མོན་རྟ་ཝང་དགའ་ལྡན་རྣམ་རྒྱལ་ལྷ་རྩེ་དགོན་པས་༸གོང་ས་མཆོག་ལ་བརྟན་བཞུགས་ཕུལ་བ།

འདི་ལོར་༸གོང་ས་མཆོག་ཕྱི་ལུགས་ལྟར་དགུང་གྲངས་བརྒྱད་བཅུར་ཕེབས་ཀྱི་ཡོད་པ་ལྟར། དབུས་བོད་མིའི་སྒྲིག་འཛུགས་གཙོས་ཚོགས་པ་ཁག་དང་། གཞིས་བྱེས་གཉིས་སུ་ཡོད་པའི་བོད་མི་ཚོས་གྱ་སྟོན་གྱི་རྟེན་འབྲེལ་དང་བསྟུན། ༸གོང་ས་མཆོག་ལ་བཀྲིན་རྗེ་དྲན་ཞུ་ཡི་ཡོད་པ་རེད།

བསྟན་འགྲོ་སྤྱི་དང་བྱེ་བྲག་བོད་གངས་ཅན་པ་རྣམས་ཀྱི་མགོན་དཔུང་དམ་པར་སྐུ་ཚེ་བསྐལ་བརྒྱར་བསྟན་ཞིང་ཐུགས་ཀྱི་བཞེད་དགོངས་མཐའ་དག་ལྷུན་གྱིས་འགྲུབ་པའི་ཕྱིར། བརྟན་བཞུགས་བསྟར་འབུལ་ཞུ་ཡི་བཞིན་ཡོད་པ་ལྟར། ཕྱི་ཟླ་༣ ཚེས་༢༩ ཉིན། མོན་རྟ་ཝང་དགའ་ལྡན་རྣམ་རྒྱལ་ལྷ་རྩེ་དགོན་པས། དྷ་ས་དགའ་ལྡན་ཕོ་བྲང་གི་རྟ་མགྲིན་ཁང་དུ་གཟིམ་ཆུང་བརྟན་བཞུགས་ཤིག་བསྟར་འབུལ་ཞུས་ཡོད་པ་རེད།

དགའ་ལྡན་རྣམ་རྒྱལ་ལྷ་རྩེ་དགོན་པའི་མཁན་པོ་གུ་རུ་རིན་པོ་ཆེས་ངོ་སྤྲོད་གནང་གནང་བ་ལྟར་ན། མོན་རྟ་ཝང་དགའ་ལྡན་ལྷ་བརྩེའི་དགོན་པ་ནི་རྒྱལ་མཆོག་སྐུ་ཕྲེང་ལྔ་པ་ནས་སྐུ་ཕྲེང་རིམ་བྱོན་བར་ཐུན་མོང་མ་ཡིན་པའི་འབྲེལ་བ་ཡོད་པ་ཞིག་ཆགས་ཡོད་པ་དང་། བྱེ་བྲག་༸གོང་ས་སྐུ་ཕྲེང་བཅུ་བཞི་པ་མཆོག་དང་དམིགས་བསལ་འབྲེལ་བ་དམ་ཟབ་ཡོད་པ་ཞིག་རེད།

ད་ཐེངས་མགོན་པོ་གང་ཉིད་ནས་བརྟན་བཞུགས་སྐབས་སུ་དམིགས་བསལ་མོན་ཡུལ་ཁུལ་གྱི་མང་ཚོགས་ཚོས་ནང་པ་སངས་རྒྱས་པའི་བསྟན་པའི་གནས་ཚུལ་ཤེས་པ་དང་སློབ་སྦྱོང་བྱ་ཆེད། དགོན་པ་ཚོས་དམིགས་བསལ་འགན་ཁུར་ལེན་དགོས་སྐོར་དང་། ནང་པའི་ཆོས་སྦྱང་རྒྱུར་བོད་ཡིག་གལ་ཆེན་པོ་ཡིན་སྐོར་སོགས་ཀྱི་ལམ་སྟོན་གནང་ཡོད་འདུག

དགོན་པ་དེའི་ལས་ཀྱི་སྣེ་མོ་བས་དབུས་དགེ་འདུན་པ་༥༠ ཙམ་བརྟན་བཞུགས་ཕུལ་སར་བཅར་ཡོད་པ་རེད།།
གསར་འགོད་པ་ཆོས་ཉིད་འོད་ཟེར།