ཚད་མ་རྣམ་འགྲེལ་ལེའུ་གཉིས་པའི་གསུང་ཆོས་དབུ་འཛུགས་གནང་སོང་།

ཟླ་འདིའི་ཚེས་ ༣ ཉིན་ནས་ཉིན་གྲངས་གསུམ་གྱི་རིང་༸གོང་ས་མཆོག་གིས་ཐའེ་ཝན་གྱི་དད་ལྡན་མི་མང་རྣམས་ཀྱིས་ཇི་ལྟར་གསོལ་བ་བཏབ་པ་ལྟར། བཞུགས་སྒར་དྷ་ས་ཐེག་ཆེན་ཆོས་གླིང་གཙུག་ལག་ཁང་དུ་རྒྱ་གར་ནཱ་ལེནྡྲའི་སློབ་དཔོན་ཆེན་མོ་དཔལ་ཆོས་ཀྱི་གྲགས་པས་མཛད་པའི་ཚད་མ་རྣམ་འགྲེལ་གྱི་ལེའུ་གཉིས་པའི་གསུང་ཆོས་དབུ་འཛུགས་མཛད་སོང་།

སྐབས་དེར་༧གོང་ས་མཆོག་གིས་ངོས་ཀྱིས་ཚད་མ་རྣམ་འགྲེལ་གྱི་བཤད་ལུང་ཞུ་ས་ཕལ་ཆེར་ཁུ་ནུ་བླ་མ་རིན་པོ་ཆེ་ཡིན། ཁོང་གིས། སྐྱེ་བོ་ཕལ་ཆེར་ཕལ་ལ་ཆགས་ཤིང་ཤེས་རབ་རྩལ་མེད་པས་ན་ལེགས་བཤད་རྣམས།། དོན་དུ་མི་གཉེར་ཁོ་ནར་མ་ཟད་ཕྲག་དོག་དྲི་མ་དག་གིས་སྡང་བར་ཡང་།། ཡོངས་གྱུར་དེས་ན་བདག་ལ་འདི་ནི་གཞན་ལ་ཕན་པ་ཡིན་ཞེས་བསམ་པའང་མེད།། ཅེས་བསམ་པའང་མེད་ཅེས་པའི་ཚིག་འདི་མ་དག་པ་རེད། ཡོངས་གྱུར་དེས་ན་བདག་ལ་འདི་ནི་གཞན་ལ་ཕན་པ་ཡིན་ཞེས་བསམ་པ་མེད་ནའང་།། སེམས་ནི་ཡུན་རིང་ལེགས་བཤད་གོམས་པས་ལྷུར་ལེན་བསྐྱེད་ཕྱིར་འདི་ལ་དགའ་བ་སྐྱེས།། ཞེས་པ་རེད་ཅེས་གསུངས་སོང་།  ཚིག་འདི་ཧ་ཅང་ནུས་པ་ཆེན་པོ་འདུག ཁ་སང་དེ་རིང་གི་དུས་ཚོད་འདིར་མི་མང་ཆེ་བ་ཕྱི་དངོས་པོ་ཡར་རྒྱས་རྐྱང་རྐྱང་ལ་བསམ་བློ་བཏང་ནས་སྡོད་མཁན་མ་གཏོགས་ནང་བསམ་བློ་ལ་འགྱུར་བ་གཏོང་རྒྱུར་བསམ་བློ་གཏོང་མཁན་ཉུང་ཉུང་རེད། སྤྱིར་ཆོས་ལུགས་འདྲ་མིན་མང་པོ་ཡོད་པ་རེད། ཚང་མས་སེམས་པ་བཟང་པོ་བྱེད་དགོས་པ་དང་ཕན་བདེ་སྒྲུབ་དགོས་པ་བཤད་ཀྱི་ཡོད། ལྷག་པར་དུ་དཔལ་ནཱ་ལེནྡྲ་ནས་བརྒྱུད་པའི་ཆོས་ཚུལ་འདིས་ཆོས་རབ་ཏུ་རྣམ་འབྱེད་ཀྱི་ཤེས་རབ་གང་ཡོད་རྩལ་དུ་བཏོན་ནས་སེམས་མ་དུལ་བ་ཇི་ལྟར་ཡོང་གི་ཡོད་པ་དང་། སེམས་མ་དུལ་བར་བྱེད་མཁན་ངོ་ཡག་པོ་འཕྲོད་པ་ཡིན་ན་སེམས་ལ་ཞི་བདེ་སྒྲུབ་པའི་འགྲོ་སྟངས་ལ་དོ་སྣང་སླེབས་ཐུབ་པ་ཞིག་གསུང་གི་ཡོད་པས་ཧ་ཅང་ཡག་པོ་རེད། སེམས་ཁམས་རིག་པའི་སྐོར་ལ་སངས་རྒྱས་པའི་གཞུང་ལུགས་ནང་དུ་ཧ་ཅང་མང་པོ་གསུང་གི་འདུག་ཅེས་དང་།

