ཙན་དན་དགོན་པའི་གྲྭ་བློ་བཟང་ཟླ་བ་རྒྱ་གཞུང་གི་འཛིན་བཟུང་།

ཟླ་༣ ཚེས་༢༠ མཚན་མོར་སོག་རྫོང་ཙན་དན་དགོན་པའི་གྲྭ་བློ་བཟང་ཟླ་བ་རྒྱ་གཞུང་གི་ཉེན་རྟོག་པས་བཙན་ཁྲིད་བྱས་ནས་གར་སོང་མེད་པའི་གནས་ཚུལ་བྱུང་འདུག གསང་བའི་ངང་ནས་བཙན་ཁྲིད་བྱས་སྟབས་ཞིབ་ཕྲའི་གནས་ཚུལ་ཤེས་མཁན་བྱུང་མི་འདུག

གྲྭ་བློ་བཟང་ཟླ་བ་ནི་ཙན་དན་དགོན་པའི་ཁང་གཉེར་ལས་ཐོག་ཡིན་པ་དང་། ཕ་ཡུལ་ཁམས་སོག་རྫོང་ར་དབག་ཡུལ་ཚོའི་གྲོང་ཚོ་བཞི་པ་འབེ་ཆེན་གྲོང་ཚོ་ནས་ཡིན་ཞིང་རང་ལོ་༣༨ ཙམ་རེད་འདུག

དེང་སྐབས་རྒྱ་གཞུང་གིས་འཕྲིན་ཕྲན་(wechat)གྱི་བརྒྱུད་ལམ་ཁག་ལ་ཞིབ་བཤེར་བྱེད་བཞིན་ཡོད་པ་དང་། འཕྲིན་ཕྲན་གྱི་བརྒྱུད་ལམ་ནས་རྒྱ་གཞུང་གི་ལྟ་སྤྱོད་མི་མཐུན་པའི་པར་རིས་དང་ཡིག་ཆ་ཉར་བའི་ཉེས་མིང་འོག་འཛིན་བཟུང་བྱས་པ་ཡིན་སྲིད་པའི་ས་གནས་ཡུལ་མི་ཚོས་ཚོད་དཔག་བྱེད་བཞིན་པ་ལས་རྒྱ་གཞུང་གི་ཉེན་རྟོག་པས་གསལ་བཤད་བྱས་མི་འདུག

དེ་བཞིན་དེང་སྐབས་མདོ་སྨད་ཕྱོགས་ལ་སློབ་གཉེར་འགྲོ་མཁན་མང་པོ་ཞིག་འཛིན་བཟུང་བཀག་ཉར་བྱས་ཡོད་པའི་གནས་ཚུལ་བྱུང་འདུག་ཀྱང་ཞིབ་ཕྲའི་གནས་ཚུལ་ས་གནས་སུ་དམ་དྲག་ཆེ་བས་ཤེས་རྟོགས་བྱེད་ཐུབ་ཀྱི་མི་འདུག་ཅེས་འབྲེལ་ཡོད་ཀྱིས་འགྲེལ་བརྗོད་གནང་བྱུང་།། གསར་འགོད་པ་ངག་དབང་ཐར་པ།