ་སྲིད་ཡང་དག་པ་བཅས་བྱེད་དགོས་པ་ནི་ཆ་རྐྱེན་གཙོ་བོ་ཡིན་སྐོར་བརྗོད་འདུག

ཆབ་སྲིད་དཔྱད་བརྗོད་པ་ཁག་ཅིག་གིས། ཀེ་ཌ་ལོ་ནི་ཡའི་མི་མང་གིས་སེ་པན་ནས་ཁ་བྲལ་གྱིས་རང་བཙན་ངང་གནས་པའི་མང་མོས་འོས་བསྡུའི་ཐག་གཅོད་ལ་རྒྱབ་སྐྱོར་བྱས་ནས། རྒྱལ་ཁབ་དེའི་ནང་རྙོག་གྲ་ཆེན་པོ་ལྷག་རྐྱེན། ཁ་བྲལ་ལ་ངོ་རྒོལ་ཆེན་པོ་བྱེད་མཁན་དང་། ཕྱི་མི་ལ་ངོ་རྒོལ་བྱེད་མཁན་གྱི་མི་རིགས་རིང་ལུགས་ལྟ་བ་མཁྲེགས་འཛིན་མཁན་སྲིད་དོན་ཚོགས་པ་ཝོག་སེ་ཞེས་པ་དེར། མི་མང་ནས་རྒྱབ་སྐྱོར་ཆེ་རུ་ཕྱིན་ཡོད་སྐོར་བརྗོད་འདུག

ཡུ་རོབ་ཀྱི་རྒྱལ་ཁབ་འཇར་མན་དང་ཧྥ་རན་སི་སོགས་ལ་ལོ་ཤས་སྔོན་ནས་རྒྱལ་ཡོངས་གྲོས་ཚོགས་འོས་བསྡུའི་སྐབས་སུ། མི་རིགས་རིང་ལུགས་ཀྱི་ལྟ་བ་མཁྲེགས་འཛིན་མཁན་གྱི་སྲིད་དོན་ཚོགས་པར་རྒྱབ་སྐྱོར་ཆེ་རུ་ཕྱིན་ནས། གྲོས་ཚོགས་རྐུབ་སྟེགས་མང་དུ་ཕྱིན་པའམ་ཐེངས་དང་པོར་རྐུབ་སྟེགས་ཐོབ་པའི་གནས་ཚུལ་བྱུང་ནས། ཡུ་རོབ་ནང་ཆབ་སྲིད་ཀྱི་འགྱུར་འགྲོས་ཆེན་པོ་འགྲོ་བཞིན་པའི་རྣམ་པ་ཐོན་ཡོད་པ་རེད།།

གསར་འགོད་པ་སྐལ་བཟང་དོན་གྲུབ།