དེ་བཞིན་སེམས་ཀྱི་ཞི་བདེའི་སྐོར་ལ་བཀའ་སློབ་སྩལ་དོན། ང་ཚོ་ཆུང་ཆུང་སྐབས་མའི་པང་ཁར་ཡོད་དུས་བྱམས་བརྩེ་ཧ་ཅང་སོས་པ་ལྟ་བུ་རེད། མ་དང་ཁ་བྲལ་ནས་སློབ་གྲྭར་ཕྱིན་པའི་སྐབས་སུ་ཕྱིའི་དངོས་པོ་ཡར་རྒྱས་དང་འབྲེལ་བའི་ཤེས་བྱའི་གནས་ཚུལ་ཤེས་པ་མ་གཏོགས་སེམས་ཀྱི་ཞི་བདེ་ཇི་ལྟར་ཡོང་དགོས་པ་དང་། བྱམས་བརྩེ་གལ་ཆེན་པོ་ཡིན་པའི་གྲས་ལ་སློབ་སྦྱོང་ནང་དོ་སྣང་སྤྲོད་རྒྱུ་ཉུང་དྲགས་ཀྱི་འདུག ངོས་ཀྱིས་དེ་ལྟར་དྲན་གྱི་འདུག ངོས་རང་ལྡི་ལིར་སླེབས་སྐབས་ཤིག་ལ་ལྡི་ལིའི་གཙུག་ལག་སློབ་གཉེར་ཁང་ཁག་གི་དགེ་རྒན་རྣམས་ལ་ཐུག་ནས་གོ་བསྡུར་བྱེད་འདོད་ཡོད། སློབ་གྲྭའི་ནང་ཆོས་ཀྱི་སྐད་ཆ་མིན་པར་སེམས་ཀྱི་ཞི་བདེ་ཇི་ལྟར་བཟོ་དགོས་མིན་དང་། ཞི་བདེ་ཁོང་ཁྲོས་དཀྲུག་གི་ཡོད་པ་སོགས་སློབ་གྲྭའི་སློབ་གསོའི་སྡེ་ཚན་ནང་སླེབས་ཐུབ་པ་ཞིག་བྱུང་ན་སེམས་ཀྱི་ཞི་བདེ་ཡོང་བར་ཏན་ཏན་ཕན་ཐོགས་ཡོང་གི་རེད། དེ་ལྟར་བསམ་བློ་གཏོང་གི་ཡོད།

རྒྱ་གར་འཕགས་པའི་ཡུལ་ལ་ལོ་སྟོང་ཕྲག་གོང་ནས་ཀཱ་རུ་ཎ་(Karuna) དང་། ཨ་ཧིམ་ས་(Ahimsa) ཟེར་བ་ཡོད་པ་རེད། འཚེ་བ་མེད་པ་ནི་བར་སྐབས་གྷན་དྷི་ཡིས་ཧ་ཅང་ཡར་རྒྱས་བཏང་བ་རེད། ཁོང་གི་ཆབ་སྲིད་ཀྱི་འཐབ་རྩོད་མཐའ་གཅིག་ཏུ་འཚེ་བ་མེད་པའི་ཐོག་ཕྱིན་ནས་ཨ་རི་དང་ཨ་ཧྥུ་རི་ཀ་སོགས་འཛམ་གླིང་འདིར་གང་ལ་གང་འཚམ་ཁྱབ་བརྡལ་ཕྱིན་ཡོད་པ་རེད། འཚེ་བ་མེད་པ་ཡོང་བ་ལ་གཙོ་བོ་སེམས་ཀྱི་བྱམས་བརྩེ་དགོས། ཆོས་ཁས་ལེན་མིན་ཅི་ལྟར་ཡང་། གཟུགས་པོའི་འཕྲོད་བསྟེན་གྱི་ཆ་ནས་ཡིན་ནའང་བྱམས་བརྩེ་གལ་ཆེན་པོ་ཡིན་པ་ང་ཚོས་གོ་བསྡུར་བྱེད་ཐུབ་པ་བྱུང་ན་བསམ་བཞིན་ཡོད། གང་ལྟར་རྒྱ་གར་གྱིས་གནའ་རབས་ནས་བྱམས་བརྩེ་བཤད་ཀྱི་ཡོད་པ་རེད་ལ། ཆོས་ལུགས་ཚང་མའི་ནང་དུ་བྱམས་བརྩེ་གསུང་གི་འདུག དེའི་སྒྲུབ་བྱེད་འཇིག་རྟེན་བཀོད་པ་པོ་བཤད་ནས་དད་པའི་ཐོག་ནས་འགྲོ་བཞིན་ཡོད། ང་ཚོའི་ནཱ་ལེནྡྲའི་ཆོས་བརྒྱུད་ཀྱིས་བྱམས་བརྩེ་སྤེལ་བ་ནི་རིག་པའི་ཐོག་ནས་སྤེལ་བ་ལས་དད་པའི་ཐོག་ནས་སྤེལ་བའི་སྐད་ཆ་མིན། དེར་བརྟེན། ད་ལྟའི་དུས་ཚོད་འདིར་སེམས་ཀྱི་ཞི་བདེ་ཇི་ལྟར་སྒྲུབ་དགོས་པ་ལ་དོ་སྣང་ཏོག་ཙམ་བྱེད་ཐུབ་ན་དྲན་གྱི་ཡོད། དེའི་ཐོག་ལ་ངོས་ཀྱིས་ཞབས་འདེགས་སྒྲུབ་ཐུབ་ན་ག་ཚོད་ཐུབ་ཐུབ་ཀྱིས་སྒྲུབ་འདུན་ཡོད། ཅེས་བཀའ་སློབ་སྩལ་སོང་།

གསར་འགོད་པ། བློ་བཟང་རྒྱ་མཚོ།